ഇടുക്കി ചിന്നക്കനാലിൽ നിന്ന് പിടികൂടി പെരിയാർ വന്യജീവിസങ്കേതത്തിൽ തുറന്നുവിട്ട കാട്ടാന അരിക്കൊമ്പന് കാട്ടിൽ അരി എത്തിച്ച് തമിഴ്നാട് വനംവകുപ്പ്. കമ്പത്ത് ജനവാസമേഖലയിൽ ഇറങ്ങിയതിന് ശേഷം പിന്നീടുള്ള ദിനങ്ങളില് അരിക്കൊമ്പന് ക്ഷീണിതനായിരുന്നു. ആനയുടെ ആരോഗ്യം സംരക്ഷിക്കുന്നതിനായാണ് വനംവകുപ്പ് അരിയുള്പ്പടെയുള്ള ഭക്ഷ്യവസ്തുക്കള് വനത്തില് പലയിടത്തും എത്തിച്ചു നല്കിയത്. അരി മാത്രമല്ല ശര്ക്കര, പഴക്കുല എന്നിവയാണ് കാട്ടിൽ എത്തിച്ചത്.
ഷണ്മുഖനദി ഡാമിനോടു ചേര്ന്നുള്ള റിസര്വ് വനത്തിലാണ് അരിക്കൊമ്പന് ഇപ്പോള് ഉള്ളത്. രാത്രിയില് കൃഷിത്തോട്ടത്തില് എത്തി ഭക്ഷണം കണ്ടെത്തുകയാണ് ഇപ്പോൾ അരിക്കൊമ്പൻ ചെയ്യുന്നത്. അതേസമയം അരിക്കൊമ്പന്റെ തുമ്പിക്കൈയിലെ മുറിവ് മനുഷ്യരുടെ ഇടപെടല് മൂലം ഉണ്ടായിട്ടുള്ളതല്ലെന്നും, അരിക്കൊമ്പന് പൂര്ണ ആരോഗ്യവാനാണെന്നും കമ്പം എംഎല്എ എന്. രാമകൃഷ്ണന് പറഞ്ഞു.
അരിക്കൊമ്പനെ പിടികൂടാനുള്ള ദൗത്യം ആറാം ദിവസവും പുരോഗമിക്കുകയാണ്. രണ്ടു ഷിഫ്റ്റുകളിലായി 300 പേരടങ്ങുന്ന സംഘം ആനയെ നിരീക്ഷിച്ചു വരികയാണ്. മൂന്ന് കുങ്കിയാനകളും ദൗത്യത്തിനായി ഉണ്ട്. ആന നിലവില് മലയോര പ്രദേശത്തായതിനാല് തന്നെ അവിടെ നിന്ന് സമതല പ്രദേശത്തേക്ക് എത്തിയതിനു ശേഷം മാത്രമേ മയക്കുവെടി വെക്കൂ എന്നും മയക്കുവെടി വിദഗ്ധര് ആനയെ നിരീക്ഷിച്ചുവരികയാണെന്നും വനംവകുപ്പ് വ്യക്തമാക്കി. ആന മേഘമല വനപ്രദേശത്തേക്ക് നീങ്ങി ഉള്ക്കാട്ടിലേക്ക് കടക്കുകയാണെങ്കില് മറ്റിടപെടലുകള് നടത്തേണ്ട എന്ന തീരുമാനത്തിലാണ് വനംവകുപ്പ്.