കോഴിക്കോട് മെഡിക്കൽ കോളേജ് പരിസരത്ത് ആദിവാസി യുവാവ് ആത്മഹത്യ ചെയ്ത സംഭവവുമായി ബന്ധപ്പെട്ട കേസിൽ പോലീസ് ഇന്ന് റിപ്പോർട്ട് സമർപ്പിക്കും. ഹോസ്പിറ്റലിൽ നടന്ന മോഷണവുമായി ബന്ധപ്പെട്ട് ചോദ്യം ചെയ്തതിനെ തുടർന്നാണ് വിശ്വനാഥൻ ആശുപത്രി പരിസരത്ത് ആത്മഹത്യ ചെയ്തത്. സംഭവമായി ബന്ധപ്പെട്ട റിപ്പോർട്ട് സമർപ്പിക്കാൻ എസ് സി എസ് ടി കമ്മീഷൻ ആവശ്യപ്പെട്ടിരുന്നു. ഇത് പ്രകാരമാണ് പോലീസ് ഇന്ന് എസ് സി എസ് ടി കമ്മീഷന് റിപ്പോർട്ട് സമർപ്പിക്കുക.
വിശ്വനാഥന്റെ മരണം കൊലപാതകം ആണെന്ന് കുടുംബം ആരോപിച്ചിരുന്നു. സംഭവത്തിൽ വിശദമായ അന്വേഷണം വേണമെന്നും കുടുംബം ആവശ്യപ്പെട്ടു. ഭാര്യയുടെ പ്രസവത്തിനായി ആശുപത്രിയിൽ എത്തിയ യുവാവിനെ മോഷണം കുറ്റം ആരോപിച്ച് ചോദ്യം ചെയ്തിരുന്നു. പിന്നാലെ ആശുപത്രി പരിസരത്ത് യുവാവിനെ മരണമടഞ്ഞനിലയിൽ കണ്ടെത്തുകയായിരുന്നു. സംഭവത്തിൽ മനുഷ്യാവകാശ കമ്മീഷൻ കേസെടുക്കുകയും മെഡിക്കൽ കോളേജ് എസ്പിയോടും ആശുപത്രി സൂപ്രണ്ടിനോടും വിശദീകരണം ചോദിക്കുകയും ചെയ്തു. സംഭവത്തിൽ സിസിടിവി കേന്ദ്രീകരിച്ചാണ് പോലീസ് അന്വേഷണം നടത്തി വരുന്നത്. ആൾക്കൂട്ടം യുവാവിനെ മർദ്ദിച്ചതായി തെളിവുകൾ ലഭിച്ചിട്ടില്ല എന്ന് പോലീസ് പറഞ്ഞു.