36-ാമത്തെതും അവസാനത്തേതും ആയ റഫാല്‍ യുദ്ധ വിമാനം ഇന്ത്യയ്ക്ക് കൈമാറി ഫ്രാന്‍സ്.
പതിവ് പോലെ ഫ്രാന്‍സില്‍ നിന്നും നിര്‍ത്താതെ പറന്നാണ് റഫാല്‍ ഇന്ത്യന്‍ മണ്ണില്‍ സുരക്ഷിതമായി പറന്നിറങ്ങിയത്. 36 റഫാല്‍ വിമാനങ്ങള്‍ക്കായുള്ള കരാറിലാണ് ഇന്ത്യയും ഫ്രാന്‍സും ഒപ്പുവച്ചത്. 36 റഫാല്‍ വിമാനങ്ങളില്‍ ആദ്യം ഇന്ത്യയ്ക്ക് ലഭിച്ചത് അഞ്ചെണ്ണമായിരുന്നു. 2020 ജൂലായിലായിരുന്നു അംബാലയിലെ എയര്‍ഫോഴ്‌സ് സ്റ്റേഷനില്‍ അഞ്ചു പേരും പറന്നിറങ്ങിയത്. ‘ഗോള്‍ഡന്‍ ആരോസ്’ എന്ന പേരുകേട്ട വ്യോമസേനയുടെ 17 സ്‌ക്വാഡ്രണിന്റെ ഭാഗമായിട്ടായിരുന്നു റഫാല്‍ അണിചേര്‍ന്നത്.. പശ്ചിമ ബംഗാളിലെ അംബാല, ഹരിയാന, ഹസിമാര എന്നിവിടങ്ങളിലാണ് ഇവയെ വിന്യസിച്ചിരിക്കുന്നത്. ‘പാക്ക് ഈസ് കംപ്ലീറ്റ്’ എന്നുള്ള ട്വീറ്റിലൂടെയാണ് ഫ്രാന്‍സില്‍ നിന്നുള്ള 36-ാമത് റഫാല്‍ ജെറ്റിന്റെ വരവ് ഇന്ത്യന്‍ വ്യോമസേന ആഘോഷിച്ചത്.
ഏകദേശം ഒന്‍പത് ബില്യണ്‍ ഡോളറിന്റെ ഇടപാടാണ് റഫാലിനായി ഇന്ത്യയും ഫ്രാന്‍സും തമ്മിലുണ്ടാക്കിയത്. ഏകദേശം 670 കോടി രൂപയാണ് ഓരോ ജെറ്റിന്റെയും വില. സുരക്ഷാ കാരണങ്ങളാല്‍ ഇവയില്‍ അധികവും പുറത്ത് വിട്ടിട്ടില്ല. മിസൈല്‍ അപ്രോച്ച് വാര്‍ണിംഗ്, ഇന്‍ഫ്രാറെഡ് സെര്‍ച്ച് ആന്‍ഡ് ട്രാക്ക് സിസ്റ്റങ്ങള്‍ തുടങ്ങി വിമാനത്തിലെ നിരവധി സംവിധാനങ്ങളില്‍ മാറ്റങ്ങള്‍ വരുത്തിയിട്ടുണ്ട്. ഇന്ത്യയുടെ ആവശ്യപ്രകാരം നിരവധി മാറ്റങ്ങള്‍ വരുത്തിയാണ് റഫാല്‍ നിര്‍മ്മാതാക്കള്‍ കൈമാറിയത്.
രാത്രിയും പകലും ഒരുപോലെ ആക്രമണം നടത്താനുള്ള ശേഷി റഫാലിനുണ്ട്. ത്രിതലശേഷിയുള്ള യുദ്ധവിമാനമാണ് റഫാല്‍. എയര്‍ ടു എയര്‍, എയര്‍ ടു ഗ്രൗണ്ട്, എയര്‍ ടു സര്‍ഫെഴ്‌സ് ശേഷിയുള്ളതാണ് റഫാല്‍. വിമാനത്തിന്റെ നീളം 15.27 മീറ്ററാണ്. റഫാലിന്റെ വേഗം മണിക്കൂറില്‍ 1912 കിലോമീറ്ററാണ്. ഒറ്റപറക്കലില്‍ 3700 കിലോമീറ്റര്‍ പരിധിവരെ പറക്കാന്‍ കഴിയുന്ന വിമാനത്തില്‍ മൂന്ന് ഡ്രോപ് ടാങ്കുകളുണ്ട്. മിക്ക ആധുനിക ആയുധങ്ങളും റഫാലില്‍ ഘടിപ്പിക്കാനാകും. അസ്ട്ര, സുദര്‍ശന്‍ ബോംബുകള്‍, എഇഎസ്എ റഡാര്‍, പൈത്തണ്‍ 5, ഇസ്രായേലിന്റെ ഡെര്‍ബി മിസൈല്‍ എന്നിവ ഘടിപ്പിക്കാനുള്ള സംവിധാനങ്ങളോടെയാണ് ഇന്ത്യയുടെ റാഫേല്‍ പുറത്തിറങ്ങുക. ലിബിയയിലും സിറിയയിലും ആക്രമണം നടത്താന്‍ ഫ്രാന്‍സ് ഉപയോഗിച്ചത് റഫാലായിരുന്നു. ചൈനയുമായുള്ള സംഘര്‍ഷത്തിന്റെ മൂര്‍ദ്ധന്യത്തില്‍ റഫാല്‍ ഇന്ത്യന്‍ വ്യോമസേനയില്‍ അതിവേഗം ഉള്‍പ്പെടുത്തി. രാജ്യത്ത് എത്തി ഒരാഴ്ചയ്ക്കുള്ളില്‍ ലഡാക്കില്‍ റഫാലിനെ ഇന്ത്യ വിന്യസിച്ചിരുന്നു.