സംസ്ഥാനത്ത് ഇന്നും ഉയർന്ന താപനിലയ്ക്ക് സാധ്യത എന്ന് മുന്നറിയിപ്പ്. ഇന്നലെ പകൽആറ് സ്റ്റേഷനുകളിൽ താപനില 40 ഡിഗ്രി സെൽഷ്യസിനും മുകളിലേക്ക് ഉയർന്നിരുന്നു. കണ്ണൂരിലും കാസർകോടും പാലക്കാടുമാണ് ഇന്നലെ താപനില 40 ഡിഗ്രി സെൽഷ്യസ് കടന്നത്. ഇന്നും കഴിഞ്ഞ ദിവസങ്ങളിലേത് പോലെ ചൂട് അനുഭവപ്പെട്ടേക്കാം എന്നാണ് മുന്നറിയിപ്പ്.
കണ്ണൂർ എയർപോർട്ടിൽ 41.3 ഡിഗ്രി സെൽഷ്യസ് താപനില രേഖപ്പെടുത്തി. കണ്ണൂർ ചെമ്പേരിയിൽ 41.1 ഡിഗ്രി സെൽഷ്യസ് ചൂട് രേഖപ്പെടുത്തി. പാലക്കാട് എരിമയൂരിൽ 40.5 ഡിഗ്രി സെൽഷ്യസും കാസർകോട് പാണത്തൂരിൽ 40.3 ഡിഗ്രി സെൽഷ്യസുമാണ് രേഖപ്പെടുത്തിയത്. കണ്ണൂർ ആറളത്ത് 40.2 ഡിഗ്രി സെൽഷ്യസ് താപനിലയാണ് രേഖപ്പെടുത്തിയത്. കഴിഞ്ഞ ഒരു മാസത്തെ കണക്കെടുത്താല് അന്തരീക്ഷ താപ നില കഴിഞ്ഞ വര്ഷത്തെക്കാള് ഉയര്ന്ന് നില്ക്കുകയാണ്. പാലക്കാട് ജില്ലയില് രാത്രി കാലത്തെ താപനിലയില് 2.9 ഡിഗ്രിയുടെ വര്ധന വരെ ഉണ്ടായി. കൊച്ചി, കൊല്ലം, തൃശൂര് ജില്ലകളില് മാത്രമാണ് ചൂട് കഴിഞ്ഞ തവണത്തേക്കാള് കുറവ് രേഖപ്പെടുത്തിയിരിക്കുന്നത്. അടുത്ത ദിവസങ്ങളിലും താപനില കൂടുതലാവാൻ തന്നെയാണ് സാധ്യതയെന്നാണ് അറിയിപ്പ്.
ചൂട് കൂടിയതോടെ ജലക്ഷാമം രൂക്ഷമാകുമെന്ന മുന്നറിയിപ്പ് നല്കിയിട്ടുണ്ട്. വരും ദിവസങ്ങളില് മഴ കിട്ടിയില്ലെങ്കില് ജല സ്രോതസ്സുകളിലെ ജല നിരപ്പ് വലിയ തോതില് താഴുമെന്നും സി ഡബ്ല്യു ആര് ഡി എമ്മിലെ ശാസ്ത്രജ്ഞര് മുന്നറിയിപ്പ് നൽകിയിട്ടുണ്ട്.