ടിക്കറ്റ് ബുക്കിംഗ് ആരംഭിച്ച നിമിഷം തന്നെ സെർവറുകൾ ക്രഷ് ആക്കി ‘L2 എമ്പുരാൻ’ (L2 Empuraan). മാര്‍ച്ച് 21 രാവിലെ 9 മണിയോടെയാണ് ഇന്ത്യയിൽ എമ്പുരാൻ അഡ്വാൻസ് ബുക്കിംഗ് ആരംഭിച്ചത്. എന്നാൽ ബുക്കിംഗ് തുടങ്ങി മിനിറ്റുകൾക്കുള്ളിൽ ബുക്കിംഗ് ആപ്ലിക്കേഷനായ ബുക്ക് മൈ ഷോ വരെ ഹാങ്ങാവുകയും സെർവർ ഡൗൺ ആവുകയും ചെയ്തു. പല തിയേറ്ററുകളിലും ആദ്യഷോകൾ എല്ലാം ബുക്കായി കഴിഞ്ഞു. മാർച്ച് 27നാണ് റിലീസ്. പ്രധാന നഗരങ്ങളിൽ ഉൾപ്പെടെ ചിത്രത്തിനായി വൻ പ്രേക്ഷക പങ്കാളിത്തം ലഭിച്ചു തുടങ്ങിയിട്ടുണ്ട്. ബുക്ക് മൈ ഷോയിൽ ടിക്കറ്റ് ലഭിക്കാൻ പലയിടങ്ങളിലും ക്ഷാമം നേരിടുന്നതായും ആപ്പിൽ നിന്നുള്ള വിവരം സൂചിപ്പിക്കുന്നു. വെളുപ്പിന് ആറ് മണി മുതൽ ഫാൻസ്‌ ഷോകൾ ആരംഭിക്കും. ആറ് മണിക്കും, ആറേകാലിനും, ആറര മണിക്കും വരെ ഷോസ് നൽകുന്ന തിയേറ്ററുകൾ ഉണ്ട്.
പൃഥ്വിരാജ് സുകുമാരൻ സംവിധാനം ചെയ്ത എമ്പുരാൻ, 2025 മാർച്ച് 27 ന് റിലീസ് ചെയ്യും. മഞ്ജു വാര്യർ, ടൊവിനോ തോമസ്, ഇന്ദ്രജിത്ത് സുകുമാരൻ എന്നിവരുൾപ്പെടെയുള്ള താരനിര അണിനിരക്കും. സാനിയ അയ്യപ്പൻ, സായ്കുമാർ തുടങ്ങിയവർ അവരുടെ റോളുകളുമായി വീണ്ടും ഉണ്ടാവും. ലൂസിഫർ ട്രൈലജിയിലെ ഈ രണ്ടാം ഭാഗം നിർമ്മിക്കുന്നത് ഗോകുലം മൂവീസും, ലൈക്ക പ്രൊഡക്ഷൻസും ആശിർവാദ് സിനിമാസും ചേർന്നാണ്.
മലയാളത്തിനു പുറമെ, തമിഴ്, തെലുങ്ക്, ഹിന്ദി, കന്നഡ ഭാഷകളിലും എമ്പുരാൻ റിലീസിനെത്തുന്നുണ്ട്. കർണാടകയിൽ എമ്പുരാന്റെ വിതരണം ഹോംബാലെ ഫിലിംസും നോർത്ത് ഇന്ത്യയിൽ അനിൽ തദാനിയുടെ ഉടമസ്ഥതയിലുള്ള എഎ ഫിലിംസുമാണ് ഏറ്റെടുത്തിരിക്കുന്നത്.
കഴിഞ്ഞ വർഷം അവസാനം, മലമ്പുഴ റിസെർവോയറിൽ എമ്പുരാന്റെ അവസാന ഷോട്ടും പൂർത്തിയാക്കിയതിന്റെ വിവരം സംവിധായകൻ പൃഥ്വിരാജ് സുകുമാരൻ ഇൻസ്റ്റഗ്രാമിലൂടെ പങ്കിട്ടിരുന്നു. യു.കെയും യു.എസ്.എയും യു.എ.ഇയും ഉൾപ്പെടെ നാല് രാജ്യങ്ങളിലും എട്ടു സംസ്ഥാനങ്ങളിലുമായി ഷൂട്ടിംഗ് പൂർത്തിയാക്കിയ ചിത്രമാണ് എമ്പുരാൻ.
മലയാളം സിനിമ ചരിത്രത്തിൽ ആദ്യമായി IMAX-ൽ റിലീസ് ചെയ്യുന്ന ചിത്രമാകുകയാണ് എമ്പുരാന്‍. ഹോളിവുഡ്, ബോളിവുഡ് താരങ്ങള്‍ അടക്കം വന്‍ താരനിരയാണ് ചിത്രത്തിലുള്ളത്. മോഹൻലാൽ, മഞ്ജുവാര്യർ, ടൊവിനോ തോമസ്, സച്ചിൻ ഖേദേക്കർ, പൃഥ്വിരാജ്, ഇന്ദ്രജിത്ത്, ശിവദ, സായ് കുമാർ, ഫാസിൽ, സുരാജ് വെഞ്ഞാറമൂട്, കാർത്തികേയ ദേവ്, ഒസിയേൽ ജിവാനി, സത്യജിത്ത് ശർമ, ശുഭാംഗി ലത്കർ, ഐശ്വര്യ ഒജ്ഹ, നിഖാത് ഖാൻ, അലക്സ് ഒ’നെൽ , ബെഹ്സാദ് ഖാൻ, അനീഷ് ജി മേനോൻ, ജെയ്സ് ജോസ്, നൈല ഉഷ, ജിലു ജോൺ, മൈക്ക് നോവിക്കോവ്, ശിവജി ഗുരുവായൂർ, മുരുഗൻ മാർട്ടിൻ, മണിക്കുട്ടൻ, നയൻ ഭട്ട്, ബൈജു സന്തോഷ്, നന്ദു, സാനിയ ഇയ്യപ്പൻ, എറിക് എബൗനി, സ്വകാന്ത് ഗോയൽ, ആൻഡ്രിയ തിവാദർ, ജെറോം ഫ്ലിൻ, അഭിമന്യു സിംഗ്, കാർത്തിക് എന്നിവരാണ് പ്രധാന അഭിനേതാക്കൾ.
ദീപക് ദേവാണ് ചിത്രത്തിന് സംഗീതം ഒരുക്കുന്നത്. സുജിത് വാസുദേവ് ഛായാഗ്രഹണവും അഖിലേഷ് മോഹന്‍ എഡിറ്റിംഗും നിര്‍വഹിച്ചിരിക്കുന്നു. ഏതാണ്ട് 3 മണിക്കൂറാണ് എമ്പുരാന്റെ ദൈർഘ്യം എന്നാണ് റിപ്പോർട്ട്. കൃത്യമായി പറഞ്ഞാൽ 2 മണിക്കൂര്‍ 59 മിനിറ്റ്.