എംപി സ്ഥാനത്തുനിന്ന് അയോഗ്യനാക്കപ്പെട്ട കോണ്ഗ്രസ് നേതാവ് രാഹുൽ ഗാന്ധി ഇന്ന് ഔദ്യോഗിക വസതി ഒഴിയും. അയോഗ്യത സാഹചര്യത്തിൽ വസതി ഇന്നോടെ ഒഴിയണം എന്നാണ് ലോക്സഭാ സെക്രട്ടറിയേറ്റിന്റെ നിർദ്ദേശം. കഴിഞ്ഞ ദിവസം 12, തുഗ്ലക്ക് ലെയ്നിലുള്ള ബംഗ്ലാവില് നിന്ന് എല്ലാ സാധനങ്ങളും മാറ്റിയിരുന്നു. അമ്മയും മുൻ കോൺഗ്രസ് അധ്യക്ഷയുമായ സോണിയ ഗാന്ധിയുടെ വസതിയായ 10 ജൻപഥിലേക്കാണ് മാറുകയെന്നാണ് സൂചന. സാധനങ്ങളിൽ ചിലത് സോണിയ ഗാന്ധിയുടെ 10 ജൻപഥിലേക്കാണ് നീക്കിയിരിക്കുന്നത്.
മോദി പരാമര്ശ കേസില് മുന് കോണ്ഗ്രസ് അധ്യക്ഷനെ സൂറത്ത് കോടതി രണ്ട് വര്ഷം തടവിന് ശിക്ഷിച്ചിരുന്നു.അടുത്ത ദിവസം ലോക്സഭാ സെക്രട്ടേറിയറ്റ് അദ്ദേഹത്തിന്റെ എംപി സ്ഥാനം റദ്ദാക്കി.അയോഗ്യനാക്കിയതിന് ശേഷം ഏപ്രില് 22നകം ബംഗ്ലാവ് ഒഴിയാന് അദ്ദേഹത്തോട് ആവശ്യപ്പെടുകയായിരുന്നു.കുറ്റക്കാരനെന്നു വിധി സ്റ്റേ ചെയ്യണമെന്ന ആവശ്യം ഇന്നലെ ഗുജറാത്ത് സെഷൻസ് കോടതി തള്ളിയിരുന്നു.
വീടൊഴിയുമ്പോള് പ്രിയങ്കഗാന്ധിയടക്കമുള്ള നേതാക്കള് രാഹുലിന്റെ വസതിയിലെത്തിയേക്കും.. ആദ്യമായി എംപിയായ ശേഷം 2005 മുതല് തുഗ്ലക്ക് ലൈൻ പന്ത്രണ്ടിലെ വസതിയിലാണ് രാഹുല് താമസിക്കുന്നത്. കോണ്ഗ്രസ് അധ്യക്ഷനായപ്പോഴും ഇവിടെ തന്നെയാണ് രാഹുൽ താമസിച്ചത്. വീടൊഴിയുന്നത് ഉൾപ്പടെയുള്ള കാഴ്ചകൾ രാഹുലിന് അനുകൂലമായ സഹതാപത്തിൻറ അന്തരീക്ഷം ഉണ്ടാക്കുമെന്ന് കോൺഗ്രസ് കരുതുന്നു.