ഇന്ത്യയുടെ യശസ് അന്താരാഷ്ട്ര തലത്തിൽ തന്നെ കളങ്കപ്പെടുത്താനുള്ള നീക്കത്തിന്റെ ഭാഗമാണ് പ്രധാനമന്ത്രിക്കെതിരായ ബിബിസി ഡോക്യുമെന്ററിയെന്ന് വിദേശ കാര്യമന്ത്രി എസ് ജയ് ശങ്കര് പറഞ്ഞു. രാജ്യ വിരുദ്ധ ശക്തികള് ഇന്ത്യക്കകത്തും പുറത്തും തോളോട് തോള് ചേര്ന്ന് പ്രവര്ത്തിക്കുകയാണെന്നും എസ് ജയ് ശങ്കര് വാര്ത്ത ഏജന്സിക്ക് നല്കിയ അഭിമുഖത്തില് പ്രതികരിച്ചു.
ചൈനക്കെതിരെ സര്ക്കാര് അനങ്ങുന്നില്ലെന്ന കോണ്ഗ്രസ് വിമര്ശനത്തിന് രാഹുല് ഗാന്ധിയാണോ അതിര്ത്തിയിലേക്ക് സൈന്യത്തെ അയച്ചതെന്നും വിദേശകാര്യമന്ത്രി ചോദിച്ചു. ഇന്ത്യ ചൈന അതിര്ത്തി വിഷയത്തിൽ പ്രധാനമന്ത്രിയോ സര്ക്കാരോ ചൈനക്കെതിരെ ഒരക്ഷരം ഉരിയാടുന്നില്ലെന്നും, നടപടികള് സ്വീകരിക്കുന്നില്ലെന്നുമായിരുന്നു രാഹുല് ഗാന്ധിയുടെ പരാതി.
കൊവിഡ് കാലം മുതല് തുടങ്ങിയതാണ് രാജ്യത്തെ അപകീര്ത്തിപ്പെടുത്താനുള്ള ശ്രമം. മറ്റ് രാജ്യങ്ങളിലും ആളുകള് കൂട്ടത്തോടെ മരിച്ചു. ഇന്ത്യയിലെ ദൃശ്യങ്ങള് പ്രചരിപ്പിക്കപ്പെട്ടതുപോലെ മറ്റ് ഏത് രാജ്യത്തെയെങ്കിലും ചിത്രങ്ങള് പുറത്ത് വന്നോയെന്ന് വിദേശ കാര്യമന്ത്രി ചോദിച്ചു. അതേ രീതിയാണ് ഇരുപത് വര്ഷം മുന്പ് നടന്ന സംഭവത്തിന്റെ ഡോക്യുമെന്ററി ചിത്രീകരണവും. കൃത്യമായ രാഷ്ട്രീയം ഇതിന് പിന്നിലുണ്ട്. ഡോക്യുമെന്ററി പുറത്ത് വന്ന സമയം യാദൃശ്ചികമല്ല. രാജ്യത്ത് തെരഞ്ഞെടുപ്പുകള് തുടങ്ങുന്നു. അന്താരാഷ്ട്ര തലത്തിലും ഇന്ത്യ തിളങ്ങി നില്ക്കുന്ന സമയം. അപ്പോള് പ്രധാനമന്ത്രിയുടെയും, രാജ്യത്തിന്റെയും നിലപാട് തീവ്രമാണെന്ന് വരുത്താനാണ് ഡോക്യുമെന്ററിയിലൂടെ ശ്രമിച്ചതെന്ന് ജയ് ശങ്കര് കുറ്റപ്പെടുത്തി.
അദാനി-ഹിൻഡൻബർഗ് വിവാദത്തിലും ജോർജ്ജ് സോറോസിനെതിരെ തുറന്നടിച്ച് ഇന്ത്യൻ വിദേശകാര്യ മന്ത്രി എസ് ജയശങ്കർ രംഗത്ത് വന്നിരുന്നു. സോറോസ് ന്യൂയോർക്കിലുള്ള ഒരു പഴയ, സമ്പന്നനായ വ്യക്തിയാണ്. തന്റെ കാഴ്ചപ്പാടുകളാണ് ലോകം മുഴുവൻ എങ്ങനെ പ്രവർത്തിക്കുന്നുവെന്ന് തീരുമാനിക്കേണ്ടത് എന്നാണ് ഇപ്പോഴും അദ്ദേഹം കരുതുന്നത് എന്നും എസ് ജയശങ്കർ നേരത്തെ പ്രതികരിച്ചിരുന്നു.