പത്തനംതിട്ട: പോലീസിന്റെ പുതിയ കർമ്മപദ്ധതി പ്രകാരം ശബരിമലയിൽ മുതിർന്നവർക്കും കുട്ടികൾക്കും പ്രത്യേകം ക്യു സംവിധാനം ഇന്ന് മുതൽ നടപ്പിലാക്കി തുടങ്ങി. നടപന്തൽ മുതലാണ് പുതിയ രീതി നടപ്പാക്കാൻ തീരുമാനിച്ചിട്ടുള്ളത്. ഇതുകൂടാതെ സന്നിധാനത്ത് കുട്ടികൾക്കായി ഇരിക്കാൻ പ്രേത്യേക സ്ഥലവും ഏർപ്പെടുത്തുമെന്ന് ശബരിമല സ്പെഷ്യൽ ഓഫീസർ ആർ. ആനന്ദ് അറിയിച്ചു.
ശബരിമലയിലേക്ക് കുട്ടികളുമായി എത്തുന്ന ഭക്തർ തിക്കിലും തിരക്കിലും പെട്ട് വളരെ ബുദ്ധിമുട്ട് അനുഭവിക്കാറുണ്ട്. ഇതിനൊരാശ്വാസമാണ് പുതിയപദ്ധതി. നടപന്തലിന് സമീപത്തായി ഒരു അറിയിപ്പ് ബോർഡ്‌ ഉണ്ടാകുമെന്നും ഭക്തർക്കായി അനൗൺസ്‌മെന്റ് നൽകുമെന്നും സ്പെഷ്യൽ ഓഫീസർ പറഞ്ഞു. കുട്ടികളുമായി വരുന്ന ഭക്തർ ഇവിടെവച്ച് കുട്ടികൾ കൂടെയുള്ള രക്ഷിതാക്കൾ എന്നിവർക്ക് സ്പെഷ്യൽ ക്യു വഴി നടന്ന് സന്നിധാനത്തേക്ക് പോകാനുള്ള സംവിധാനമാണ് ഒരുക്കിയിട്ടുള്ളതെന്നും അദ്ദേഹം പറഞ്ഞു.
കഴിഞ്ഞ ദിവസങ്ങളിൽ തിക്കിലും തിരക്കിലും പെട്ട് കുട്ടികൾക്കടക്കം പരിക്കുകൾ പറ്റിയിരുന്നു. ഇതിനുപിന്നാലെ ബാലവകാശകമ്മീഷൻ ഇടപെടുകയും കുട്ടികൾക്കായി പ്രത്യേകം ക്യു ഏർപ്പെടുത്തണമെന്ന് ആവശ്യപ്പെട്ടിരുന്നു. കൂടാതെ ഹൈക്കോടതി ഈ വിഷയം പരിഗണിച്ച് മുതിർന്നവർക്കും പ്രത്യേകം ക്യു വേണം എന്ന് നിർദേശം നൽകി. ഇക്കാരണങ്ങൾ കണക്കിലെടുത്താണ് പോലീസ് പുതിയ കർമപദ്ധതി ആവിഷ്കരിച്ചത്. പോലീസിന്റെ പുതിയ കർമ്മപദ്ധതി പ്രകാരം വെർച്വൽ ക്യു വഴിയുള്ള ബുക്കിങ് 90,000 കടക്കാൻ പാടില്ല. കൂടാതെ പതിനെട്ടാംപടി കയറുന്നവരുടെ എണ്ണം മിനിട്ടിൽ അറുപതിൽ കുറയാൻ പാടില്ല എന്നും പറയുന്നുണ്ട്.