ലോകസ്ഭാ തിരഞ്ഞെടുപ്പിന് മുന്നോടിയായി സംസ്ഥാനത്ത് അന്തിമവോട്ടര്‍ പട്ടിക പ്രസിദ്ധീകരിച്ചു. സംസ്ഥാനം തെരഞ്ഞെടുപ്പിന് തയാറാണെന്ന് മുഖ്യതിരഞ്ഞെടുപ്പ് ഓഫിസർ സഞ്ജയ് എം.കൗൾ വാർത്താ സമ്മേളനത്തിൽ അറിയിച്ചു. ആകെ 2,70,99,326 വോട്ടർമാർ ആണ് ഉള്ളത്. സ്ത്രീ വോട്ടർമാർ – 1,39,96,729. പുരുഷ വോട്ടർ- 1,31,02,288 എന്നിങ്ങനെയാണ് കണക്കുകൾ. ഭിന്നലിംഗം- 309. പ്രവാസി വോട്ടർ- 88,223. പട്ടികയില്‍ 5,74,175 പേര് പുതിയ വോട്ടര്‍മാരാണ്.
ആകെ വോട്ടര്‍മാരിൽ ഏറ്റവും കൂടുതല്‍ വോട്ടര്‍മാര്‍ മലപ്പുറം ജില്ലയിലാണ്. 32,79,172 ആണ് ജില്ലയിലുള്ളത്. കുറവ് വോട്ടര്‍മാരുള്ള ജില്ല–വയനാട് (6,21,880). കൂടുതൽ സ്ത്രീ വോട്ടര്‍മാരുള്ള ജില്ല–മലപ്പുറം (16,38,971). പ്രവാസി വോട്ടർമാർ കൂടുതലുള്ള ജില്ല–കോഴിക്കോട് (34,909) ആണ്. 3.75 ലക്ഷം പേരെ പട്ടികയിൽ നിന്ന് ഒഴിവാക്കി. പോളിങ് സ്റ്റേഷൻ – 25,177. സ്ത്രീ പുരുഷ അനുപാതം–1068. അന്തിമവോട്ടര്‍ പട്ടിക പ്രസിദ്ധീകരിച്ചെങ്കിലും ഇനിയും പട്ടികയില്‍ പേര് ചേര്‍ക്കാന്‍ അപേക്ഷിക്കാമെന്ന് ചീഫ് ഇലക്ടറല്‍ ഓഫീസര്‍ അറിയിച്ചു
അന്തിമ വോട്ടർ പട്ടികയിൽ പേരു ചേർക്കാൻ കഴിയാതെ പോയവർക്ക് തിരഞ്ഞെടുപ്പിനു മുൻപുവരെ അപേക്ഷ സമർപ്പിക്കാം. അന്തിമ വോട്ടർ പട്ടിക മുഖ്യ തിരഞ്ഞെടുപ്പ് ഓഫിസറുടെ വെബ് സൈറ്റിൽ (www.ceo.kerala.gov.in) ലഭ്യമാണ്.
ലോക്‌സഭാ തിരഞ്ഞെടുപ്പിന് മുന്നോടിയായി സമ്മതിദായകരെ വോട്ട് ചെയ്യേണ്ടതിന്റെ പ്രാധാന്യത്തെക്കുറിച്ച് ബോധവത്കരിക്കുന്നതിനും വോട്ടിംഗ് മെഷിനുകള്‍ പരിചയപ്പെടുത്തുന്നതിനുമായി വോട്ട് വണ്ടി പര്യടനം തുടങ്ങി. സംസ്ഥാനത്തെ 140 നിയമസഭാ മണ്ഡലങ്ങളിലും പര്യടനം നടത്തുന്ന ‘വോട്ട് വണ്ടി’ യുടെ യാത്ര സംസ്ഥാന ചീഫ് ഇലക്ടറല്‍ ഓഫീസര്‍ സഞ്ജയ് കൗള്‍ ഫ്ലാഗ് ഓഫ് ചെയ്തു