ആഗോള വാഹന നിർമാതാക്കളായ അശോക് ലെയ്ലാൻഡിൻ്റെ സബ്സിഡിയറിയും ഹിന്ദുജ ഗ്രൂപ്പിൻ്റെ ഭാഗവുമായ മുൻനിര ഇലക്ട്രിക്, കൊമേഴ്സ്യൽ വാഹന നിർമാതാക്കളായ ‘സ്വിച്ച് മൊബിലിറ്റി’ യു.എ.ഇക്കും സൗദി അറേബ്യക്കുമായി സ്വിച്ച് ഇഐവി12, സ്വിച്ച് ഇ1 എന്നീ വേർഷനുകൾ 2025ൽ വാണിജ്യാടിസ്ഥാനത്തിലുള്ള പരീക്ഷണഘട്ടം ആരംഭിക്കും. ഈ ബസുകൾക്ക് ജിസിസിയിൽ നിന്നും, വിശേഷിച്ചും യു.എ.ഇ, സൗദി രാജ്യങ്ങളിൽ നിന്നും നിരവധി അന്വേഷണങ്ങളുണ്ടെന്ന് സ്വിച്ച് മൊബിലിറ്റി ചെയർമാൻ ധീരജ് ഹിന്ദുജ പറഞ്ഞു. 2025 അവസാന പാദ വേനൽ സീസണിൽ ഈ ബസുകൾ ജി.സി.സിയിൽ ലഭ്യമാകുമെന്നും അദ്ദേഹം വ്യക്തമാക്കി.
സ്വിച്ച് ഇഐവി12 ഇന്ത്യയിലും, സ്വിച്ച് ഇ1 യുകെയിലും നിർമിക്കുന്നതാണ്. യൂറോപ്യൻ വിപണിക്കായി നിർമിച്ച ഇ1 ജി.സി.സി ഗവൺമെൻ്റുകൾ തെരഞ്ഞെടുക്കുന്നു. ഇഐവി 12 ജി.സി.സിയിലെ സ്വകാര്യ മേഖലക്ക് താൽപര്യവുമുണ്ട്. മതിയായ ക്രമീകരണങ്ങളായാൽ അശോക് ലെയ്ലാൻഡിൻ്റെ റാസൽഖൈമ പ്ലാൻറിൽ ഇലക്ട്രിക് വാഹനങ്ങൾ നിർമിക്കാനാണുദ്ദേശിക്കുന്നതെന്നും അദ്ദേഹം വ്യക്തമാക്കി.
ഷാസി മൗണ്ടഡ് ബാറ്ററികളോടെയുള്ള സ്വിച്ച് ഇഐവി 12 ഇന്ത്യയിലെ പ്രഥമ ലോ ഫ്ലോർ ഇലക്ട്രിക് സിറ്റി ബസാണ്. 400+കെ.ഡബ്ല്യു.എച്ച് ബാറ്ററി ശേഷിയുള്ള ഈബസ് നേരത്തെ ഹിന്ദുജ ഗ്രൂപ്പ് ചെയർമാൻ അശോക് പി ഹിന്ദുജയുടെ സാന്നിധ്യത്തിൽ ഇന്ത്യയിൽ നടന്ന ചടങ്ങിൽ കേന്ദ്ര ഉപരിതല ഗതാഗത മന്ത്രി നിതിൻ ഗസ്കരിയാണ് പുറത്തിറക്കിയത്. യൂറോപ്യൻ വിപണിക്കായുള്ള ഈ 1 വേർഷൻ്റെ വെർച്വൽ ലോഞ്ചാണ് നടത്തിയത്.
ഇന്ത്യക്കും യൂറോപ്പിനുമായി രണ്ട് ഉൽപ്പന്നങ്ങൾ പുറത്തിറക്കാനായതിൽ അതിയായ സന്തോഷമുണ്ടെന്ന് സ്വിച്ച് മൊബിലിറ്റി സി.ഇ. ഒ മഹേഷ് ബാബു പറഞ്ഞു. ഏറ്റവും നൂതനമായ സാങ്കേതിക, ആർകിടെക്ചർ സൗകര്യങ്ങളോടെയാണ് ഇവ നിർമിക്കുന്നതെന്നും അദ്ദേഹം വ്യക്തമാക്കി. 1,800 ലധികം ഓർഡറുകൾ ഇതിനകം തങ്ങൾക്ക് ലഭിച്ചെന്നും സ്വിച്ച് മൊബിലിറ്റിയുടെ ഉൽപന്നങ്ങളിലെ വമ്പിച്ച വിശ്വാസ്യതയും വിപണി ആത്മവിശ്വാസവുമാണ് ഇതിന് കാരണമെന്നും അദ്ദേഹം അവകാശപ്പെട്ടു.