കൊല്ലം ഓയൂരിൽ കുട്ടിയെ തട്ടികൊണ്ടു പോയ സംഭവത്തിന് പിന്നിൽ വൻ ഗൂഢാലോചനയെന്ന് പൊലീസ്. . ഓയൂരിൽ കുട്ടിയെ തട്ടിക്കൊണ്ടുപോയ കേസിൽ ഒരാളെ പോലീസ് കസ്റ്റഡിയിലെടുത്തു. ചിറക്കര സ്വദേശിയെയാണ് കസ്റ്റഡിയിലെടുത്തത്. കാർ വാടകയ്ക്ക് കൊടുത്തത് ഇയാളാണെന്ന സംശയത്തെ തുടർന്നാണ് ഇന്നലെ യുവാവിനെ കസ്റ്റഡിയിലെടുത്തത്. ഇയാളുടെ മൊഴിയിൽ വൈരുദ്ധ്യങ്ങളുണ്ടെന്നാണ് പുറത്തുവരുന്ന റിപ്പോർട്ട്. നിലവിൽ ഇയാൾ പൊലീസ് കസ്റ്റഡിയിൽ തുടരുകയാണ്.
അതേസമയം കുട്ടിയെ തട്ടിക്കൊണ്ടുപോയ കാറിന് ഒന്നിലധികം വ്യാജ നമ്പറുകളുണ്ടെന്നാണ് വിവരം. ഒരേ റൂട്ടിൽ പല നമ്പർ പ്ലേറ്റുകൾ വച്ച് കാർ ഓടിച്ചുവെന്നാണ് വിവരം. കുട്ടിയെ ആശ്രാമം മൈതാനത്തെത്തിച്ച ഓട്ടോയുടെ വിവരങ്ങളും പുറത്ത് വന്നിട്ടുണ്ട്.
കേസിൽ ഇന്ന് വീണ്ടും കുട്ടിയുടെ അച്ഛന്റെ മൊഴിയെടുക്കും. അന്വേഷണത്തിന്റെ ഭാഗമായുണ്ടായ സംശയങ്ങൾക്കും വൈരുദ്ധ്യങ്ങൾക്കും വ്യക്തത വരുത്താനാണ് പോലീസ് ശ്രമിക്കുന്നത്. സംശയമുള്ളവരെ കസ്റ്റഡിയിലെടുത്ത് ചോദ്യം ചെയ്യുന്നതും സിസിടിവി ശേഖരണവും വാഹന പരിശോധനയും തുടരും. പ്രതികൾക്കായി ജില്ലയ്ക്ക് പുറത്തും അന്വേഷണം നടത്തുന്നുണ്ട്. കുട്ടിയുടെ അച്ഛൻ താമസിച്ചിരുന്ന പത്തനംതിട്ട നഗരത്തിലെ ഫ്ലാറ്റിൽ പ്രത്യേക പൊലീസ് സംഘം ഇന്നലെ പരിശോധന നടത്തിയിരുന്നു. റെജി ഉപയോഗിച്ചിരുന്ന ഒരു ഫോൺ ഈ ഫ്ലാറ്റിലുണ്ടായിരുന്നു. അതും പോലീസ് കസ്റ്റഡിയിലെടുത്തിട്ടുണ്ട്. നഗരത്തിലെ സ്വകാര്യ ആശുപത്രിയിലെ ജീവനക്കാരനാണ് റെജി. ഇയാൾ യുണൈറ്റഡ് നഴ്സസ് അസോസിയേഷന്റെ(യുഎൻഎ) പത്തനംതിട്ട ജില്ലാ പ്രസിഡന്റ് കൂടിയായതിനാൽ മറ്റേതെങ്കിലും ബന്ധം തട്ടിക്കൊണ്ടുപോയ സംഭവത്തിനുണ്ടോയെന്ന് പൊലീസ് പരിശോധിക്കുന്നുണ്ട്. അതേസമയം വ്യക്തിപരവും കുടുംബപ്രശ്നങ്ങളും ഇല്ലെന്ന നിലപാടിലുറച്ച് നിൽക്കുകയാണ് ആറുവയസുകാരിയുടെ മാതാപിതാക്കൾ. എന്നാൽ മോചനദ്രവ്യം ചോദിച്ച് കുട്ടിയുടെ അമ്മയെ വിളിക്കാൻ ഇവർക്ക് എവിടെ നിന്ന് നമ്പർ കിട്ടിയെന്ന സംശയത്തിന് ഉത്തരം കണ്ടത്തേണ്ടതുണ്ട്. പത്ത് ലക്ഷം രൂപ മാത്രം മോചനദ്രവ്യമായി ചോദിച്ചതിലും സംശയമേറെയാണ്.