ആലപ്പുഴയിൽ മണ്ണഞ്ചേരിയിൽ മോഷണം നടത്തിയത് കുറുവാ സംഘം തന്നെയെന്ന് പോലീസ്. കുണ്ടന്നൂരിൽ നിന്നും അറസ്റ്റിലായ സന്തോഷ് സെൽവം കുറുവാ സംഘത്തിലുള്ള ആളാണെന്ന് ആലപ്പുഴ ഡിവൈഎസ്പി പറഞ്ഞു. 14 പേരാണ് കുറുവാ സംഘത്തിൽ ഉണ്ടായിരുന്നത്. മണികണ്ഠൻ സംഘത്തിലുള്ള ആളാണോ എന്ന് പരിശോധിക്കേണ്ടതുണ്ട്. സിസിടിവി ദൃശ്യങ്ങളാണ് അന്വേഷണത്തിൽ നിർണ്ണായകമായതെന്നും പോലീസ് അറിയിച്ചു. സന്തോഷിന്റെ ശരീരത്തിലെ പച്ചകുത്തിയ അടയാളമാണ് അന്വേഷണത്തിൽ നിർണ്ണായകമായത്. ഇന്നലെ വൈകുന്നേരം കുണ്ടന്നൂർ പാലത്തിനടിയിൽ വെച്ചാണ് തമിഴ്നാട് സ്വദേശികളായ സന്തോഷ് സെൽവത്തിനേയും മണികണ്ഠനേയും മണ്ണഞ്ചേരി പോലീസ് പിടികൂടിയത്. രക്ഷപ്പെട്ട സന്തോഷ് സെൽവത്തെ നാല് മണിക്കൂർ നീണ്ട തെരച്ചിലിനൊടുവിലാണ് ചതുപ്പിൽ നിന്നും സാഹസികമായി പിടികൂടിയത്. മണ്ണഞ്ചേരിയിലെത്തി കവർച്ച നടത്തിയത് സന്തോഷായിരുന്നുവെന്ന് സ്ഥിരീകരിച്ചു.
കുണ്ടന്നൂരിലെത്തിയത് 3 മാസം മുമ്പാണ്. കുണ്ടന്നൂരിലെ ബാറിൽ ഇയാൾ പതിവായി എത്താറുണ്ടെന്നും, കുറുവാ സംഘവുമായി ഇയാൾക്ക് ബന്ധമുണ്ടോയെന്ന് കൂടുതൽ ചോദ്യം ചെയ്താലെ വ്യക്തമാവൂ എന്നും പോലീസ് പറഞ്ഞു. ആലപ്പുഴയിലേക്ക് ചോദ്യം ചെയ്യാനായി കൊണ്ട് പോകും വഴി കസ്റ്റഡിയിൽ നിന്ന് ഇയാൾ ചാടി പോവുകയായിരുന്നു.
കുണ്ടന്നൂർ നഗരത്തിൽ 4 മണിക്കൂർ നീണ്ട തെരച്ചിലിനൊടുവിലാണ് പ്രതിയെ പൊലീസ് പിടികൂടുന്നത്. ഈ പ്രദേശങ്ങളിലെ ചതുപ്പിൽ പ്രതി ഒളിച്ചിരിക്കുകയായിരുന്നു. സന്തോഷിന്റെ ഭാര്യ ജ്യോതി, അമ്മ പൊന്നമ്മ എന്നിവരെയും മരട് പൊലീസ് കസ്റ്റഡിയിൽ എടുത്തിരുന്നു. ഇവരെ പിന്നീട് വിട്ടയച്ചു.