കേന്ദ്രവുമായുള്ള മൂന്നാമത്തെ ചർച്ച നടക്കാനിരിക്കെ പഞ്ചാബിലെ റെയിൽപാളം തടഞ്ഞ് കർഷകർ. കർഷക പ്രതിഷേധം കണക്കിലെടുത്ത് ഹരിയാന സർക്കാർ ഫെബ്രുവരി 16 രാത്രി വരെ പഞ്ചാബിൻ്റെ അതിർത്തിയിൽ ഇൻ്റർനെറ്റ് സേവനങ്ങൾ നിർത്തിവച്ചിരിക്കുകയാണ്. കണ്ണീർവാതക ഷെല്ലാക്രമണം നിർത്തുന്നത് വരെ കേന്ദ്ര സർക്കാരുമായി ചർച്ച തുടരില്ലെന്ന് കർഷക നേതാവ് ജഗ്ജിത് സിംഗ് ദല്ലേവാൾ പറഞ്ഞിരുന്നു. തിങ്കളാഴ്ച രാത്രി വൈകിയും കർഷക നേതാക്കളും കേന്ദ്രമന്ത്രിമാരും തമ്മിൽ നിർണായക ചർച്ച നടത്തിയിരുന്നു. എന്നാലിത് തീരുമാനമാകാതെ പിരിഞ്ഞതിനെ തുടർന്ന് 200-ലധികം കർഷക സംഘടനകൾ ‘ഡൽഹി ചലോ’ പ്രതിഷേധ മാർച്ചുമായി മുന്നോട്ട് പോകാൻ തീരുമാനിക്കുകയായിരുന്നു.
ആയിരക്കണക്കിന് കർഷകർ തങ്ങളുടെ പ്രതിഷേധവുമായി മുന്നോട്ട് പോകുമെന്ന് പ്രതിജ്ഞയെടുക്കുന്ന ‘ഡൽഹി ചലോ’ മാർച്ചിനിടെ കേന്ദ്രവുമായി കർഷക നേതാക്കൾ മൂന്നാം വട്ട ചർച്ചയ്ക്ക് തയ്യാറെടുക്കുകയാണ്. കേന്ദ്രമന്ത്രിമാരായ അർജുൻ മുണ്ട, പിയൂഷ് ഗോയൽ, നിത്യാനന്ദ് റായ് എന്നിവർ പ്രതിഷേധിക്കുന്ന കർഷക സംഘടനകളുടെ പ്രതിനിധികളുമായി ഇന്ന് വൈകിട്ട് വീഡിയോ കോൺഫറൻസിങ് വഴി കൂടിക്കാഴ്ച നടത്തും. മുമ്പ് നടത്തിയ കൂടിക്കാഴ്ചകൾ ഫലം കാണാത്തതിനെ തുടർന്നാണ് ഫെബ്രുവരി 13 ചൊവ്വാഴ്ച പ്രതിഷേധ മാർച്ച് ആരംഭിക്കാൻ കർഷകർ തീരുമാനിച്ചത്. അതേസമയം പ്രധാനമായും പഞ്ചാബ്, ഹരിയാന എന്നിവിടങ്ങളിൽ നിന്നുള്ള ആയിരക്കണക്കിന് കർഷകരാണ് രാജ്യതലസ്ഥാനം ലക്ഷ്യമിട്ട് മാർച്ച് നടത്തുന്നത്. വിളകൾക്ക് മിനിമം താങ്ങുവില (എംഎസ്പി) സംബന്ധിച്ച നിയമം, വായ്പ എഴുതിത്തള്ളൽ എന്നിവ ഉൾപ്പെടെയുള്ള ആവശ്യങ്ങൾക്കായി കേന്ദ്ര സർക്കാരിൽ സമ്മർദ്ദം ചെലുത്താനാണ് ഈ ‘ഡൽഹി ചലോ’ പ്രക്ഷോഭം.
ഡൽഹിയിലുടനീളം സുരക്ഷാ മുന്നൊരുക്കങ്ങൾ ശക്തമാക്കിയിട്ടുണ്ട്. കർഷകരെ നേരിടാൻ ഹരിയാന പോലീസ് പൂർണ സജ്ജമാണ്. 64 കമ്പനി അർധസൈനിക വിഭാഗത്തെയും 50 കമ്പനി സംസ്ഥാന പൊലീസിനെയും സംസ്ഥാനത്തെ വിവിധ സ്ഥലങ്ങളിലായി വിന്യസിച്ചിട്ടുണ്ട്. പഞ്ചാബ്-ഹരിയാന അതിർത്തിയായ ശംഭുവിൽ പ്രതിഷേധക്കാരെ പിരിച്ചുവിടാൻ പോലീസ് ജലപീരങ്കിയും കണ്ണീർ വാതകവും പ്രയോഗിച്ചതോടെ കർഷകരും മാധ്യമപ്രവർത്തകരും ഉൾപ്പെടെ 60-ലധികം പേർക്ക് പരിക്കേറ്റിരുന്നു. ഒരു ഡിഎസ്︋പി റാങ്കിലുള്ള ഉദ്യോഗസ്ഥനും ഇക്കൂട്ടത്തിലുണ്ട്. ശംഭു അതിർത്തിയിൽ 15 സൈനികർക്കും ജിന്ദിൽ ഒൻപത് സൈനികർക്കും പരിക്കേറ്റെന്നാണ് വിവരം.