ലോക്സഭാ തിരഞ്ഞെടുപ്പിന് മുന്നോടിയായി തമിഴ്നാട്ടിൽ തിരക്കിട്ട നീക്കങ്ങളുമായി ബിജെപി. എഐഎഡിഎംകെയിൽ നിന്ന് പുറത്താക്കപ്പെട്ട ഒ പനീർസെൽവം, എഎംഎംകെ അധ്യക്ഷൻ ടിടിവി ദിനകരൻ എന്നിവരുമായി ബിജെപി നേതാക്കൾ കൂടിക്കാഴ്ച നടത്തി. ചൊവ്വാഴ്ച വൈകിട്ട് ചെന്നൈയിയിലെ ഒരു സ്വകാര്യ ഹോട്ടലിലായിരുന്നു കൂടിക്കാഴ്ച. സീറ്റ് വിഭജന ചർച്ചയിൽ മുതിർന്ന നേതാക്കളായ കിഷൻ റെഡ്ഡി, വികെ സിംഗ് എന്നിവരും ബിജെപിയുടെ മറ്റ് സംസ്ഥാന നേതാക്കളും പങ്കെടുത്തു.
ബിജെപിക്ക് നിരുപാധിക പിന്തുണ നൽകുമെന്നും എൻഡിഎ സഖ്യത്തിൽ ചേരുമെന്നും ടിടിവി ദിനകരൻ രണ്ട് ദിവസം മുമ്പ് വ്യക്തമാക്കിയിരുന്നു. കിഷൻ റെഡ്ഡിയെയും വികെ സിംഗിനെയും നേരത്തെ നഗരത്തിലായിരുന്നപ്പോൾ കാണാൻ കഴിഞ്ഞിരുന്നില്ലെന്ന് യോഗത്തിന് ശേഷം ദിനകരൻ പറഞ്ഞു. ‘ബിജെപി ചിഹ്നത്തിൽ മത്സരിക്കുന്നതുമായി ബന്ധപ്പെട്ട് ഞങ്ങൾക്ക് ഒരു സമ്മർദ്ദവുമില്ല,
ദുഷ്ടശക്തിയായ ഡിഎംകെയെ പരാജയപ്പെടുത്തുക എന്നതാണ് ഞങ്ങളുടെ സഖ്യത്തിന്റെ ലക്ഷ്യം. പ്രധാനമന്ത്രി നരേന്ദ്ര മോദി മൂന്നാം തവണയും അധികാരത്തിൽ തിരിച്ചെത്തുമ്പോൾ, തമിഴ്നാടിന് നല്ല പദ്ധതികൾ ലഭിക്കുമെന്ന് ഞങ്ങൾ വിശ്വസിക്കുന്നു, അതുകൊണ്ടാണ് ഞങ്ങൾ സഖ്യമുണ്ടാക്കിയത്,” ദിനകരൻ പറഞ്ഞു.
സഖ്യത്തിൽ ആരു വലുതെന്നോ ചെറുതെന്നോ തർക്കമില്ലെന്നും ദിനകരൻ പറഞ്ഞു. നേരത്തെ, എൻഡിഎയ്ക്ക് നിരുപാധിക പിന്തുണ നൽകുമെന്ന് ദിനകരൻ പറഞ്ഞപ്പോൾ, ബിജെപിയുമായുള്ള സഖ്യം എഎംഎംകെ സ്ഥിരീകരിച്ചിരുന്നു.