കണ്ണൂര് സര്വകലാശാലയിലെ അസോസിയേറ്റ് പ്രൊഫസര് ഡോ. പ്രിയാ വർഗീസിന്റെ നിയമനം സ്റ്റേ ചെയ്ത ഗവർണറുടെ ഉത്തരവിന്റെ സാധുതയെപ്പറ്റി കണ്ണൂർ സർവകലാശാല നിയമോപദേശം തേടി. നിയമനക്കേസില് ഹൈക്കോടതി ഡിവിഷന് ബെഞ്ച് ഡോ. പ്രിയാ വര്ഗീസിന് അനുകൂലമായി ഉത്തരവിട്ടതോടെയാണ് സർവ്വകലാശാല നിയമോപദേശം തേടിയത്. സർവകലാശാല ചാൻസലർ കൂടിയായ ഗവർണറുടെ സ്റ്റേ ഉത്തരവു നിലനിൽക്കുന്നു എന്ന സാങ്കേതിക തടസ്സം മറികടക്കാനാണു കണ്ണൂർ നിയമോപദേശം തേടിയത്.
സ്വജനപക്ഷപാതം ആരോപിച്ച് 2022 ഓഗസ്റ്റ് 17നാണ് മലയാളം പഠനവകുപ്പില് അസോസിയേറ്റ് പ്രൊഫസര് ആയി പ്രിയാ വര്ഗീസിന്റെ നിയമനം ചാന്സലര് കൂടിയായ ഗവര്ണര് ആരിഫ് മുഹമ്മദ് ഖാന് മരവിപ്പിച്ചിരുന്നു. കണ്ണൂർ വിസി, ഇന്റർവ്യൂ ബോർഡിലെയും സിൻഡിക്കറ്റിലെയും അംഗങ്ങൾ എന്നിവർക്കു കാരണംകാണിക്കൽ നോട്ടിസ് അയയ്ക്കാനും ഗവർണർ ഉത്തരവിട്ടിരുന്നു. ആ ഉത്തരവ് ഇതുവരെ ഗവർണർ റദ്ദാക്കിയിട്ടില്ല.
പ്രിയയ്ക്കു നിശ്ചിത യോഗ്യതയില്ലെന്നും നിയമനം പുനഃപരിശോധിക്കണമെന്നും ഹൈക്കോടതി സിംഗിള് ബെഞ്ച് വിധിച്ചു. ഡിവിഷന് ബെഞ്ച് വിധി സ്റ്റേ ചെയ്തതോടെ പ്രിയയ്ക്കു പെട്ടെന്നുതന്നെ നിയമന ഉത്തരവു നല്കാനാണു സര്വകലാശാലയുടെ തീരുമാനം.