ജഡ്ജിമാരുടെ പേരിൽ കോഴ വാങ്ങിയെന്ന കേസിൽ അഡ്വ.സൈബി ജോസിനെതിരെ തെളിവില്ലെന്ന് റിപ്പോർട്ട്. കേസിൽ പ്രത്യേക അന്വേഷണസംഘം മൂവാറ്റുപുഴ വിജിലൻസ് കോടതിയിൽ റിപ്പോർട്ട് സമർപ്പിച്ചു. ഹൈക്കോടതിയിലെ മൂന്ന് ജഡ്ജിമാരുടെ പേരിൽ കക്ഷികളിൽ നിന്ന് കോഴ വാങ്ങിയെന്നാണ് കേസ്.
ആരോപണം ഉയർന്നതിന് പിന്നാലെ അഭിഭാഷകരുടെ പരാതിയിൽ ഹൈക്കോടതി വിജിലൻസ് അന്വേഷണം നടത്തി ആരോപണത്തിൽ കഴമ്പ് ഉണ്ടെന്ന് കണ്ടെത്തിയിരുന്നു. തുടർന്നാണ് പോലീസ് അന്വേഷണം പ്രഖ്യാപിച്ചത്. എന്നാൽ അഡ്വ. സൈബി ജോസിനെതിരെ തെളിവില്ലെന്നാണ് അന്വേഷണ സംഘം കോടതിയിൽ സമർപ്പിച്ച റിപ്പോർട്ടിൽ ചൂണ്ടിക്കാണിക്കുന്നത്.
ജഡ്ജിക്ക് നല്കാനെന്ന വ്യാജേന സിനിമാ നിര്മ്മാതാവില് നിന്ന് കോഴ വാങ്ങിയെന്നാണ് ഹൈക്കോടതി അഭിഭാഷകന് സൈബി ജോസ് കിടങ്ങൂരിനെതിരെ ഉയർന്ന ആരോപണം. മൂന്ന് ജഡ്ജിമാരുടെ പേരില് സൈബി വന് തോതില് പണം കൈപ്പറ്റിയെന്നാണ് ഹൈക്കോടതി വിജിലന്സ് കണ്ടെത്തിയിരിക്കുന്നത്. ഒരു ജഡ്ജിയുടെ പേരില് മാത്രം 50 ലക്ഷം രൂപയാണ് സൈബി വാങ്ങിയതെന്നാണ് ആരോപണം. മറ്റു ജഡ്ജിമാരുടെ പേരില് 25 ലക്ഷവും, രണ്ടു ലക്ഷം രൂപ വീതവും വാങ്ങിയെന്ന് പരാതിയിൽ പറയുന്നുണ്ട്. ജസ്റ്റിസുമാരായ പിവി കുഞ്ഞികൃഷ്ണന്, മുഹമ്മദ് മുഷ്താഖ്, സിയാദ് റഹ്മാന് എന്നിവരുടെ പേരിലാണ് സൈബി കോഴ വാങ്ങിയത് എന്നായിരുന്നു കണ്ടെത്തൽ. അഭിഭാഷകനെതിരെ അഡ്വക്കേറ്റ് ആക്ട് പ്രകാരം നടപടി സ്വീകരിക്കണമെന്നും വിജിലന്സ് നിര്ദ്ദേശിച്ചിരുന്നു.