ലോകം ഒരു കുടക്കീഴിൽ സംഗമിക്കുന്ന ദുബായ് ഗ്ലോബൽ വില്ലേജിന്റെ 30-മത് സീസണ് വർണ്ണാഭമായ തുടക്കം. ഇന്ന് വൈകുന്നേരം 6 മണിയോടെ ഈ ആഗോള ഗ്രാമം സന്ദർശകർക്കായി മിഴി തുറന്നു. കൂടുതൽ വിസ്മയകരമായ ലോകം (‘എ മോർ വണ്ടർഫുൾ വേൾഡ്’) എന്ന പ്രമേയത്തിലാണ് ഇക്കുറി ആഗോളഗ്രാമത്തിൽ കാഴ്ചകൾ ഒരുക്കിയിരിക്കുന്നത്. ഒക്ടോബർ 15ന് ആരംഭിച്ച് 2026 മെയ് 10ന് അവസാനിക്കുന്ന രീതിയിലാണ് ഗ്ലോബൽ വില്ലജ് സന്ദർശകരെ സ്വീകരിക്കാൻ ഒരുങ്ങിയിരിക്കുന്നത്.
ആദ്യദിനംതന്നെ പതിനായിരക്കണക്കിനാളുകൾ ഇവിടേയ്ക്ക് ഒഴുകിയെത്തി. അന്താരാഷ്ട്ര പവലിയനുകൾ, ലോകോത്തര വിഭവങ്ങൾ, സാംസ്കാരിക പരിപാടികൾ, ഷോപ്പിംഗ്, റൈഡുകൾ, ലൈവ് എന്റർടെയ്ൻമെന്റ് എന്നിവ കൂടാതെ നിരവധി പുതിയ ആകർഷണങ്ങളും ഈ സീസണിലുണ്ട്. എല്ലാ വർഷത്തെയും പോലെ നിരവധി അത്ഭുത കാഴ്ചകളാണ് ഗ്ലോബല് വില്ലേജ് ഇത്തവണ സന്ദർശകർക്കായി ഒരുക്കിയിരിക്കുന്നത്.
30 രാജ്യങ്ങളുടെ പവിലിയനുകളാണ് ഗ്ലോബൽ വില്ലേജിൽ ഒരുങ്ങിയിരിക്കുന്നത്. വൈവിധ്യമാർന്ന പരിപാടികളുമായി വിവിധ രാജ്യങ്ങളിൽ നിന്നുള്ള ആയിരക്കണക്കിന്കലാകാരന്മാര് ഇത്തവണ ഗ്ലോബല് വില്ലേജില് എത്തും. നാലായിരത്തിലധികം കലാ- വിനോദ പ്രകടനങ്ങള് ഈ സീസണില് ആഗോളഗ്രാമത്തിൽ അരങ്ങേറും. ഒട്ടനവധി ആകര്ഷകങ്ങളാണ് സന്ദര്കര്ക്കായി തയ്യാറാക്കിയിരിക്കുന്നത് എന്നു ഗ്ലോബൽ വില്ലജ് മാനേജ്മന്റ് പ്രതിനിധി സെയ്ൻ ദാഹിർ പറഞ്ഞു.
ഗ്ലോബൽ വില്ലേജിലെ പ്രവേശന നിരക്ക് 25 ദിർഹമാണ്. ഓണ്ലൈനിലൂടെയും മൊബൈല് ആപ്ലിക്കേഷനിലൂടെയും ടിക്കറ്റ് ലഭിക്കും. രണ്ട് തരത്തിലുളള ടിക്കറ്റുകളാണ് ഇത്തവണ അവതരിപ്പിച്ചിരിക്കുന്നത്. ഞായര് മുതല് വ്യാഴം വരെയുള ദിവസങ്ങളില് ഉപയോഗിക്കാന് കഴിയുന്ന നിരക്കിളവോടെയുളള വാല്യു ടിക്കറ്റും എല്ലാ ദിവസവും പ്രവേശനം അനുവദിക്കുന്ന എനി ഡേ ടിക്കറ്റും ലഭ്യമാണ്. ഞായർ മുതൽ വ്യാഴം വരെ വൈകീട്ട് നാലുമുതൽ രാത്രി 12 മണി വരെയും വെള്ളി ശനി ദിവസങ്ങളിൽ രാത്രി ഒരു മണിവരെയും ഗ്ലോബൽ വില്ലജ് പ്രവർത്തിക്കും. കഴിഞ്ഞ വർഷങ്ങളിലെ പോലെ വിശേഷ ദിവസങ്ങളിലും വാരാന്ത്യങ്ങളിലും രാത്രി ഒന്പത് മണിക്ക് കരിമരുന്ന് പ്രയോഗവും ഉണ്ടാകും. കേരളത്തിൽ നിന്നുൾപ്പെടെ ലോകത്തിന്റെ വിവിധയിടങ്ങളിൽ നിന്നുള്ള കലാകാരന്മാർ ഗ്ലോബൽ വില്ലേജിന്റെ കലാവേദികളെ ധന്യമാക്കും. ദിവസവും വൈകുന്നേരം 4 മണി മുതൽ, അതിഥികൾക്ക് ഗ്ലോബൽ വില്ലേജിലെ 3,500-ലധികം ഷോപ്പിംഗ് ഔട്ട്ലെറ്റുകളും 250-ലധികം ഡൈനിംഗ് ഓപ്ഷനുകളും ഉൾക്കൊള്ളുന്ന 30 പവലിയനുകൾ സന്ദർശിക്കാനും 200-ലധികം റൈഡുകൾ, ഗെയിമുകൾ, ആകർഷണങ്ങൾ എന്നിവ ആസ്വദിക്കാനും സീസണിലുടനീളം 40,500 ഷോകൾ കാണാനും കഴിയും. പ്രശസ്തമായ ഗ്ലോബൽ വില്ലേജ് വെടിക്കെട്ട് എല്ലാ വെള്ളിയാഴ്ചയും ശനിയാഴ്ചയും രാത്രി 9 മണിക്ക് ആകാശത്ത് പ്രകാശം പരത്തും.