എല്ലാ നവജാത ശിശുക്കള്ക്കും മുലപ്പാല് ലഭിക്കുന്നുണ്ടെന്ന് ഉറപ്പാക്കാന് ലക്ഷ്യമിട്ട് ഉത്തര്പ്രദേശിലെ ആഗ്രയില് ആദ്യത്തെ ‘മദര് മില്ക്ക് ബാങ്ക്’ തുറന്നു. അമ്മയുടെ പാല് ലഭിക്കാത്ത കുട്ടികള്ക്ക് മദര് മില്ക്ക് ബാങ്കിലൂടെ നല്കുന്ന പാല് ജീവന് നല്കുമെന്നും അധികൃതര് പറഞ്ഞു. എല്ലാ നവജാത ശിശുക്കള്ക്കും മുലപ്പാല് ലഭിക്കുന്നുണ്ടെന്ന് ഉറപ്പാക്കാന് ലക്ഷ്യമിട്ടാണ് മദര് മില്ക്ക് ബാങ്ക് പ്രവര്ത്തനമാരംഭിച്ചിരിക്കുന്നത്.
മുലയൂട്ടുന്ന ഏതൊരു അമ്മയ്ക്കും തന്റെ കുഞ്ഞിന് ആവശ്യമായ പാല് നല്കിയ ശേഷം ബാക്കി വരുന്ന മുലപ്പാല് മദര് മില്ക്ക് ബാങ്കിലേക്ക് സംഭാവന ചെയ്യാവുന്നതാണ്. ദാതാക്കള്ക്ക് ഒരു സ്റ്റെയിന്ലെസ് സ്റ്റീല് പാത്രത്തില് പാല് നിറച്ച് റഫ്രിജറേറ്ററില് സൂക്ഷിക്കാം. അതിനുശേഷം, ഡ്രൈ ഐസ് അടങ്ങിയ ഒരു തണുത്ത ബാഗില് പാല് ബാങ്കിലേക്ക് കൊണ്ടുവരാന് കഴിയും. മുലയൂട്ടുന്ന അമ്മമാരോട് തങ്ങളുടെ കുഞ്ഞുങ്ങള്ക്ക് മുലയൂട്ടുന്നതിനൊപ്പം മദര് മില്ക്ക് ബാങ്കിലേക്ക് സംഭാവന ചെയ്യാനും അഭ്യര്ത്ഥിക്കുന്നതായി ആഗ്രയിലെ മുതിര്ന്ന ആരോഗ്യ ഉദ്യോഗസ്ഥര് പറഞ്ഞു.
ദാതാവായ അമ്മയ്ക്ക് ഏതെങ്കിലും തരത്തിലുള്ള അസുഖമുണ്ടോയെന്ന് അറിയാന് പാല് ബാങ്കില് പരിശോധിക്കും. പരിശോധനയ്ക്ക് ശേഷം പാല് വിതരണത്തിനായി സജ്ജമാക്കുന്നു. കുട്ടികളുടെ പ്രതിരോധശേഷിയും ആരോഗ്യകരമായ വളര്ച്ചയും ഉറപ്പാക്കുന്നതിലെ സുപ്രധാന നേട്ടമാണ് മദര് മില്ക്ക് ബാങ്ക് തുറക്കുന്നതെന്ന് ചീഫ് മെഡിക്കല് ഓഫീസര് ഡോ. അരുണ് ശ്രീവാസ്തവ പറഞ്ഞു. മൈനസ് 20 ഡിഗ്രിയില് ഫ്രീസറില് സൂക്ഷിക്കുമ്പോള് മുലപ്പാല് സുരക്ഷിതമായി സംഭരിക്കാനും ഒരു വര്ഷത്തേക്ക് ഉപയോഗിക്കാനും കഴിയുമെന്നും മുതിര്ന്ന പൊതുജനാരോഗ്യ വിദഗ്ധന് ദീപക് ജെ ദാവെ പറഞ്ഞു.