ഡിസംബർ 4 ന് ഹൈദരാബാദിലെ സന്ധ്യ തിയറ്ററിൽ പുഷ്പ 2 സ്ക്രീനിങ്ങിന് ശേഷമുണ്ടായ തിക്കിലും തിരക്കിലും പെട്ട് പരിക്കേറ്റ കുട്ടിക്ക് മസ്തിഷ്ക മരണം സംഭവിച്ചു. ഗുരുതരമായി പരിക്കേറ്റ ഒമ്പതുവയസ്സുകാരൻ ശ്രീ തേജയുടെ നില ഗുരുതരമായി തുടരുകയാണ്. ഹൈദരാബാദ് സിറ്റി പോലീസ് കമ്മീഷണർ സിവി ആനന്ദും തെലങ്കാന സർക്കാർ ആരോഗ്യ സെക്രട്ടറിയും ശ്രീ തേജയുടെ ആരോഗ്യസ്ഥിതിയെക്കുറിച്ച് അന്വേഷിക്കാൻ സംസ്ഥാന സർക്കാരിനെ പ്രതിനിധീകരിച്ച് ആശുപത്രി സന്ദർശിച്ചു. തിക്കിലും തിരക്കിലും പെട്ട് ശ്വാസം കിട്ടാതെ ശ്രീ തേജയ്ക്ക് മസ്തിഷ്ക മരണം സംഭവിച്ചുവെന്നും ആരോഗ്യം വീണ്ടെടുക്കാൻ ഏറെ സമയമെടുക്കുമെന്നും ഡോക്ടർമാരുമായി കൂടിക്കാഴ്ച്ച നടത്തി കുട്ടിയെ സന്ദർശിച്ച ശേഷം മാധ്യമങ്ങളോട് സംസാരിച്ച കമ്മീഷണർ പറഞ്ഞു.
ഓക്സിജൻ്റെയും മർദ്ദത്തിൻ്റെയും കുറഞ്ഞ പിന്തുണയോടെ ‘മെക്കാനിക്കൽ വെൻ്റിലേഷൻ’ ആവശ്യമായതിനാൽ കുട്ടി പീഡിയാട്രിക് തീവ്രപരിചരണത്തിൽ തുടരുകയാണെന്ന് ആശുപത്രി അധികൃതർ പ്രസ്താവനയിൽ പറഞ്ഞു. വെൻ്റിലേറ്റർ സപ്പോർട്ടിലൂടെയാണ് കുട്ടിയെ ചികിത്സിക്കുന്നതെന്നും ചികിത്സ നീണ്ടുപോകാൻ സാധ്യതയുണ്ടെന്നും ഡോക്ടർമാർ അറിയിച്ചതായി ഉദ്യോഗസ്ഥർ പറഞ്ഞു.
ഡിസംബർ 4ന് നടൻ അല്ലു അർജുൻ പങ്കെടുത്ത പ്രീമിയർ ഷോയ്ക്കിടെ ഹൈദരാബാദിലെ സന്ധ്യ തിയേറ്ററിലാണ് തിക്കും തിരക്കും ഉണ്ടായത്. ദേശീയ അവാർഡ് നേടിയ ‘പുഷ്പ : ദ റൈസ്’ എന്ന ചിത്രത്തിൻ്റെ രണ്ടാം ഭാഗമായ പുഷ്പ 2: ദ റൂളിൻ്റെ പ്രീമിയറിനിടെ തിക്കിലും തിരക്കിലും പെട്ടാണ് ശ്രീ തേജയ്ക്ക് ഗുരുതരമായി പരിക്കേറ്റത്. കുട്ടിയുടെ അമ്മ 39 കാരിയായ രേവതി അന്ന് തന്നെ മരിച്ചിരുന്നു.
നടനെ ഒരു നോക്ക് കാണാൻ തിയേറ്ററിലേക്ക് വൻ ജനക്കൂട്ടം ഇടിച്ചു കയറി. പിന്നാലെതിക്കിലും തിരക്കിലും പെട്ട് രേവതി മരിക്കുകയും മകൻ ശ്രീ തേജയെ ഗുരുതരാവസ്ഥയിൽ ആശുപത്രിയിൽ പ്രവേശിപ്പിക്കുകയുമായിരുന്നു.
സംഭവത്തിൽ അല്ലു അർജുനെ കഴിഞ്ഞ ആഴ്ച അറസ്റ്റ് ചെയ്തിരുന്നു , എന്നാൽ തെലങ്കാന ഹൈക്കോടതി ഇടക്കാല ജാമ്യം അനുവദിച്ചതിനെ തുടർന്ന് ഒരു ദിവസത്തിന് ശേഷം വിട്ടയച്ചു. അതിനിടെ, പ്രീമിയർ ഷോയ്ക്കിടെ വീഴ്ച വരുത്തിയതിന് തിയേറ്റർ മാനേജ്മെൻ്റിന് പോലീസ് കാരണം കാണിക്കൽ നോട്ടീസ് നൽകി.