മുസ്ലിം ലീഗിൻ്റെ രാജ്യസഭാ സ്ഥാനാർത്ഥിയായി സുപ്രീം കോടതി അഭിഭാഷകൻ അഡ്വ ഹാരിസ് ബീരാനെ തെരഞ്ഞെടുത്തു. ഇന്ന് മൂന്ന് മണിക്ക് നോമിനേഷൻ കൊടുക്കുമെന്നും ലീഗ് ഉന്നതാധികാര സമിതി യോഗം ചേർന്നാണ് തീരുമാനമെന്നും നേതാക്കൾ വാർത്താ സമ്മേളനത്തിൽ അറിയിച്ചു. സുപ്രീം കോടതി അഭിഭാഷകനായ ഹാരിസ് ബീരാൻ 2011 മുതൽ ഡൽഹി കെഎംസിസി പ്രസിഡൻ്റ് ആണ്. യുപിഎ സര്ക്കാര് സമയത്ത് വിദേശകാര്യ മന്ത്രാലയത്തിന്റെയും, പരിസ്ഥിതി മന്ത്രാലയത്തിന്റെയും അഭിഭാഷകനായിരുന്നു.
രാജ്യസഭാ സ്ഥാനാർത്ഥിത്വവുമായി ബന്ധപ്പെട്ട് വിശദമായ ചർച്ച നടന്നുവെന്ന് പികെ കുഞ്ഞാലിക്കുട്ടി പറഞ്ഞു. എല്ലാ കാര്യങ്ങളും പരിഗണിച്ചാണ് ഹാരിസ് ബീരാനെ തെരഞ്ഞെടുത്തതെന്ന് പാണക്കാട് സാദിഖലി ശിഹാബ് തങ്ങളും പറഞ്ഞു. എറണാകുളം ആലുവ സ്വദേശിയായ ഹാരിസ് ബീരാന് 2011 മുതല് ഡൽഹി കെഎംസിസിയുടെ പ്രസിഡന്റ്, ലോയേഴ്സ് ഫോറം ദേശീയ കണ്വീനർ, മുസ്ലിം ലീഗ് ഭരണഘടനാ സമിതി അംഗം എന്നീ നിലകളിൽ പ്രവർത്തിക്കുന്നു.
പൗരത്വ നിയമഭേദഗതി ഉള്പ്പടെയുള്ള പാര്ട്ടിയുടെ മുഴുവന് കേസുകളും ഡൽഹി കേന്ദ്രീകരിച്ചു സുപ്രീംകോടതിയില് ഏകോപിപ്പിക്കുന്നത് ഹാരിസ് ബീരാനാണ്. ഡൽഹിയിൽ പാര്ട്ടിയുടെ എല്ലാ കാര്യങ്ങളും ഏകോപിപ്പിക്കുന്നതിലും ഹാരിസ് ബീരാന് നിർണായകമായ പങ്കുണ്ട്. ഡൽഹിയിൽ നിർമിക്കുന്ന മുസ്ലിം ലീഗ് ദേശിയ ആസ്ഥാനത്തിന്റെ മേല്നോട്ടവും ഹാരിസ് ബീരാനാണ്. പൗരത്വ വിവേചന കേസ്സിന് പുറമെ പ്രവാസി വോട്ട് അവകാശം സംബന്ധിച്ചുള്ള കേസ്, ഹിജാബ് കേസ്, ലവ് ജിഹാദ് കേസ് (ഹാദിയ), അബ്ദുല് നാസര് മഅദനിയുടെ കേസുകള്, ജേർണലിസ്റ്റ് സിദ്ധിഖ് കാപ്പന്റെ കേസ് തുടങ്ങിയ സുപ്രീം കോടതിയില് വാദിച്ചു.
ഇന്ത്യയില് നിന്നുള്ള ഹജ്ജ് തീര്ത്ഥാടകരുടെ സൗകര്യം മക്കയില് പരിശോധിക്കാന് സുപ്രീം കോടതി നിയോഗിച്ച സമിതിയിലും അംഗമായിരുന്നു. കളമശ്ശേരി രാജഗിരി സ്കൂളില് സ്കൂള് വിദ്യാഭ്യാസവും, എറണാകുളം മഹാരാജാസ് കോളജില് പ്രീഡിഗ്രി വിദ്യാഭ്യാസവും, എറണാകുളം ഗവണ്മെന്റ് ലോ കോളേജില്നിന്നും നിയമബിരുദവും നേടിയ ഹാരിസ് ബീരാൻ 1998ല് അഭിഭാഷകനായി. പ്രശസ്ത അഭിഭാഷകരായ കപില് സിബലിന്റെയും ദുഷ്യന്ത് ദാവേയുടെയും കീഴില് ജോലി ആരംഭിക്കുന്നത്.