കിഴക്കന്‍ ചൈനയിലുണ്ടായ ഭൂകമ്പത്തില്‍ വീടുകള്‍ തകരുകയും 21 പേര്‍ക്ക് പരിക്കേല്‍ക്കുകയും ചെയ്തു. റിക്ടര്‍ സ്‌കെയിലില്‍ 5.5 തീവ്രത രേഖപ്പെടുത്തിയ ഭൂചലനമാണ് ഉണ്ടായത്. ഭൂകമ്പത്തില്‍ മരണങ്ങളൊന്നും റിപ്പോര്‍ട്ട് ചെയ്തിട്ടില്ല.
ചൈനീസ് തലസ്ഥാനമായ ബെയ്ജിംഗില്‍ നിന്ന് 300 കിലോമീറ്റര്‍ തെക്ക് ദെഷൗ നഗരത്തിന് സമീപം പുലര്‍ച്ചെ 2:33 നാണ് ഭൂചലനം ഉണ്ടായതെന്ന് ചൈന ഭൂകമ്പ നെറ്റ്വര്‍ക്ക് സെന്റര്‍ അറിയിച്ചു. 5.4 തീവ്രത രേഖപ്പെടുത്തിയതായാണ് യുഎസ് ജിയോളജിക്കല്‍ സര്‍വേ അറിയിച്ചത്. ഭൂകമ്പത്തില്‍ 74 വീടുകള്‍ തകർന്നു
സര്‍ക്കാര്‍ വിവരം അനുസരിച്ച് ദെഷൗവിലും പരിസര പ്രദേശങ്ങളിലും ഏകദേശം 5.6 ദശലക്ഷം ആളുകള്‍ താമസിക്കുന്നുണ്ട്. ഭൂമിയുടെ ഉപരിതലത്തില്‍ നിന്ന് 10 കിലോമീറ്റര്‍ താഴെയായിരുന്നു ഭൂചലനത്തിന്റെ പ്രഭവ കേന്ദ്രം. ഭൂകമ്പത്തില്‍ റെയില്‍ പാതകള്‍ക്ക് കേടുപാടുകള്‍ സംഭവിച്ചിട്ടുണ്ടോ എന്ന് പരിശോധിച്ച് വരികയാണെന്ന് ചൈന ന്യൂസ് സര്‍വീസ് അറിയിച്ചു.