നീലേശ്വരം വെടിക്കെട്ട് അപകടത്തില് മരിച്ചവരുടെ എണ്ണം രണ്ടായി. സാരമായി പൊള്ളലേറ്റ് കോഴിക്കോട്ടെ സ്വകാര്യ ആശുപത്രിയില് ചികിത്സയിലായിരുന്ന യുവാവ് ഞായറാഴ്ച രാവിലെ മരണത്തിന് കീഴടങ്ങി. നീലേശ്വരം ചായോത്ത് കിനാനൂരില് രതീഷ്(32) ആണ് മരിച്ചത്. രതീഷിന് 70 ശതമാനത്തിലേറെ പൊള്ളലേറ്റിരുന്നു. പൊള്ളലേറ്റ് കണ്ണൂരിലെ സ്വകാര്യ ആശുപത്രിയില് ചികിത്സയിലായിരുന്ന യുവാവ് ഇന്നലെ മരിച്ചിരുന്നു. നാല്പത് ശതമാനത്തിലേറെ പൊള്ളലേറ്റ് വെൻ്റിലേറ്റരിൽ കഴിഞ്ഞിരുന്ന ചോയ്യങ്കോട് കിണാവൂര് സന്ദീപ് ശനിയാഴ്ച വൈകീട്ട് ആണ് മരിച്ചത്.
കാസര്കോട് നീലേശ്വരം അഞ്ഞൂറ്റമ്പലം വീരര്ക്കാവ് ക്ഷേത്ര കളിയാട്ടത്തിനിടെ പടക്കശേഖരത്തിന് തീപിടിച്ചായിരുന്നു കഴിഞ്ഞ ചൊവ്വാഴ്ച പുലര്ച്ചെ വലിയ അപകടമുണ്ടായത്. പുലര്ച്ചെ 12.15-ഓടെയായിരുന്നു അപകടം. മൂവാളംകുഴി ചാമുണ്ഡി തെയ്യത്തിന്റെ വെള്ളാട്ടം പുറപ്പാട് സമയത്ത് പടക്കംപൊട്ടിച്ചപ്പോള്, തീപ്പൊരി പടക്കംസൂക്ഷിച്ച കെട്ടിടത്തിലേക്ക് വീഴുകയും ഒന്നാകെ പൊട്ടിത്തെറിക്കുകയുമായിരുന്നു. ക്ഷേത്രമതിലിനോട് ചേര്ന്നുള്ള ഷീറ്റ് പാകിയ കെട്ടിടത്തിലാണ് പടക്കം സൂക്ഷിച്ചിരുന്നത്. ഇതിനുസമീപം സ്ത്രീകളും കുട്ടികളുമുള്പ്പെടെയുള്ളവര് തെയ്യം കാണാന് കൂടിനിന്നിരുന്നു. ഇവരുള്പ്പെടെ അപകടത്തില് 150-ലേറെ പേര്ക്ക് പരിക്കേറ്റിരുന്നു.
അതേസമയം അപകടവുമായി ബന്ധപ്പെട്ട് അറസ്റ്റിലായ പ്രതികളില് മൂന്നുപേര്ക്കെതിരെ ജില്ലാ കോടതി സ്വമേധയാ കേസെടുത്ത് ജാമ്യ വിധി റദ്ദാക്കിയിരുന്നു. ഹൊസ്ദുർഗ് കോടതിയുടെ വിധി റദ്ദാക്കിയായിരുന്നു ജില്ലാ സെഷന്സ് കോടതിയുടെ സ്റ്റേ. പ്രതികളുടെ ജാമ്യം റദ്ദാക്കുകയും ചെയ്തു. റിമാന്ഡിലുള്ളവര് ജയിലില് നിന്നു പുറത്തിറങ്ങിയിട്ടില്ലെങ്കില് വിടേണ്ടതില്ലെന്നാണ് ഉത്തരവ്. ജില്ലാ സെഷന്സ് ജഡ്ജ് സാനു എസ്.പണിക്കരാണ് വിധി പുറപ്പെടുവിപ്പിച്ചത്. പുറത്തിറങ്ങിയവര്ക്ക് കോടതിയില് ഹാജരാകാന് നോട്ടീസ് അയക്കാനും നിര്ദേശം നല്കി. സ്വമേധയാ കേസെടുത്താണ് ജില്ലാ കോടതിയുടെ അപൂര്വമായി നടപടി.
കേസിലെ ഒന്നും രണ്ടു പ്രതികളായ ക്ഷേത്രകമ്മിറ്റി പ്രസിഡൻ്റ് പി.കെ.ചന്ദ്രശേഖരന്, കെ.ടി.ഭരതന്, ഏഴാം പ്രതി പടക്കംപൊട്ടിച്ച പി.രാജേഷ് എന്നിവര്ക്കാണ് ഹൊസ്ദുര്ഗ് മജിസ്ടേറ്റ് ബാലുദിനേഷ് വെള്ളിയാഴ്ച ജാമ്യം അനുവദിച്ചത്. രണ്ട് ആള് ജാമ്യമുള്പ്പെടെയുള്ള വ്യവസ്ഥയോടെയായിരുന്നു ഇത്. മണിക്കുറുകള്ക്കുള്ളില് ചന്ദ്രശേഖരനും ഭരതനും ജയിലില് നിന്നു പുറത്തിറങ്ങി. ആള് ജാമ്യത്തിന് ആരുമെത്താതിരുന്നതിനാല് രാജേഷിന് പുറത്തിറങ്ങാനായില്ല. മേല്ക്കോടതി ഉത്തരവുണ്ടായതിനാല് രാജേഷിനെ ജില്ലാ ജയിലില് നിന്നു ശനിയാഴ്ച പുറത്തു വിട്ടില്ല.