കൊച്ചി മെട്രോ സര്വ്വീസ് തൂപ്പൂണിത്തുറ വരെ നീട്ടി. കൊച്ചി മെട്രോയുടെ ഒന്നാം ഘട്ടത്തിലെ അവസാന സ്റ്റേഷനായ തൃപ്പൂണിത്തുറ ടെർമിനൽ പ്രധാനമന്ത്രി നരേന്ദ്ര മോദി നാടിന് സമര്പ്പിച്ചു. രാവിലെ പത്തിന് കൊല്ക്കത്തയില് നിന്ന് ഓണ്ലൈനായി പ്രധാനമന്ത്രി മെട്രോ ഫ്ലാഗ് ഓഫ് ചെയ്തു.ആലുവ മുതല് തൃപ്പൂണിത്തുറ വരെ 25 സ്റ്റേഷനുകളുമായി 28.2 കിലോമീറ്റര് ദൂരമാണ് കൊച്ചി മെട്രോയുടെ ഒന്നാം ഘട്ടത്തില് പൂര്ത്തിയായത്. ആകെ ചെലവ് 7377 കോടി രൂപയാണ്. ഉദ്ഘാടനശേഷം തൃപ്പൂണിത്തുറയില് നിന്ന് ഭിന്നശേഷിയുള്ള കുട്ടികളുമായി ആദ്യ ട്രെയിന് ആലുവയിലേക്ക് പുറപ്പെട്ടു. ആദ്യ ട്രെയിന് പുറപ്പെട്ടതിന് ശേഷം പൊതുജനങ്ങള്ക്കായുള്ള സര്വീസ് ആരംഭിച്ചു. ഇതോടെ തൃപ്പൂണിത്തുറയില് നിന്നും കൊച്ചി നഗരത്തിലേക്കുള്ള യാത്ര ഇനി സുഗമമാകും.
രാവിലെ പത്തിന് കൊൽക്കത്തയിൽ നിന്നാണ് ഓൺലൈനായി പ്രധാനമന്ത്രി മെട്രോ ഫ്ലാഗ് ഓഫ് ചെയ്തത്.
കൊച്ചി മെട്രോ നെടുമ്പാശ്ശേരി ഗിഫ്റ്റ് സിറ്റി വരെ വികസിപ്പിക്കാൻ ആലോചനയുണ്ടെന്ന് ചടങ്ങില് പങ്കെടുത്ത മന്ത്രി പി രാജീവ് അറിയിച്ചു. മെട്രോ ടെർമിനൽ തൃപ്പൂണിത്തുറയുടെ വികസനത്തിന് സഹായം നൽകും. തൃപ്പൂണിത്തുറ ഒരു ടൂറിസം കേന്ദ്രമായി വികസിക്കണം. അടുത്തവർഷം മുതൽ തൃപ്പൂണിത്തുറ അത്തച്ചമയം സർക്കാർ പരിപാടിയായി നടത്താൻ ആലോചനയുണ്ടെന്നും മന്ത്രി പറഞ്ഞു