ഭൂട്ടാൻ പ്രധാനമന്ത്രി ഷെറിംഗ് ടോബ്ഗേ മാർച്ച് 15 മുതൽ 16 വരെ ഇന്ത്യ സന്ദർശിക്കും. പ്രധാനമന്ത്രിയായി വീണ്ടും തിരഞ്ഞെടുക്കപ്പെട്ടതിന് ശേഷമുള്ള അദ്ദേഹത്തിൻ്റെ ആദ്യ ഔദ്യോഗിക വിദേശ യാത്രയാണിത്. ജനുവരി 28 ന് ആണ് ടോബ്ഗേ രണ്ടാം തവണയും പ്രധാനമന്ത്രി സ്ഥാനം ഏറ്റെടുത്തത്.
സന്ദർശന വേളയിൽ പ്രധാനമന്ത്രി നരേന്ദ്ര മോദി ഉൾപ്പെടെയുള്ള ഇന്ത്യൻ ഉദ്യോഗസ്ഥരുമായി കൂടിക്കാഴ്ച നടത്തും. ഉഭയകക്ഷി ബന്ധം ശക്തിപ്പെടുത്തുന്നതിലും ഭൂട്ടാൻ്റെ സമ്പദ്‌വ്യവസ്ഥയെ പുനരുജ്ജീവിപ്പിക്കാൻ ലക്ഷ്യമിട്ടുള്ള സാമ്പത്തിക ഉത്തേജക പദ്ധതിയെക്കുറിച്ചും ടോബ്ഗേ ചർച്ച ചെയ്യും. സാമ്പത്തിക ഉത്തേജക ഫണ്ടുകളുടെ സമാഹരണവും വിഹിതവും ഉൾപ്പെടെയുള്ള ഉഭയകക്ഷി, പ്രാദേശിക വിഷയങ്ങൾ ഇന്ത്യയിലെ ചർച്ചകളിൽ ഉൾപ്പെടുത്തിയേക്കും. ഭൂട്ടാൻ്റെ പ്രാഥമിക വികസന പങ്കാളി എന്ന നിലയിൽ ഇന്ത്യ ഭൂട്ടാൻ്റെ സാമൂഹിക-സാമ്പത്തിക വികസനത്തിൽ നിർണായക പങ്ക് വഹിക്കുന്നുണ്ട്.
ഇന്ത്യയുടെ വിദേശകാര്യ സെക്രട്ടറി വിനയ് മോഹൻ ക്വാത്ര അടുത്തിടെ ഭൂട്ടാൻ സന്ദർശിച്ചിരുന്നു. അന്ന് വികസന പങ്കാളിത്തം, ബഹിരാകാശം, ഊർജം, വ്യാപാരം, സാങ്കേതികവിദ്യ, ജനങ്ങളുമായുള്ള ബന്ധം തുടങ്ങിയ മേഖലകളിൽ ബഹുമുഖ സഹകരണത്തിന് ഊന്നൽ നൽകി വിവിധ വിഷയങ്ങളിൽ ചർച്ചകളിൽ ഏർപ്പെടുകയും ചെയ്തു. തോബ്‌ഗേയുടെ നേതൃത്വത്തിൽ ഭൂട്ടാൻ സർക്കാർ അടുത്തിടെ സാമ്പത്തിക മാന്ദ്യം പരിഹരിക്കുന്നതിനും ടൂറിസം, സാങ്കേതികവിദ്യ, ചെറുകിട ബിസിനസുകൾ എന്നിവയുൾപ്പെടെ വിവിധ മേഖലകളെ ശക്തിപ്പെടുത്തുന്നതിനുമായി ഇന്ത്യയുടെ പിന്തുണയോടെ 15 ബില്യൺ സാമ്പത്തിക ഉത്തേജക പാക്കേജ് പ്രഖ്യാപിച്ചിരുന്നു. ഫെബ്രുവരി 29 ന് തിംഫുവിൽ വച്ച് പ്രധാനമന്ത്രി ടോബ്ഗേയാണ് പ്രഖ്യാപനം നടത്തിയത്.
ഭൂട്ടാൻ്റെ സാമ്പത്തിക വെല്ലുവിളികളുടെയും ചൈന ഉൾപ്പെടുന്ന ജിയോപൊളിറ്റിക്കൽ ഡൈനാമിക്സിൻ്റെയും പശ്ചാത്തലത്തിൽ ടോബ്ഗേയുടെ സന്ദർശനത്തിന് പ്രത്യേക പ്രാധാന്യമുണ്ട്. ഭൂട്ടാനും ചൈനയും തമ്മിലുള്ള അതിർത്തി തർക്കവുമായി ബന്ധപ്പെട്ട് നടന്നുകൊണ്ടിരിക്കുന്ന ചർച്ചകളോടൊപ്പമാണ് ടോബ്ഗേയുടെ സന്ദർശനം എന്നത് ശ്രദ്ധേയമാണ്. ഇത് പ്രാദേശിക സുരക്ഷയുടെ പ്രത്യാഘാതങ്ങൾ കാരണം ഇന്ത്യ സൂക്ഷ്മമായി നിരീക്ഷിക്കുകയാണ്. ഈ സന്ദർശനം ഇന്ത്യയുമായുള്ള ബന്ധം പുനഃസ്ഥാപിക്കുന്നതിനും മേഖലയിലെ സ്ഥിരതയും സമൃദ്ധിയും ഉറപ്പാക്കുന്നതിനും അതിൻ്റെ സാമ്പത്തികവും ഭൗമരാഷ്ട്രീയവുമായ വെല്ലുവിളികളെ അഭിമുഖീകരിക്കുന്നതിനുള്ള തന്ത്രങ്ങൾ ചർച്ച ചെയ്യുന്നതിനും ഭൂട്ടാന് അവസരമൊരുക്കും