കോണ്ഗ്രസ് സ്ഥാനാര്ഥി പട്ടിക പ്രസിദ്ധീകരിച്ചതിന് പിന്നാലെ കോൺഗ്രസിൽ പൊട്ടിത്തെറി. തിരുത്തൽ ആവശ്യവുമായി യൂത്ത് കോൺഗ്രസ് നേതാവും സോഷ്യൽ മീഡിയ വിഭാഗം തലവനുമായ ഡോ.പി. സരിന്. പാലക്കാട് സ്ഥാനാർത്ഥിത്വത്തില് തിരുത്തലുകളുണ്ടായില്ലെങ്കില് ഹരിയാന ആവര്ത്തിക്കും. തോറ്റാല് തോല്ക്കുന്നത് രാഹുല് മാങ്കൂട്ടത്തിലല്ല രാഹുല് ഗാന്ധിയാണെന്നും സരിൻ വിമർശിച്ചു. കോണ്ഗ്രസ് സ്ഥാനാർത്ഥി ചര്ച്ച പ്രഹസനമായിരുന്നെന്നും നല്ല തീരുമാനത്തിന് കാത്തിരിക്കുകയാണെന്നും സരിന് വാര്ത്താസമ്മേളനത്തില് പറഞ്ഞു.
സ്ഥാനാർത്ഥി നിർണയത്തിൽ പുനപരിശോധന വേണമെന്ന് എ.ഐ സി.സി നേതൃത്വത്തോട് ആവശ്യപ്പെട്ടിരുന്നു. മല്ലികാർജുൻ ഖർഗെയ്ക്കും രാഹുൽ ഗാന്ധിക്കും കത്ത് അയച്ചിരുന്നു. നേതൃത്വത്തിന് തിരുത്താൻ ഇനിയും സമയമുണ്ടെന്നും സരിൻ പറഞ്ഞു. ഇൻസ്റ്റാഗ്രാമിൽ റീൽസ് ഇട്ടതുകൊണ്ട് മാത്രം ഒന്നും ആവില്ല, സമൂഹത്തിന് വേണ്ടി പ്രവർത്തിക്കണം, അതിന് ജയിലിൽ കിടന്നത് കൊണ്ട് മാത്രം കാര്യമില്ലെന്നും സരിൻ രൂക്ഷ വിമർശിച്ചു.
പാലക്കാട് തോറ്റാൽ തോൽക്കുക രാഹുൽ മാങ്കൂട്ടമല്ല, രാഹുൽ ഗാന്ധിയായിരിക്കുമെന്നും സരിന് പറഞ്ഞു. സി.പി.എം ഒരു കുറ്റിച്ചൂലിനെ നിർത്തിയാലും പ്രവർത്തകർ ജയിപ്പിക്കും. അത് അവരുടെ കെട്ടുറപ്പാണെന്നും സരിന് കൂട്ടിച്ചേര്ത്തു. കോണ്ഗ്രസ് പാർട്ടി നേതൃത്വം കാണിക്കുന്നത് തോന്നിവാസമാണെന്നും സരിൻ കുറ്റപ്പെടുത്തി. പറയാനുള്ളത് പറഞ്ഞിട്ടേ പോകൂവെന്നും സരിൻ വ്യക്തമാക്കി. ലെഫ്റ്റ് അടിക്കുന്ന സ്വഭാമുള്ള ആളല്ല താനെന്നും സരിൻ വിശദമാക്കി. പാർട്ടി തീരുമാനങ്ങളുടെ രീതി മാറിയെന്നും സരിൻ കുറ്റപ്പെടുത്തി. എല്ലാവരും ചേർന്നെടുക്കുന്ന തീരുമാനം അംഗീകരിക്കുമെന്നും സരിൻ വിശദമാക്കി. കോണ്ഗ്രസ് സ്ഥാനാർത്ഥി ആരാണെന്ന് ഉറപ്പായതിന് ശേഷം മറ്റു കാര്യങ്ങള് തീരുമാനിക്കുമെന്നും സരിന് പറഞ്ഞു. കുറച്ച് ആളുകളുടെ താത്പര്യങ്ങള്ക്ക് വഴങ്ങിക്കൊടുത്ത് പാര്ട്ടിയെ വരുതിയിലാക്കാന് ശ്രമിക്കുന്നവരെ തിരുത്തിയില്ലെങ്കില് പാലക്കാട്ട് ഹരിയാന ആവര്ത്തിക്കും. കണ്ണടച്ച് ഇരുട്ടാക്കുന്നവരെ തിരുത്തിയില്ലെങ്കില് വില കൊടുക്കേണ്ടി വരുന്നത് കോണ്ഗ്രസ് പാര്ട്ടിയാണ്. അല്ലെങ്കില് തിരഞ്ഞെടുപ്പ് ഫലം കയ്യില് നിക്കാത്ത സ്ഥിതി വരുമെന്നും സരിൻ മുന്നറിയിപ്പ് നൽകി.