ലോക്സഭാ ഉപതിരഞ്ഞെടുപ്പിൽ വൻ ഭൂരിപക്ഷത്തിൽ വിജയിപ്പിച്ച വോട്ടര്മാര്ക്ക് നന്ദി പറയുന്നതിനായി പ്രിയങ്ക ഗാന്ധി ഇന്ന് വയനാട്ടിൽ എത്തും. രണ്ട് ദിവസത്തേക്കായിരിക്കും പ്രിയങ്ക ഗാന്ധിയുടെ സന്ദർശനം. 4.10 ലക്ഷത്തിലധികം വോട്ടിന്റെ തകർപ്പൻ ഭൂരിപക്ഷത്തോടെയാണ് പ്രിയങ്ക വയനാട്ടില് വിജയിച്ചത്. കഴിഞ്ഞ ദിവസമാണ് പ്രിയങ്ക എംപിയായി സത്യപ്രതിജ്ഞ ചെയ്തത്. പ്രിയങ്ക ഇതാദ്യമായാണ് എംപിയാകുന്നത്. കേരള സാരിയണിഞ്ഞെത്തിയ പ്രിയങ്ക ഭരണഘടന ഉയർത്തിപ്പിടിച്ചാണ് സത്യവാചകം ചൊല്ലിയത്. റായ്ബറേലി എംപിയായ സഹോദരൻ രാഹുൽ ഗാന്ധി, രാജ്യസഭാ പാർലമെൻ്റ് അംഗമായ അമ്മ സോണിയ ഗാന്ധി എന്നിവരോടൊപ്പമാണ് പ്രിയങ്ക ലോക്സഭയിലെത്തിയത്. തൻ്റെ വിജയത്തിന് ശേഷം, പാർലമെൻ്റിൽ ജനങ്ങളുടെ ശബ്ദമാകാൻ താൻ ആഗ്രഹിക്കുന്നുവെന്ന് പ്രിയങ്ക ഗാന്ധി പറഞ്ഞു.
“നിങ്ങൾ എന്നിൽ അർപ്പിക്കുന്ന വിശ്വാസത്തിന് ഞാൻ നന്ദിയുള്ളവളാണ്. ഈ വിജയം നിങ്ങളുടെ വിജയമാണെന്ന് നിങ്ങൾക്ക് ശരിക്കും തോന്നുന്നുവെന്ന് ഞാൻ ഉറപ്പാക്കും, നിങ്ങളെ പ്രതിനിധീകരിക്കാൻ നിങ്ങൾ തിരഞ്ഞെടുത്ത വ്യക്തി നിങ്ങളുടെ പ്രതീക്ഷകളും സ്വപ്നങ്ങളും മനസിലാക്കുകയും നിങ്ങൾക്കായി പോരാടുകയും ചെയ്യുന്നു. പാർലമെൻ്റിൽ നിങ്ങളുടെ ശബ്ദമാകാൻ ഞാൻ കാത്തിരിക്കുകയാണ്,” അവർ ട്വീറ്റ് ചെയ്തു.
52 കാരിയായ പ്രിയങ്ക ഗാന്ധി വദ്രയുടെ ലോക്സഭയിലേക്കുള്ള പ്രവേശനത്തോടെ, പതിറ്റാണ്ടുകൾക്ക് ശേഷം ആദ്യമായി ഗാന്ധി കുടുംബത്തിലെ മൂന്ന് അംഗങ്ങൾ ഒരേസമയം പാർലമെൻ്റിലെത്തി. പ്രിയങ്ക ഗാന്ധിയും രാഹുൽ ഗാന്ധിയും ലോക്സഭയിൽ ഇരിക്കുമ്പോൾ, 2024 ലെ ലോക്സഭാ തിരഞ്ഞെടുപ്പിൽ റായ്ബറേലിയിൽ നിന്ന് മത്സരിക്കേണ്ടതില്ലെന്ന് തീരുമാനിച്ചതിനെ തുടർന്ന് അമ്മ സോണിയാ ഗാന്ധി രാജ്യസഭയിലാണ് .സോണിയാ ഗാന്ധിക്കും മുത്തശ്ശിക്കും അന്തരിച്ച മുൻ പ്രധാനമന്ത്രി ഇന്ദിരാഗാന്ധിക്കും ശേഷം എംപിയായി സത്യപ്രതിജ്ഞ ചെയ്യുന്ന കുടുംബത്തിലെ മൂന്നാമത്തെ വനിത കൂടിയാണ് പ്രിയങ്ക ഗാന്ധി.
വയനാട്ടിൽ നിന്നും റായ്ബറേലിയിൽ നിന്നും വിജയിച്ച രാഹുൽ ഗാന്ധി തൻ്റെ കുടുംബ കോട്ട നിലനിർത്താൻ തീരുമാനിക്കുകയും വയനാട് ഒഴിയുകയും ചെയ്തിരുന്നു. തുടർന്നാണ് പ്രിയങ്ക ഗാന്ധി വാദ്രയെ വയനാട്ടിൽ നിന്ന് മത്സരിപ്പിച്ചത്. ഉപതിരഞ്ഞെടുപ്പില് 9,57,571 വോട്ടാണ് മണ്ഡലത്തില് ആകെ പോള് ചെയ്തത്. ഫലം വന്നപ്പോൾ 6.22 ലക്ഷം വോട്ടുകൾ നേടി സിപിഎം എതിരാളി സത്യൻ മൊകേരിയെ നാല് ലക്ഷത്തിലധികം വോട്ടുകൾക്ക് പ്രിയങ്ക പരാജയപ്പെടുത്തി. 2024 ലെ തെരഞ്ഞെടുപ്പിൽ രാഹുൽ ഗാന്ധിക്ക് ലഭിച്ചതിനേക്കാൾ ഉയർന്ന ഭൂരിപക്ഷമാണിത്. എല്ഡിഎഫ് സ്ഥാനാര്ത്ഥി സത്യന് മൊകേരിക്ക് ലഭിച്ചത് 2,11,407 വോട്ടാണ്. 1,09,939 വോട്ടുകളാണ് ബി.ജെ.പി സ്ഥാനാർത്ഥിയായിരുന്ന നവ്യ ഹരിദാസിന് ലഭിച്ചത്.