ചണ്ഡീഗഡ് മേയര് തിരഞ്ഞെടുപ്പ് നടത്തിയ പ്രിസൈഡിംഗ് ഓഫീസര് അനില് മസിഹിനെ രൂക്ഷമായി വിമര്ശിച്ച് സുപ്രീം കോടതി. വോട്ടെടുപ്പിന് ശേഷം പ്രിസൈഡിംഗ് ഓഫീസര് ബാലറ്റ് പേപ്പറുകളില് ക്രമക്കേട് നടത്തി. അദ്ദേഹത്തെ പ്രോസിക്യൂട്ട് ചെയ്യണം. ഇത് ജനാധിപത്യത്തെ പരിഹസിക്കുന്നതും കൊലപ്പെടുത്തുന്നതുമാണെന്നും ചീഫ് ജസ്റ്റിസ് ഡി വൈ ചന്ദ്രചൂഡ് പറഞ്ഞു. ഫെബ്രുവരി ഏഴിന് നിശ്ചയിച്ചിരുന്ന ചണ്ഡീഗഡ് മുന്സിപ്പല് കോര്പ്പറേഷന്റെ ആദ്യയോഗം അനിശ്ചിതകാലത്തേക്ക് മാറ്റിവെക്കാനും സുപ്രീം കോടതി ഉത്തരവിട്ടു. എഎപി കൗണ്സിലര് കുല്ദീപ് കുമാര് സമര്പ്പിച്ച ഹര്ജിയാണ് ചീഫ് ജസ്റ്റിസ് ഡി വൈ ചന്ദ്രചൂഡിന്റെ നേതൃത്വത്തിലുള്ള ബെഞ്ച് പരിഗണിച്ചത്.
തിരഞ്ഞെടുപ്പ് പ്രക്രിയയുടെ പരിശുദ്ധി പരമപ്രധാനമാണെന്നും ഈ ജനാധിപത്യ കൊലപാതകം അനുവദിക്കാനാവില്ലെന്നും ചീഫ് ജസ്റ്റിസ് വ്യക്തമാക്കി. മേയര് തിരഞ്ഞെടുപ്പിന്റെ മുഴുവന് രേഖകളും പഞ്ചാബ്-ഹരിയാന ഹൈക്കോടതി രജിസ്ട്രാര് ജനറലിന്റെ കൈവശം വെക്കാന് സുപ്രീം കോടതി നിര്ദേശിച്ചു. ‘ബാലറ്റുകളും വീഡിയോഗ്രാഫിയും സംരക്ഷിക്കപ്പെടട്ടെ. റിട്ടേണിംഗ് ഓഫീസര് രേഖകള് കൈമാറണമെന്ന് അറിയിപ്പ് നല്കിയിട്ടുണ്ട്,’ ചീഫ് ജസ്റ്റിസ് പറഞ്ഞു.
വിരമിച്ച ജഡ്ജിയുടെ മേല്നോട്ടത്തില് വീണ്ടും തിരഞ്ഞെടുപ്പ് നടത്തണമെന്ന തങ്ങളുടെ അപേക്ഷയില് ഇടക്കാല ഇളവ് അനുവദിക്കാന് വിസമ്മതിച്ച പഞ്ചാബ്, ഹരിയാന ഹൈക്കോടതി ഉത്തരവിനെ ചോദ്യം ചെയ്തായിരുന്നു ഹര്ജി. പ്രിസൈഡിംഗ് ഓഫീസര് അനില് മസിഹ് ബാലറ്റ് പേപ്പറില് കൃത്രിമം കാണിച്ചെന്ന് എഎപി-കോണ്ഗ്രസ് സഖ്യം ആരോപിച്ചിരുന്നു. ഇത് മൂലമാണ് മേയര് തിരഞ്ഞെടുപ്പില് ബിജെപി വിജയിച്ചതെന്നും ഇവര് ആരോപിച്ചിരുന്നു.
ജനുവരി 30ന് നടന്ന ചണ്ഡീഗഡ് മേയര് തിരഞ്ഞെടുപ്പില് കോണ്ഗ്രസ്-എഎപി സഖ്യത്തിനെതിരെ ബിജെപി വിജയിച്ചിരുന്നു. എഎപിയുടെ കുല്ദീപ് കുമാറിനെ പരാജയപ്പെടുത്തി ബി.ജെ.പി.യിലെ മനോജ് സോങ്കറാണ് മേയറായത്. 35 അംഗ ചണ്ഡീഗഡ് കോർപറേഷനിൽ 12നെതിരെ 16 വോട്ടുകള് നേടിയായിരുന്നു വിജയം. എട്ട് വോട്ടുകള് അസാധുവായി. എട്ട് വോട്ടുകൾ അസാധുവാക്കിയ തീരുമാനത്തിൽ എഎപി-കോൺഗ്രസ് പ്രതിഷേധിച്ചതോടെ സഭയിൽ ബഹളമുണ്ടായി. വോട്ടുകൾ അസാധുവായി പ്രഖ്യാപിച്ചതിനെതിരെ എഎപി–കോൺഗ്രസ് സഖ്യം ഹരിയാന ഹൈക്കോടതിയെ സമീപിക്കുമെന്നും എഎപി അറിയിച്ചു. ഇന്ത്യ ബ്ലോക്കും ബിജെപിയും തമ്മിലുള്ള ആദ്യ തിരഞ്ഞെടുപ്പ് പോരാട്ടമാണ് നടന്നത്. കോൺഗ്രസും എഎപിയും സംയുക്തമായാണ് സ്ഥാനാർഥികളെ നിർത്തിയത്. കുൽദീപിനെ മേയർ സ്ഥാനാർഥിയായി എഎപി നിർത്തിയപ്പോൾ സീനിയർ ഡപ്യൂട്ടി മേയർ, ഡപ്യൂട്ടി മേയർ പദവികളിലേക്ക് കോൺഗ്രസാണ് സ്ഥാനാർഥികളെ നിർത്തിയത്.