ഗുരുവായൂരിൽ പ്രധാനമന്ത്രിയുടെ സന്ദർശനം കണക്കിലെടുത്ത് ഇന്ന് നടക്കേണ്ട വിവാഹങ്ങൾ രാവിലെ ആറ് മണിക്ക് മുമ്പും ഒമ്പത് മണിക്ക് ശേഷവുമായി പുനഃക്രമീകരിച്ചിരുന്നു. എന്നിരുന്നാലും ക്ഷേത്രത്തിലെ കല്യാണമണ്ഡപത്തിൽ ഇന്ന് നടക്കാനിരുന്ന 77 വിവാഹങ്ങളും മുടക്കമില്ലാതെ നടന്നു. ഇതിൽ 33 എണ്ണം രാവിലെ 6 മണിക്ക് മുൻപേ നടന്നുവെന്നാണ് റിപ്പോർട്ട്.
പ്രധാനമന്ത്രി നരേന്ദ്രമോദി ഗുരുവായൂരിൽ എത്തുന്ന ഇന്ന് ക്ഷേത്രസന്നിധിയിൽ കൂടുതൽ വിവാഹങ്ങൾ നടത്താനായി നിശ്ചയിച്ചിരുന്നു. മലയാളമാസമായ മകരത്തിലെ ശുഭമുഹൂർത്തങ്ങളിലൊന്നാണ് ഇന്നത്തേത്. കഴിഞ്ഞ ദിവസം രാത്രി വഴിപാടുകൗണ്ടറുകൾ അടയ്ക്കുന്നതുവരെ 77 വിവാഹങ്ങളാണ് ശീട്ടാക്കിയിരുന്നത്. രാവിലെ അഞ്ചുമണി മുതൽ ഏഴുവരെ 23 വിവാഹങ്ങൾ നടത്താനാണ് നിശ്ചയിച്ചിരുന്നു. ഏഴുമുതൽ ഒമ്പതുവരെ 11 വിവാഹങ്ങളാണ് ശീട്ടാക്കിയത്. ഈ സമയത്തിനുള്ളിലാണ് പ്രധാനമന്ത്രിയുടെ വരവ്. ഇത് കണക്കിലെടുത്താണ് വിവാഹങ്ങൾ രാവിലെ ആറ് മണിക്ക് മുമ്പും ഒമ്പത് മണിക്ക് ശേഷവുമാക്കിയത്.
രാവിലെ 9 മുതൽ 10 വരെയുള്ള സമയം 18 വിവാഹങ്ങളാണ് നടന്നത്. പ്രധാനമന്ത്രിയുടെ ക്ഷേത്രദർശനസമയം ക്ഷേത്രത്തിൽ അത്യാവശ്യം വേണ്ട ജീവനക്കാരേ ഉണ്ടായിരുന്നുള്ളു. നാലമ്പലത്തിൽ തന്ത്രി ചേന്നാസ് ദിനേശൻ നമ്പൂതിരിപ്പാട്, മേൽശാന്തി ശ്രീനാഥ് നമ്പൂതിരി, ഓതിക്കൻ, ആവശ്യമുള്ള കീഴ്ശാന്തിക്കാർ, ഗണപതി, ഭഗവതി, അയ്യപ്പൻ എന്നീ ഉപദേവകോവിലുകളിൽ കീഴ്ശാന്തിക്കാരും അത്യാവശ്യമുള്ള പരിചാരകന്മാർ എന്നിവർ മാത്രമേ ഉണ്ടായിരുന്നുള്ളു.