മണിപ്പൂരില് തീവ്രവാദികള് നടത്തിയ ആക്രമണത്തില് നാല് പോലീസ് കമാന്ഡോകള്ക്കും ഒരു അതിര്ത്തി രക്ഷാ സേന ജവാനും പരിക്ക്. മ്യാന്മര് അതിര്ത്തിയോട് ചേര്ന്നുള്ള മോറെയിലാണ് സംഭവം. പോലീസ് കമാന്ഡോകളുടെ വാഹനവ്യൂഹത്തിന് നേരെ തോക്കുധാരികളായ തീവ്രവാദികള് ആക്രമണം നടത്തുകയായിരുന്നു. സുരക്ഷാ സേന തിരച്ചില് നടത്തുന്നതിനിടെ കമാന്ഡോകള്ക്ക് നേരെ അക്രമികള് വെടിയുതിര്ത്തു. ആക്രമണത്തില് പരിക്കേറ്റ സുരക്ഷാ ഉദ്യോഗസ്ഥരെ അസം റൈഫിള്സ് ആശുപത്രിയില് പ്രവേശിപ്പിച്ചു.
തിങ്കളാഴ്ചയുണ്ടായ ഏറ്റുമുട്ടലിന് പിന്നാലെ തൗബാല്, ഇംഫാല് വെസ്റ്റ് ജില്ലകളില് വീണ്ടും കര്ഫ്യൂ ഏര്പ്പെടുത്താന് സംസ്ഥാന സര്ക്കാര് തീരുമാനിച്ചിരുന്നു.തൗബാല് ജില്ലയിലെ ലിലോങില് സായുധരായ അക്രമികളും നാട്ടുകാരും തമ്മില് നടന്ന ഏറ്റുമുട്ടലില് നാല് സാധാരണക്കാര് കൊല്ലപ്പെട്ടതിന്റെ പിറ്റേന്നാണ് പുതിയ സംഭവം. സംഭവത്തില് കൊല്ലപ്പെട്ട നാല് പേരുടെയും മൃതദേഹങ്ങള് ഇനിയും കണ്ടെത്താനായിട്ടില്ല.
നിരന്തരമായ അക്രമ സംഭവങ്ങൾക്ക് പിന്നാലെ, മണിപ്പൂര് മുഖ്യമന്ത്രി എന് ബിരേന് സിംഗ് സമാധാന ആഹ്വാനവുമായി രംഗത്തെത്തി. ഇനി ഒരു അക്രമവും’ ഉണ്ടാക്കരുതെന്നും പ്രദേശത്ത് സമാധാനം നിലനിര്ത്തണമെന്നും അദ്ദേഹം ലിലോംഗ് നിവാസികളോട് അഭ്യര്ത്ഥിച്ചു. കുറ്റക്കാര്ക്കെതിരെ കര്ശന നടപടി സ്വീകരിക്കും. സംഭവത്തെ സംസ്ഥാന സര്ക്കാര് നിസാരമായി എടുക്കില്ലെന്നും കുറ്റവാളികളെ പിടികൂടാന് കൂടുതല് പോലീസിനെ പ്രദേശത്ത് വിന്യസിക്കുമെന്നും അദ്ദേഹം പറഞ്ഞു.
പട്ടിക വര്ഗ്ഗ മെയ്തേയ് സമുദായത്തിന്റെ ആവശ്യത്തിനെതിരെ പ്രതിഷേധിച്ച് സംസ്ഥാനത്തെ മലയോര ജില്ലകളില് ‘ആദിവാസി ഐക്യദാര്ഢ്യ മാര്ച്ച്’ സംഘടിപ്പിച്ചതിന് പിന്നാലെയാണ് അക്രമം ആരംഭിച്ചത്. റിസര്വ് വനഭൂമിയില് നിന്ന് കുക്കി ഗ്രാമവാസികളെ കുടിയൊഴിപ്പിക്കുന്നതിനെച്ചൊല്ലി സംഘർഷം ശക്തമായി. 2023 മെയ് 3 മുതല് ആരംഭിച്ച സംഘര്ഷം ഇപ്പോഴും തുടരുകയാണ്. വംശീയ സംഘര്ഷങ്ങളില് 180-ലധികം പേര് ഇതുവരെ കൊല്ലപ്പെട്ടു. സംസ്ഥാനത്തെ സാധാരണ നിലയിലേക്ക് കൊണ്ടുവരാന് 10,000 സൈനികരെയും അര്ദ്ധ സൈനികരെയും വിന്യസിക്കേണ്ടിവന്നു. മണിപ്പൂരിലെ ജനസംഖ്യയുടെ 53 ശതമാനത്തോളം വരുന്ന മെയ്തേയ വിഭാഗക്കാര് ഇംഫാല് താഴ്വരയിലാണ് കൂടുതലും താമസിക്കുന്നത്. ജനസംഖ്യയുടെ 40 ശതമാനവും വരുന്ന ഗോത്രവര്ഗ്ഗക്കാരായ നാഗകളും കുക്കികളും മലയോര ജില്ലകളില് താമസിക്കുന്നത്.