എച്ച് 3 എന്‍ 2 വൈറസ് ഇന്ത്യയിൽ സ്ഥിരീകരിച്ചശേഷം കഴിഞ്ഞ കുറച്ച് മാസങ്ങളായി രാജ്യത്തുടനീളമുള്ള ആശുപത്രികളില്‍ ആയിരക്കണക്കിന് എച്ച് 3 എന്‍ 2 വൈറസ് കേസുകള്‍ റിപ്പോര്‍ട്ട് ചെയ്തിരുന്നു. എന്നാൽ എച്ച് 3 എന്‍ 2 വൈറസ് മൂലമുണ്ടാകുന്ന പനി ബാധിച്ച് ആദ്യ മരണം കര്‍ണാടകയില്‍ റിപ്പോർട്ട് ചെയ്തു. ഹാസന്‍ സ്വദേശിയാണ് മരിച്ചതെന്ന് ആരോഗ്യമന്ത്രാലയ വൃത്തങ്ങള്‍ അറിയിച്ചു. എച്ച് 3 എന്‍ 2 വൈറസ് വ്യാപിക്കുന്നതില്‍ പരിഭ്രാന്തരാകേണ്ടതില്ലെന്ന് കര്‍ണാടകആരോഗ്യമന്ത്രി കെ സുധാകര്‍ പറഞ്ഞതിന് ദിവസങ്ങള്‍ക്കുള്ളിലാണ് മരണം സംഭവിച്ചത്. .
എച്ച് 3 എന്‍ 2 വൈറസ് മറ്റ് ഉപവിഭാഗങ്ങളെ അപേക്ഷിച്ച് കൂടുതല്‍ നാളത്തെ ആശുപത്രിവാസത്തിന് കാരണമാകുമെന്നാണ് ഇന്ത്യന്‍ കൗണ്‍സില്‍ ഓഫ് മെഡിക്കല്‍ റിസര്‍ച്ച് പറയുന്നത്. എല്ലാ വര്‍ഷവും രോഗം ഉണ്ടാക്കുന്ന ശ്വാസകോശ വൈറല്‍ അണുബാധയാണിത്. ഇന്‍ഫ്‌ലുവന്‍സ എ വൈറസ് എന്നറിയപ്പെടുന്ന ഒരു തരം ഇന്‍ഫ്‌ലുവന്‍സ വൈറസാണ് H3N2. തൊണ്ടവേദന, ചുമ, ശരീരവേദന, മൂക്കൊലിപ്പ് എന്നിവയ്ക്കൊപ്പമുള്ള പനിയും വയറിളക്കം, ഛര്‍ദ്ദി, ശ്വാസതടസ്സം എന്നിവയും ഇതിന്റെ ലക്ഷണങ്ങൾ ആണ്.