രാജസ്ഥാന്‍ നിയമസഭാ തിരഞ്ഞെടുപ്പിനുള്ള ആദ്യ സ്ഥാനാര്‍ഥി പട്ടിക കോണ്‍ഗ്രസ് പുറത്തുവിട്ടു.ആദ്യ ഘട്ടത്തില്‍ 33 സ്ഥാനാര്‍ത്ഥികളെയാണ് പാര്‍ട്ടി പ്രഖ്യാപിച്ചത്. കോണ്‍ഗ്രസിന്റെ ആദ്യ ഘട്ടപട്ടികയില്‍ കാര്യമായ മാറ്റങ്ങളൊന്നും വരുത്തിയിട്ടില്ല. മുഖ്യമന്ത്രി അശോക് ഗെലോട്ടിന് സര്‍ദാര്‍പുരയില്‍ നിന്നും സച്ചിന്‍ പൈലറ്റിന് ടോങ്കില്‍ നിന്നും മത്സരിക്കും. സംസ്ഥാനത്തെ പ്രമുഖ നേതാക്കളെ കോണ്‍ഗ്രസ് പാര്‍ട്ടി ഈ പട്ടികയില്‍ ഉള്‍പ്പെടുത്തിയിട്ടുണ്ട്.
നിയമസഭാ സ്പീക്കര്‍ സി പി ജോഷിക്ക് നാഥ്വാഡയില്‍ നിന്നും കോണ്‍ഗ്രസ് ടിക്കറ്റ് നല്‍കിയിട്ടുണ്ട്. രാജസ്ഥാന്‍ കോണ്‍ഗ്രസ് അധ്യക്ഷന്‍ ഗോവിന്ദ് സിങ് ദോട്ടസാര സ്വന്തം സീറ്റായ ലക്ഷ്മണ്‍ഗഡില്‍ മത്സരിക്കും. ഇതിന് പുറമെ ഒസിയനില്‍ നിന്നുള്ള ദിവ്യ മദേര്‍ണ, ഹിന്ദോളിയില്‍ നിന്നുള്ള അശോക് ചന്ദന, സവായ് മധോപൂരില്‍ നിന്നുള്ള ഡാനിഷ് അബ്രാര്‍, ജോധ്പൂരില്‍ നിന്നുള്ള മനീഷ പന്‍വാര്‍, സദുല്‍പൂരില്‍ നിന്നുള്ള കൃഷ്ണ പൂനിയ എന്നിവര്‍ക്കും ടിക്കറ്റ് ലഭിച്ചു.