അപ്രതീക്ഷിതമായി ബിജെപിയിലേക്ക് ചേക്കേറിയ അനിൽ ആന്റണി പ്രധാനമന്ത്രി നരേന്ദ്രമോദിക്കൊപ്പം വേദി പങ്കിടും. യുവാക്കളുമായുള്ള സംവാദ പരിപാടിയായ ‘യുവം’ സമ്മേളനത്തില്‍ പങ്കെടുക്കാൻ പ്രധാനമന്ത്രി നരേന്ദ്രമോദി ഈ മാസം 25 ന് കൊച്ചിയിലെത്തും. സമ്മേളനത്തിൽ മോദിക്കൊപ്പം അനിൽ ആന്റണിയും പങ്കെടുക്കും എന്നാണ് ബിജെപി വൃത്തങ്ങൾ നൽകുന്ന സൂചന.
വിശദമായ ചർച്ചകൾക്ക് ശേഷമാണ് അനിൽ ബി ജെ പിയിലേക്ക് എത്തിയത്. അനിലിന്‍റെ ദേശീയ തലത്തിലെ സാന്നിധ്യം പാർട്ടിക്ക് ഗുണം ചെയ്യുമെന്ന വിലയിരുത്തലിലാണ് ബിജെപി എന്നാണ് വ്യക്തമാകുന്നത്. ദേശീയ തലത്തിലാകും അനിലിന്‍റെ റോൾ എന്നാണ് സൂചന. അതിനിടെ വരുന്ന ലോക്‌സഭാ തെരെഞ്ഞെടുപ്പിൽ അനിലിനെ മത്സരിപ്പിക്കാൻ നീക്കം നടക്കുന്നതായും സൂചനയുണ്ട്. പ്രധാനമന്ത്രി നിർദ്ദേശിച്ചതിന് പിന്നാലെയാണ് അനിലുമായി ബിജെപി നേതാക്കൾ ബന്ധപ്പെട്ടതും ബിജെപിയിലെത്തിക്കാനുള്ള നീക്കം നടന്നതെന്നുമാണ് ലഭിക്കുന്ന വിവരം.