കൊലപാതക കേസിൽ ഒളിമ്പിക് ഗുസ്തി താരം സുശീൽ കുമാറിന് ജാമ്യം. ഡൽഹി ഹൈക്കോടതിയുടേതാണ് ഉത്തരവ്. 50,000 രൂപയുടെ ബോണ്ടും അതേ തുകയ്ക്കുള്ള രണ്ട് ആൾജാമ്യവും നൽകിയ ശേഷമാണ് കോടതി വിധി. ജസ്റ്റിസ് സഞ്ജീവ് നരുല അധ്യക്ഷനായ ബെഞ്ചാണ് ജാമ്യം അനുവദിച്ചത്.
2021 മെയ് മാസത്തിൽ ജൂനിയർ ഗുസ്തിക്കാരനായ 23 കാരനായ സാഗർ ധങ്കറിൻ്റെ കൊലപാതക കേസിലെ മുഖ്യപ്രതിയായിരുന്നു സുശീൽ കുമാർ. രണ്ട് തവണ ഒളിമ്പിക് മെഡൽ ജേതാവായ സുഷീൽ കുമാറിനെതിരെ കൊലപാതകം, കലാപം, നിയമവിരുദ്ധമായി സംഘം ചേരൽ, ക്രിമിനൽ ഗൂഢാലോചന എന്നീ കുറ്റങ്ങളാണ് ചുമത്തിയിരുന്നത്.
ഡൽഹി പോലീസ് 170 പേജുള്ള കുറ്റപത്രം കോടതിയിൽ സമർപ്പിച്ചതിന് പിന്നാലെയാണ് ധങ്കർ വധക്കേസിൽ മുഖ്യപ്രതിയായി സുശീൽ കുമാറിനെ ഉൾപ്പെടുത്തിയത്. വ്യക്തിപരമായ തർക്കത്തിന്റെ പേരിൽ 2021 മെയ് 4 ന് രാത്രി ഡൽഹിയിലെ ഛത്രസാൽ സ്റ്റേഡിയത്തിലെ പാർക്കിംഗ് സ്ഥലത്ത് 23 കാരനായ സാഗർ ധങ്കറിനെയും സുഹൃത്ത് സോനുവിനെയും മറ്റ് മൂന്ന് പേരെയും കുമാറും കൂട്ടാളികളും മർദ്ദിച്ചു. മർദ്ദനത്തിൽ സാഗർ ധങ്കർ മരണത്തിന് കീഴടങ്ങി.
കുമാറിൻ്റെ ഫ്ലാറ്റ് ഒഴിയുന്നതിൽ സാഗറും സുഹൃത്തും ആദ്യം വിമുഖത കാട്ടിയതും, കുമാർ സാഗറിനെയും സുഹൃത്തിനെയും പേടിച്ചാണ് ഒന്നും പറയാത്തതെന്നുള്ള സംസാരവും സ്റ്റേഡിയത്തിൽ ഉണ്ടായി. ഇത് ഇരുവരും തമ്മിലുള്ള കലഹത്തിന് കാരണമായി. ഇതേതുടർന്ന് രണ്ട് തവണ ഒളിമ്പിക്സ് മെഡൽ ജേതാവിനെ 2021 മെയ് മാസത്തിൽ മുണ്ടിക പ്രദേശത്ത് നിന്ന് ഡൽഹി പോലീസ് അറസ്റ്റ് ചെയ്തു.
മരിച്ച ഗുസ്തി താരം നേരത്തെ ഡൽഹിയിലെ മോഡൽ ടൗണിലെ സുശീൽ കുമാറിന്റെ ഉടമസ്ഥതയിലുള്ള അപ്പാർട്ട്മെന്റിലാണ് താമസിച്ചിരുന്നതെന്ന് പോലീസ് പറഞ്ഞു. ഇത് സുശീല്കുമാറും ജൂനിയർ ഗുസ്തിക്കാരനും തമ്മിലുള്ള തർക്കത്തിന് കാരണമായി. 2022 നവംബറിൽ ഡൽഹി കോടതി എട്ട് ദിവസത്തേക്ക് സുശീൽ കുമാറിന് ഇടക്കാല ജാമ്യം അനുവദിച്ചിരുന്നു.