ബിജെപിയിൽ ചേരുമെന്ന പ്രചാരണം ശക്തമാകുന്നതിനിടെ പ്രതികരണവുമായി ദേവികുളം മുൻ എംഎൽഎ എസ് രാജേന്ദ്രൻ . ഇതുവരെ അത്തരത്തിലൊരു തീരുമാനമെടുത്തിട്ടില്ല. പക്ഷേ സിപിഎം സസ്പെൻഷൻ പിൻവലിച്ചില്ലെങ്കിൽ ഒരുപക്ഷേ മറിച്ചുള്ള തീരുമാനം ഉണ്ടാകാം. സിപിഎം അകറ്റി നിർത്തിയാലും പൊതുപ്രവർത്തനം അവസാനിപ്പിക്കില്ല എന്നും അദ്ദേഹം വ്യക്തമാക്കി.
തന്നെ പുറത്ത് നിർത്തുന്നതിന് പിന്നിൽ ചില സിപിഎം പ്രാദേശിക നേതാക്കളാണ്. ഇതുവരെ സസ്പെൻഷൻ നടപടി പിൻവലിക്കാനുള്ള തീരുമാനമാകാത്തതിൽ പ്രതിഷേധമുണ്ട്. ഡൽഹിയിലെത്തി ബിജെപി ദേശീയ നേതാക്കളുമായി ചർച്ച നടത്തിയെന്ന പ്രചരണം തെറ്റാണെന്നും അദ്ദേഹം വ്യക്തമാക്കി.
അതേസമയം നേരത്തെ പി കെ കൃഷ്ണദാസ് അടക്കമുള്ള ബിജെപി നേതാക്കളും തമിഴ്നാട്ടിൽ നിന്നുള്ള ബിജെപി ദേശീയ നേതാവും തന്നെ വന്ന് കണ്ടിരുന്നുവെന്ന് എസ് രാജേന്ദ്രൻ വെളിപ്പെടുത്തി. ഈ വിവരം സിപിഎം സംസ്ഥാന സെക്രട്ടറിയെ എകെജി സെന്ററിലെത്തി തന്നെ അറിയിച്ചിരുന്നു.
ദേവികുളം തിരഞ്ഞെടുപ്പ് വീഴ്ചയില്‍ മുന്‍ എംഎല്‍എ എസ് രാജേന്ദ്രനെതിരെ കടുത്ത നടപടിയാണ് സിപിഎം സ്വീകരിച്ചത്. രാജേന്ദ്രനെ ഒരു വര്‍ഷത്തേക്ക് പാര്‍ട്ടിയില്‍ നിന്ന് പുറത്താക്കാന്‍ ഇടുക്കി ജില്ലാ കമ്മിറ്റി സംസ്ഥാന കമ്മറ്റിക്ക് ശുപാര്‍ശ നല്‍കുകയായിരുന്നു. രാജേന്ദ്രന് വീഴ്ച സംഭവിച്ചെന്ന് രണ്ടംഗ അന്വേഷണ കമ്മീഷന്‍ കണ്ടെത്തിയതിന് പിന്നാലെയാണ് നടപടി. ദേവികുളത്തെ തിരഞ്ഞെടുപ്പ് പ്രചാരണ പ്രവര്‍ത്തനങ്ങളില്‍ നിന്ന് വിട്ടുനിന്നു, ആത്മാര്‍ത്ഥതയോടെ പ്രവര്‍ത്തിച്ചില്ല, വോട്ട് ഭിന്നിപ്പിക്കാന്‍ ശ്രമിച്ചു തുടങ്ങിയ കണ്ടെത്തലുകളാണ് രാജേന്ദ്രന് തിരിച്ചടിയായത്. സ്ഥാനാര്‍ഥിയായി അഡ്വ എ രാജയെ നിശ്ചയിച്ചതിന് പിന്നാലെ പാര്‍ട്ടിക്കെതിരെ മുന്‍ എംഎല്‍എ പ്രവര്‍ത്തിച്ചതായി ആരോപണം ഉയര്‍ന്നതോടെയാണ് അന്വേഷണം പ്രഖ്യാപിച്ചത്.