ഹോസ്പിറ്റാലിറ്റി ടെക് ലീഡേഴ്‌സ് ഫോറം വാര്‍ഷിക കോണ്‍ക്‌ളേവ് ദുബായിൽ സെപ്റ്റംബർ 23ന് തുടങ്ങും. അംഗങ്ങളെ ഒരു കുടക്കീഴിൽ ഒരുമിച്ച് ചേർക്കാൻ ലക്ഷ്യമിട്ട് എച്ച്.ടി.എൽ.എഫ് സംഘടിപ്പിക്കുന്ന വാർഷിക കോൺക്ലേവ് ദുബൈയിലെ ഓക്സ് ഇബ്ൻ ബത്തൂത്ത ഹോട്ടലിൽ ആണ് നടക്കുക. എച്ച്ടിഎല്‍എഫിലെ 114 അംഗങ്ങളെയും ഒരുമിച്ചു കൊണ്ടുവരുന്നതിന്റെ ഭാഗമായി നടത്തുന്ന വാര്‍ഷിക കോണ്‍ക്‌ളേവില്‍ നിലവിലെ ബിസിനസ് മെച്ചപ്പെടുത്താനുതകുന്ന ചര്‍ച്ചകളും മേഖലയിലെ വിദഗ്ധര്‍ പങ്കെടുക്കുന്ന പാനല്‍ ഡിസ്‌കഷനുകളുമുണ്ടാകും. എച്ച്ടിഎല്‍എഫ് പങ്കാളികളുടെ ഇന്നൊവേഷനുകള്‍ പ്രദര്‍ശിപ്പിക്കാനും സമീപ ഭാവിയില്‍ എന്തൊക്കെ പ്രതീക്ഷിക്കാന്‍ സാധിക്കുമെന്ന കൃത്യമായ ധാരണകള്‍ അംഗങ്ങള്‍ക്ക് നല്‍കാനും കോണ്‍ക്‌ളേവ് ലക്ഷ്യമിടുന്നുണ്ട്. ഈ രംഗത്തെ വിഗദ്ധരും പ്രമുഖരും വാർഷിക കോൺക്ലേവിൽ പങ്കെടുക്കും.
വിവിധ വിഷയങ്ങളിൽ ആശയ കൈമാറ്റങ്ങളും ചർച്ചകളും കോൺക്ലേവിൽ നടക്കും. ഹോസ്പിറ്റാലിറ്റി വ്യവസായത്തിലെ ഐ.ടി മേധാവികളെ ശാക്തീകരിക്കുന്നതിനും ഐ.ടി പ്രവർത്തനങ്ങളിൽ ഐക്യം വളർത്തുന്നതിനും പ്രതിജ്ഞാബദ്ധമാണെന്ന് ഭാരവാഹികൾ വാർത്തസമ്മേളനത്തിൽ അറിയിച്ചു. യു.എ.ഇയുടെ നിയമങ്ങൾ പാലിച്ചു കൊണ്ട് പുതിയൊരു പ്രവർത്തന ചട്ടക്കൂട് നിർമിക്കാനും പദ്ധതിയുണ്ട്. മേഖലയിലേക്ക് കടന്നുവരാൻ ആഗ്രഹിക്കുന്നവർക്ക് സർട്ടിഫിക്കറ്റ് കോഴ്സുകൾ ആരംഭിക്കാനുള്ള ആലോചനയും നടക്കുന്നു. അതോടൊപ്പം ദുബൈ ചേംബറിൽ രജിസ്റ്റർ ചെയ്യാനുള്ള നീക്കമുള്ളതായും ഭാരവാഹികൾ അറിയിച്ചു.
ഹോസ്പിറ്റാലിറ്റി രംഗത്ത് പ്രവർത്തിക്കുന്നവരുടെ ഉന്നമനം ലക്ഷ്യമിട്ട് രൂപവത്കരിച്ച സംഘടനയാണ് എച്ച്.ടി.എൽ.എഫ്. നിലവിൽ സംഘടനയിൽ രജിസ്റ്റർ ചെയ്തിരിക്കുന്ന അംഗങ്ങളുടെ എണ്ണം 114 ആണ്. സമീപ ഭാവിയിൽ സൗദി അറേബ്യ, ഖത്തർ തുടങ്ങിയ രാജ്യങ്ങളിലേക്കും സംഘടനയുടെ പ്രവർത്തനം വ്യാപിപ്പിക്കാൻ ലക്ഷ്യമിടുന്നതായും ഭാരവാഹികൾ അറിയിച്ചു. ലാഭേച്ഛയില്ലാതെ പ്രവർത്തിക്കുന്ന സ്ഥാപനമെന്ന നിലയിൽ, സാമ്പത്തിക നേട്ടങ്ങളേക്കാൾ വ്യവസായത്തെ മുന്നോട്ട് കൊണ്ടുപോകുന്നതിനും അംഗങ്ങളുടെ വളർച്ചക്കും വിജയത്തിനും പിന്തുണ നൽകുകയുമാണ് ലക്ഷ്യം. പ്രസിഡന്‍റ് ബൈജു ഫിലിപ്പ്, ഓണററി രക്ഷാധികാരി സ്റ്റേസി സാമുവൽ, പബ്ലിക് റിലേഷൻ ഓഫിസർ മുഹമ്മദ് നൗഫൽ, ഇവന്‍റ്സ് മാനേജർ സബിൻ സുബ്രഹ്മണ്യൻ, സെക്രട്ടറി ലിന്‍റോ തോമസ്, ട്രഷറർ സുനിൽ പൂണോളി, ഇവന്‍റ് കോഓർഡിനേറ്റർ മുബീർ മീത്തൽ എന്നിവർ വാർത്താസമ്മേളനത്തിൽ പങ്കെടുത്തു.