പുതുപ്പള്ളി എല്‍ഡിഎഫ് സ്ഥാനാര്‍ഥി ജെയ്ക്ക് സി തോമസിനെ പരിഹസിച്ച് കെ മുരളീധരന്‍. ജെയിക്കിന് ഹാട്രിക് കിട്ടുമെന്നും ഒപ്പം അപ്പനോടും മകനോടും തോറ്റു എന്ന പേരും ലഭിക്കുമെന്നും മുരളീധരന്‍ പറഞ്ഞു.
പുതുപ്പള്ളിയില്‍ കോണ്‍ഗ്രസ് സ്ഥാനാര്‍ഥി ചാണ്ടി ഉമ്മന്‍ തന്നെ ജയിക്കും. അവിടെ ഉമ്മന്‍ ചാണ്ടിയുടെ ചികിത്സയുമായി ബന്ധപ്പെട്ടു സിപിഎം നടത്തുന്നത് തറ പ്രചരണമാണ്. മറ്റു നേട്ടങ്ങളൊന്നും പറയാനില്ലാത്തതു കൊണ്ടാണ് ഇത്തരം പ്രചരണങ്ങള്‍ നടത്തുന്നത് എന്നും മുരളീധരന്‍ പറഞ്ഞു.
അതേസമയം എൽഡിഎഫ് സ്ഥാനാർഥി ജെയ്ക് സി. തോമസിനെ പുതുപ്പള്ളിയിലെ ജനങ്ങൾ അവരുടെ ജനപ്രതിനിധിയായി തിരഞ്ഞെടുക്കുമെന്ന് എൽഡിഎഫ് കൺവീനർ ഇ.പി.ജയരാജൻ പറഞ്ഞു. മരണം സ്വാഭാവികമെന്നും പുതുപ്പള്ളിയില്‍ സഹതാപതരംഗം ഉണ്ടാവില്ലെന്നും ജയരാജൻ വിശദീകരിച്ചു. പുതുപ്പള്ളി നിയോജകമണ്ഡലത്തിൽ ശക്തമായ രാഷ്ട്രീയ മത്സരം അരങ്ങേറുകയാണ്. രാഷ്ട്രീയമായ പക്വതയോടെ വിഷയങ്ങൾ അവതരിപ്പിക്കാൻ കരുത്തും ശക്തിയുമുള്ള നേതാവാണ് ജെയ്ക് എന്നും ജയരാജൻ പറഞ്ഞു.