പ്രമുഖ സാമ്പത്തിക വിദഗ്ധനും പ്രധാനമന്ത്രി നരേന്ദ്ര മോദിയുടെ സാമ്പത്തിക ഉപദേശക സമിതി മേധാവിയുമായ ബിബേക് ഡെബ്രോയ് (69) അന്തരിച്ചു. കുടൽ സംബന്ധമായ അസുഖത്തെ തുടർന്ന് ഇന്ന് രാവിലെ 7 മണിക്ക് ഡൽഹിയിലെ എയിംസിൽ വെച്ചായിരുന്നു അന്ത്യം. പത്മശ്രീ അവാർഡ് ജേതാവായ ബിബേക് ഡെബ്രോയ് എഴുത്തുകാരനും കൂടിയാണ്. പ്രധാനമന്ത്രി നരേന്ദ്ര മോദി വിയോഗത്തിൽ അനുശോചനം രേഖപ്പെടുത്തി. മഹാഭാരതവും ഭഗവദ് ഗീതയും ഉൾപ്പെടെയുള്ള ക്ലാസിക്കൽ സംസ്കൃത ഗ്രന്ഥങ്ങൾ വിവർത്തനം ചെയ്തിട്ടുണ്ട്. കൂടാതെ പൂനെയിലെ ഗോഖലെ ഇൻസ്റ്റിറ്റ്യൂട്ട് ഓഫ് പൊളിറ്റിക്സ് ആൻഡ് ഇക്കണോമിക്‌സിൻ്റെ (ജിപിഇ) ചാൻസലറായി സേവനമനുഷ്ഠിച്ചിട്ടുണ്ട്.
കൊൽക്കത്തയിലെ പ്രസിഡൻസി കോളേജ്, ഗോഖലെ ഇൻസ്റ്റിറ്റ്യൂട്ട് ഓഫ് പൊളിറ്റിക്സ് ആൻഡ് ഇക്കണോമിക്സ്, പൂനെ, ഇന്ത്യൻ ഇൻസ്റ്റിറ്റ്യൂട്ട് ഓഫ് ഫോറിൻ ട്രേഡ്, ഡൽഹി എന്നിവിടങ്ങളിൽ അദ്ദേഹം പ്രവർത്തിച്ചിട്ടുണ്ട്. കൂടാതെ നിയമപരിഷ്കാരങ്ങൾ സംബന്ധിച്ച ധനകാര്യ മന്ത്രാലയത്തിൻ്റെ/UNDP പദ്ധതിയുടെ ഡയറക്ടറായും സേവനമനുഷ്ടിച്ചു.