നടൻ ദിലീപ് വിഐപി പരിഗണനയിൽ ശബരിമലയിൽ ദർശനം നടത്തിയ സംഭവത്തിൽ വിമർശനവുമായി ഹൈക്കോടതി. വിഷയം ചെറുതായി കാണാനാകില്ലെന്ന് നിരീക്ഷിച്ച കോടതി, സംഭവത്തിൽ ദേവസ്വം ബോർഡിനോട് വിശദീകരണം തേടി. സിസിടിവി ദൃശ്യങ്ങൾ ഹാജരാക്കാനും നിർദേശം നൽകി. രാവിലെ ദേവസ്വം ബെഞ്ചിന്റെ സിറ്റിങ്ങിലാണ് കോടതിയുടെ പരാമർശം. വിഷയം ഉച്ചയ്ക്കു പരിഗണിക്കുമെന്നും വ്യക്തമാക്കി.
ഇന്നലെയാണ് നടൻ ദിലീപ് ശബരിമലയിൽ ദർശനം നടത്തിയത്. നടയടക്കുന്നതിന് തൊട്ടുമുൻപാണ് ദിലീപ് ദർശനം നടത്തിയത്. ഹരിവരാസനം കീർത്തനം പൂർത്തിയായി നടയടച്ച ശേഷമാണ് ദിലീപ് മടങ്ങിയത്. ദീലിപ് ക്യൂ ഒഴിവാക്കി പോലീസുകാർക്കൊപ്പം ദർശനത്തിനായി എത്തുന്ന ദൃശ്യങ്ങൾ പുറത്തുവന്നിരുന്നു.
അതേസമയം, ശബരിമലയിൽ തീർത്ഥാടകരുടെ തിരക്ക് തുടരുകയാണ്. ഇന്ന് ഇതുവരെയ്ക്കും 41,480 തീർത്ഥാടകരാണ് പതിനെട്ടാംപടി ചവിട്ടിയത്. മഴ മാറി തെളിഞ്ഞ അന്തരീക്ഷം ആയതുകൊണ്ട് തീർത്ഥാടകർക്ക് പമ്പ മുതൽ സന്നിധാനം വരെ ബുദ്ധിമുട്ടുകൾ ഒന്നുമില്ലാതെ എത്താൻ കഴിയും. ബാബറി ദിനം ആയത് കൊണ്ട് ഇന്ന് സന്നിധാനത്ത് കൂടുതൽ സുരക്ഷ നിരീക്ഷണം നടപ്പിലാക്കിയിട്ടുണ്ട്. പൊലീസിന്റെ പുതിയ ബറ്റാലിയൻ ആണ് ഇന്നുമുതൽ സുരക്ഷാ ചുമതലകളിൽ ഉള്ളത്.