15-മത് ഷാർജ കുട്ടികളുടെ വായനോത്സവത്തിന് തുടക്കമായി. ഷാർജ എക്സ്പോ സെന്ററില് മേയ് 1 മുതൽ 12 വരെയാണ് കുട്ടികളുടെ വായനോത്സവം നടക്കുന്നത്. ഷാർജ ആനിമേഷൻ കോൺഫറൻസിന്റെ രണ്ടാം പതിപ്പിനുംഇന്ന് മുതൽ തുടക്കമായി. പ്രശസ്ത ആനിമേറ്റർമാർ, കലാകാരന്മാർ, എഴുത്തുകാർ, ചിന്തകർ എന്നിവരെ ഒരുമിച്ച് കൊണ്ടുവരുന്ന ഇത്തരത്തിലുള്ള ആദ്യ പരിപാടിയാണിത്. വ്യവസായ പ്രമുഖരും പങ്കെടുക്കും. 25 രാജ്യങ്ങളിൽ നിന്നുള്ള 190 എഴുത്തുകാരും 75 രാജ്യങ്ങളിൽ നിന്നുള്ള 470 പ്രസാധകരും പങ്കെടുക്കും.
അനിമേഷൻ, കാരക്ടർ ക്രിയേഷൻ, കോമിക്സ് പോപ് ആർട് എന്നിവയിൽ പങ്കുചേരാൻ കുട്ടികൾക്ക് അവസരം ലഭിക്കും. ശിൽപശാലകൾ, ചർച്ചകൾ എന്നിവയടക്കം 132 പരിപാടികൾ വായനോത്സവത്തിൽ നടക്കും. 25-ലേറെ ശില്പശാലകളാണ് ഇവിടെ നടക്കുന്നത്. ചൊവ്വാഴ്ചവരെയാണ് ആനിമേഷൻ കോൺഫറൻസ് പ്രവർത്തിക്കുക. യുഎഇയിലെ സ്കൂൾ വിദ്യാർഥികൾ ഉൾപ്പെടെയുള്ളവർ വായനോത്സവത്തിൽ പങ്കെടുക്കും.
യുഎഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ഷെയ്ഖ് ഡോ.സുൽത്താൻ ബിൻ മുഹമ്മദ് അല് ഖാസിമിയുടെ പിന്തുണയോടെ ഫാമിലി അഫയേഴ്സ് സുപ്രീം കൗൺസിൽ ചെയർപേഴ്സൻ ഷെയ്ഖ ജവഹർ ബിൻത് മുഹമ്മദ് അൽ ഖാസിമിയുടെ രക്ഷാകർതൃത്വത്തിലാണ് പരിപാടി സംഘടിപ്പിക്കുന്നത്. ‘വൺസ് അപോൺ എ ഹീറോ’ എന്ന പ്രമേയത്തിൽ നടക്കുന്ന കുട്ടികളുടെ വായനോത്സവത്തിൽ 12 ദിവസവും കുട്ടികൾക്കായി 1,400 കലാ-സാംസ്കാരിക-വിനോദ പരിപാടികൾ അരങ്ങേറും. നാടകങ്ങൾ, പാചക ഷോകൾ, തത്സമയപരിപാടികൾ, എഴുത്തുകാരുമായുള്ള അഭിമുഖം തുടങ്ങിയവയും ഇതിൽ ഉൾപ്പെടും.