യു.എ.ഇയിൽ പ്രഖ്യാപിച്ച രണ്ടു മാസത്തെ പൊതുമാപ്പ് കാലയളവ് വ്യാഴാഴ്ച അവസാനിക്കും. പൊതുമാപ്പ് കാലയളവിന് ശേഷം അനധികൃത താമസക്കാരെ ജോലിക്ക് നിയമിച്ചാൽ ഉടമകൾക്ക് ഒരു ലക്ഷം മുതൽ 10 ലക്ഷം ദിർഹം വരെ പിഴ ചുമത്തുമെന്ന് ഫെഡറൽ അതോറിറ്റി ഫോർ ഐഡന്‍റിറ്റി, സിറ്റിസൺഷിപ്, കസ്റ്റംസ് ആൻഡ് പോർട്ട് സെക്യൂരിറ്റി (ഐ.സി.പി), ദുബൈയിലെ ജനറൽ ഡയറക്ടറേറ്റ് ഓഫ് റെസിഡൻസി ആൻഡ് ഫോറിനേഴ്സ് അഫയേഴ്സ് (ജി.ഡി.ആർ.എഫ്.എ) എന്നിവർ സംയുക്ത പ്രസ്താവനയിൽ മുന്നറിയിപ്പ് നൽകി. നിയമലംഘനം കണ്ടെത്തിയാൽ അത്തരം കമ്പനികളെ നിരോധിത പട്ടികയിൽ ഉൾപ്പെടുത്തുന്നതോടൊപ്പം വൻ തുക പിഴയും ചുമത്തും. റസിഡൻഷ്യൽ ഏരിയകളിലും ബിസിനസ് സ്ഥാപനങ്ങളിലും പരിശോധന വ്യാപിപ്പിക്കുമെന്ന് ജി.ഡി.ആർ.എഫ്.എ ഇൻവെസ്റ്റിഗേഷൻ അഫയേഴ്സ് ഡെപ്യൂട്ടി അസി. ഡയറക്ടർ കേണൽ അബ്ദുല്ല ആതിഖ് പറഞ്ഞു. അനധികൃത താമസക്കാരെ കണ്ടെത്തുന്നതിനായി രാജ്യവ്യാപകമായി പരിശോധന കർശനമാക്കും. നവംബർ ഒന്നുമുതൽ നിയമലംഘനം കണ്ടെത്തിയാൽ കടുത്ത ശിക്ഷ നേരിടേണ്ടിവരുമെന്ന് അധികൃതർ മുന്നറിയിപ്പ് നൽകി.
പൊതുമാപ്പ് നടപടികൾക്കായി പ്രവാസികൾക്കായി അതിവിപുലമായ സൗകര്യങ്ങളും അധികൃതർ ഒരുക്കിയിരുന്നു. വിസ നിയമം ലംഘിച്ചവർക്ക് പിഴ കൂടാതെ രാജ്യം വിടാനും രേഖകൾ ശരിയാക്കി രാജ്യത്ത് തങ്ങി പുതിയ വിസയിലേക്ക് മാറാനും പൊതുമാപ്പ് കാലയളവിൽ അവസരമൊരുക്കിയിരുന്നു. ഇതോടൊപ്പം, പൊതുമാപ്പ് പ്രയോജനപ്പെടുത്തി രാജ്യം വിട്ടവർക്ക് യു.എ.ഇയിലേക്ക് തിരികെ വരുന്നതിനും തടസ്സമുണ്ടായിരുന്നില്ല. എക്സിറ്റ് പെർമിറ്റ് ലഭിച്ചവർ 14 ദിവസത്തിനുള്ളിൽ രാജ്യം വിടണമെന്നാണ് നിയമമെങ്കിലും പൊതുമാപ്പ് അവസാനിച്ചാലും അത്തരക്കാർക്ക് രാജ്യം വിടാൻ സാവകാശം ലഭിക്കും.
പൊതുമാപ്പ് കാലയളവിൽ രാജ്യത്തെ ഏറ്റവും വലിയ പൊതുമാപ്പ് കേന്ദ്രമായ അൽ അവീർ സെന്ററിലും ദുബായിലെ അമർ സെന്ററുകളിലും വലിയ തിരക്കാണ് അനുഭവപ്പെടുന്നത്. സെപ്റ്റംബർ ഒന്നുമുതലാണ് പദ്ധതിയുടെ ആരംഭം, ഒക്ടോബർ 31-ന് സമാപിക്കുമ്പോൾ ഇന്ത്യക്കാരും മറ്റ് രാജ്യക്കാരും അടക്കം നിരവധി പേരാണ് പദ്ധതി പ്രയോജനപ്പെടുത്തിയത്. വിസ രേഖകൾ ശരിയാക്കി രാജ്യത്ത് തുടരാൻ ആഗ്രഹിക്കുന്ന 4000 വ്യക്തികൾക്ക് ജി.ഡി.ആർ.എഫ്.എ തൊഴിൽ അഭിമുഖങ്ങൾ നടത്തുകയും ഇതിൽനിന്ന് തിരഞ്ഞെടുത്ത 58 പേർക്ക് അവരുടെ യോഗ്യതക്കനുസരിച്ച ജോലി ലഭിക്കുന്നതിനുള്ള നടപടികൾ സ്വീകരിക്കുകയും ചെയ്തിരുന്നു. 22 കമ്പനികളാണ് തൊഴിൽ വാഗ്ദാനം ചെയ്ത് മുന്നോട്ടുവന്നത്.