ജനപക്ഷം നേതാവ് പി സി ജോർജ് ബിജെപിയിലേക്ക്. ഇന്ന് വൈകീട്ട് കേന്ദ്ര നേതൃത്വവുമായി ചർച്ച നടത്തും. അതേ സമയം മുന്നണി എന്ന നിലയിൽ സഹകരിക്കണോ ജനപക്ഷം പിരിച്ചു വിട്ട് ബിജെപിയിൽ ചേരണോ എന്ന കാര്യത്തിൽ അന്തിമ തീരുമാനം ആയിട്ടില്ലെന്ന് ജോർജ് വ്യക്തമാക്കി. പി സി ജോർജ് സംഘടനയിൽ അംഗത്വം എടുക്കണമെന്ന നിലപാടിലാണ് ബിജെപി. പാര്‍ട്ടിയായ ജനപക്ഷം ബിജെപിയില്‍ ലയിച്ചേക്കുമെന്നും റിപ്പോര്‍ട്ടുകള്‍ പുറത്തുവരുന്നു. കഴിഞ്ഞ കുറേനാളായി എന്‍ഡിഎയ്ക്ക് ഒപ്പം പോകുന്ന ജനപക്ഷം ബിജെപിയുടെ ഭാഗമായേക്കും എന്നാണ് വിവരം.
നേരത്തേ ഇടതുമുന്നണിയിലും യുഡിഎഫിലും മാറിമാറി ഭാഗഭാക്കായിരുന്ന പി.സി.ജോര്‍ജ്ജിന്റെ പാര്‍ട്ടിയെ കഴിഞ്ഞ കുറേനാളായി രണ്ടു മുന്നണികളും സ്വീകരിക്കാത്ത സാഹചര്യമുണ്ടായിരുന്നു. തുടര്‍ന്നാണ് എന്‍ഡിഎയുടെ ഭാഗമായി ജനപക്ഷം പാര്‍ട്ടിയുമായി പി.സി.ജോര്‍ജ്ജ് മുമ്പോട്ട് പോയത്. എന്നാല്‍ മുന്നണിയില്‍ ജനപക്ഷവുമായി നില്‍ക്കുന്നതിലെ വിശ്വാസ്യതയെ ബിജെപിയിലെ സംസ്ഥാനനേതാക്കള്‍ ചോദ്യം ചെയ്യുകയും പി.സി.ജോര്‍ജ്ജ് ബിജെപിയില്‍ അംഗത്വം എടുക്കണമെന്ന നിലപാട് കന്ദ്രനേതൃത്വത്തിന് കൈമാറുകയും ചെയ്തതായിട്ടാണ് വിവരം.
ഇന്ന് ഉച്ചയ്ക്ക് ശേഷം ബിജെപി നേതാക്കളുമായി പി.സി.ജോര്‍ജ്ജും മകന്‍ ഷോണ്‍ജോര്‍ജ്ജും ഡല്‍ഹിയില്‍ ചര്‍ച്ച നടത്തും. മുന്‍ പൂഞ്ഞാര്‍ എംഎല്‍എയും ജനപക്ഷം പാര്‍ട്ടി തലവനുമായ പി.സി. ജോര്‍ജ്ജ് ബിജെപിയിൽ ചേർന്നാൽ ബിജെപി സ്ഥാനാര്‍ത്ഥിയായി പത്തനംതിട്ടയില്‍ മത്സരിച്ചേക്കാനും സാധ്യതയുണ്ട്.
ജനപക്ഷം പാര്‍ട്ടിയെ എന്‍ഡിഎ ഘടകകക്ഷിയാക്കി പത്തനംതിട്ട ലോക്സഭ സീറ്റില്‍ സ്ഥാനാര്‍ഥിയാവുകയായിരുന്നു ജോര്‍ജിന്‍റെ ലക്ഷ്യം എന്നും പലകുറി സംസ്ഥാന ബിജെപി നേതാക്കളുമായി ജോര്‍ജ് ചര്‍ച്ചയും നടത്തി എന്നും റിപോർട്ടുകൾ ഉണ്ട് . എന്നാല്‍ ഘടകകക്ഷിയായി മുന്നണിയില്‍ എടുത്താല്‍ ജോര്‍ജ് കൂറുമാറുമോ എന്ന ആശങ്ക സംസ്ഥാന ബിജെപി നേതൃത്വം കേന്ദ്ര നേതൃത്വത്തെ അറിയിക്കുകയായിരുന്നു.