വായു മലിനീകരണം ഗുരുതരമായ അവസ്ഥയിലേക്ക് നീങ്ങുന്ന സാഹചര്യത്തിൽ തലസ്ഥാനമായ ദില്ലിയിൽ കൃത്രിമ മഴ പെയ്യിക്കാനുള്ള പദ്ധതികൾ ദ്രുതഗതിയിൽ നടന്നു വരികയാണെന്ന് റിപ്പോർട്ടുകൾ. കൃത്രിമ മഴ പെയ്യിക്കുന്നതുമായി ബന്ധപ്പെട്ട് ദില്ലി പരിസ്ഥിതി മന്ത്രി ഗോപാൽ റായ് യോഗം വിളിച്ചു ചേർത്തു. നവംബർ 20, 21 തീയതികളിൽ തലസ്ഥാനമായ ഡൽഹിയിൽ കൃത്രിമ മഴ പെയ്യിക്കുമെന്ന തീരുമാനം യോഗത്തിൽ കെെക്കൊണ്ടിരിക്കുകയാണെന്ന് യോഗ തീരുമാനമായി ഗോപാൽ റായ് വ്യക്തമാക്കി. ദില്ലിയിൽ ആദ്യമായാണ് കൃത്രിമ മഴ പെയ്യിക്കൽ നടപ്പിലാക്കാനൊരുങ്ങുന്നത്.
ഡൽഹി പരിസ്ഥിതി മന്ത്രി ഗോപാൽ റായ് ബുധനാഴ്ച വിളിച്ചു ചേർത്ത യോഗത്തിൽ കാൺപൂർ ഐഐടി സംഘവും സംബന്ധിച്ചിരുന്നു. കൃത്രിമ മഴ പെയ്യിക്കുന്നതുമായി ബന്ധപ്പെട്ട് ഐഐടി കാൺപൂർ ഡൽഹി സർക്കാരിന് സമ്പൂർണ്ണ പദ്ധതിയും സമർപ്പിച്ചു. വെള്ളിയാഴ്ച ഡൽഹി സർക്കാർ ഈ വിവരം സുപ്രീം കോടതിയെ അറിയിക്കുമെന്നാണ് റിപ്പോർട്ടുകൾ. കൃത്രിമ മഴ പെയ്യിക്കാൻ കേന്ദ്രസർക്കാരിൻ്റെ സഹകരണം ആവശ്യപ്പെട്ട് ഡൽഹി സർക്കാർ സുപ്രീം കോടതിയെ സമീപിക്കാനാണ് നീക്കം.
ദില്ലി രാജ്യതലസ്ഥാന പ്രദേശത്ത് വായു മലിനീകരണം ഭയാനകമായ രീതിയതിൽ ബാധിച്ചിരിക്കുകയാണ്. ശെെത്യകാലം പിറന്നതോടെ മലിനീകരണത്തിൽ നിന്ന് മോചനമില്ലാത്ത അവസ്ഥയിലാണ് ദില്ലി. വായു മലിനീകരണത്തിൻ്റെ തോത് വർഷങ്ങളായി ഗുരുതരവിഭാഗത്തിൽ തന്നെ തുടർന്ന വരികയാണ്. മലിനീകരണം സംബന്ധിച്ചും സുപ്രീം കോടതിയും സർക്കാരിനോട് ചോദ്യങ്ങൾ ഉന്നയിച്ചിരുന്നു. നിലവിൽ ജനങ്ങൾ ശ്വസിക്കാൻ പോലും ബുദ്ധിമുട്ടുന്ന സാഹചര്യമാണ്. മലിനീകരണത്തിന്റെ ഗുരുതരാവസ്ഥ കണക്കിലെടുത്ത് സ്കൂളുകൾക്ക് ശെെത്യകാല അവധി മുൻകൂറായി നൽകി ഡൽഹി സർക്കാർ രംഗത്തെത്തി. നവംബർ 9 മുതൽ 18 വരെ സ്കൂളുകൾക്ക് അവധി ആയിരിക്കുമെന്ന് വിദ്യാഭ്യാസ വകുപ്പ് അറിയിച്ചു. മലിനീകരണം അതിരൂക്ഷമായി തുടരുകയും ദിനന്തോറും അത് വർദ്ധിച്ചു വരികയും ചെയ്യുന്ന സാഹചര്യത്തിലാണ് പ്രസ്തുത തീരുമാനം സർക്കാർ കൈക്കോട്ടിരിക്കുന്നത്.
നിലവിൽ തുടരുന്ന നിരോധനം നീട്ടാനാണ് സർക്കാർ തീരുമാനിച്ചിരിക്കുന്നത്. മറ്റു സംസ്ഥാനങ്ങളിൽ രജിസ്റ്റർ ചെയ്ത ടാക്സി വാഹനങ്ങൾക്ക് ഡൽഹിയിൽ പ്രവേശനം അനുവദിക്കില്ലെന്നും സർക്കാർ വ്യക്തമാക്കി. ടാക്സി നിരോധനം എത്രനാൾ തുടരുമെന്ന് ഇപ്പോൾ വ്യക്തമല്ല. നവംബർ 13 മുതൽ 20 വരെ നിരോധനം നീട്ടാനാണ് ഇപ്പോൾ തീരുമാനിച്ചിരിക്കുന്നത്. ഇതേ സമയപരിധിയിൽ വാഹനങ്ങളിൽ ഒറ്റ-ഇരട്ട സംഖ്യ നടപ്പാലാക്കുന്നതു സംബന്ധിച്ചും ചർച്ച ഉയരുന്നുണ്ട്. എന്നാൽ ഈ രണ്ട് കാര്യങ്ങളുടെയും വിജ്ഞാപനം ഇതുവരെ പുറത്തുവന്നിട്ടില്ല. സുപ്രീം കോടതിയിൽ വാദം പൂർത്തിയായ ശേഷം മാത്രമേ ഒറ്റ-ഇരട്ട അക്ക നിയന്ത്രണങ്ങൾ നടപ്പിലാക്കുന്നതു സംബന്ധിച്ച് തീരുമാനിക്കുകയുള്ളു എന്ന് ഗോപാൽ റായ് വ്യക്തമാക്കി