പൊന്നാനിയില് യുവാവിനെ ആളുമാറി ജയിലിൽ അടച്ച സംഭവത്തിൽ സ്പെഷ്യല് ബ്രാഞ്ച് ഡി.വൈ.എസ്.പിയോട് ജില്ലാ പൊലീസ് മേധാവി റിപ്പോര്ട്ട് ആവശ്യപ്പെട്ടു. ഗായകൻ കൂടിയായ വെളിയങ്കോട് സ്വദേശി ആലുങ്ങല് അബൂബക്കറിനെയാണ് പോലീസ് ആളുമാറി അറസ്റ്റ് ചെയ്തത്. യഥാര്ത്ഥ പ്രതി ഇയാളല്ലെന്ന് കണ്ട് കോടതി കഴിഞ്ഞ ദിവസമാണ് ഇയാളെ മോചിപ്പിച്ചത്. റിപ്പോര്ട്ട് ലഭിച്ച ശേഷം തുടർ നടപടികളിലേക്ക് കടന്നേക്കും. സംഭവത്തിൽ പൊന്നാനി പൊലീസിന് വീഴ്ച പറ്റിയതായാണ് വിലയിരുത്തല്.
ഭർത്താവ് ജീവനാംശം നൽകുന്നില്ലെന്ന യുവതിയുടെ പരാതിയിലാണ് അബൂബക്കറിനെ പൊന്നാനി പൊലീസ് അറസ്റ്റ് ചെയ്തത്. വടക്കേപുറത്ത് അബൂബക്കർ എന്നയാളിന് പകരം ആലുങ്ങൽ അബൂബക്കറിനെയാണ് പൊലീസ് അറസ്റ്റ് ചെയ്തത്. വടക്കേപുറത്ത് അബൂബക്കർ ഗാർഹിക പീഡന കേസിൽ ശിക്ഷിക്കപ്പെട്ടയാളാണ്. ഇയാളാണെന്ന് കരുതിയാണ് ആലുങ്ങൽ അബൂബക്കറിനെ പൊലീസ് ജയിലിലടച്ചത്. നാലു ദിവസം ആലുങ്ങൽ അബൂബക്കറിന് ജയിലിൽ കിടക്കേണ്ടി വരികയും ചെയ്തു. ഒടുവിൽ ബന്ധുക്കൾ പരാതിയുമായി കോടതിയെ സമീപിച്ചതോടെ അബൂബക്കർ ജയിൽ മോചിതനായി.
തിരൂർ കുടുംബകോടതിയിൽ വടക്കേപ്പുറത്ത് അബൂബക്കറിൻ്റെ ഭാര്യ ആയിശാബി നൽകിയ പരാതിയിലാണ് ആലുങ്ങൽ അബൂബക്കറിനെ പോലീസ് തവനൂർ സെൻട്രൽ ജയിലിൽ അടച്ചത്. തിങ്കളാഴ്ച വൈകുന്നേരം വീട്ടിലെത്തിയ പോലീസ്, ഭാര്യയുടെ പരാതിയിൽ അറസ്റ്റു വാറന്റുണ്ടെന്ന് പറഞ്ഞ് ആലുങ്ങൽ അബൂബക്കറിനെ കൊണ്ടുപോവുകയായിരുന്നു. ഈ അബൂബക്കറിൻ്റെ ഭാര്യയും ചില പ്രശ്നങ്ങളെത്തുടർന്ന് ഭർത്താവിൻ്റെ അടുത്തുനിന്ന് മാറി സ്വന്തംവീട്ടിൽ കഴിയുകയായിരുന്നു. അവരും ഭർത്താവിനെതിരേ പോലീസിൽ പരാതി കൊടുത്തിട്ടുണ്ടായിരുന്നു.
പോലീസ് കൊണ്ടുപോകുമ്പോൾ മാതാവോ അബൂബക്കറിനൊപ്പമുള്ള മക്കളോ വീട്ടിലുണ്ടായിരുന്നില്ല. തിങ്കളാഴ്ച രാത്രി മുഴുവൻ പോലീസ് ലോക്കപ്പിലിട്ട അബൂബക്കറിനെ ചൊവ്വാഴ്ച തിരൂർ കുടുംബകോടതിയിൽ ഹാജരാക്കി. ഭാര്യ നൽകിയ പരാതിയിൽ ചെലവിനു നൽകാനുള്ള വകയിൽ 4,03,000 രൂപ പിഴയടയ്ക്കാൻ കോടതി വിധിച്ചു.
പിഴയൊടുക്കാനാകാത്തതിനാൽ അബൂബക്കറിനെ തവനൂർ സെൻട്രൽജയിലിൽ റിമാൻഡ് ചെയ്തു. പുറത്തിറക്കാൻ ബന്ധുക്കൾ അഭിഭാഷകൻവഴി ശ്രമം തുടങ്ങി. അപ്പോഴാണ് കുടുംബകോടതയിൽനിന്ന് ഏപ്രിൽ 27-ന് പൊന്നാനി എസ്.എച്ച്.ഒ.ക്ക് നൽകിയ വാറൻ്റ് നോട്ടീസിൽ പറയുന്ന അബൂബക്കർ വേറേയാണെന്ന് തിരിച്ചറിയുന്നത്.
തിരിച്ചറിയൽരേഖകൾ ഉൾപ്പെടെ പരിശോധിച്ചു പ്രതിയെന്ന് ബോധ്യപ്പെടുത്തിയിട്ടേ അറസ്റ്റുരേഖപ്പെടുത്താൻ പാടുള്ളൂവെന്നാണ് നിയമം. ആലുങ്ങൽ അബൂബക്കറിനെ അറസ്റ്റുചെയ്തതിലും തുടർന്നുള്ള നടപടിയിലും പോലീസിൽ വീഴ്ചയുണ്ടായതായി ബന്ധുക്കൾ പരാതിപ്പെടുന്നു.