മകളുടെ കല്യാണത്തലേന്ന് പിതാവ് കൊല്ലപ്പെട്ടു. ഓട്ടോ ഡ്രൈവറായ രാജുവിന്റെ മകളുടെ വിവാഹം ഇന്നാണ് നടക്കേണ്ടിയിരുന്നത്. ഇന്നലെ അർദ്ധരാത്രി വർക്കല വടശ്ശേരികോണത്താണ് സംഭവം. കല്യാണത്തലേന്നുള്ള തിരക്കുകള്‍ കഴിഞ്ഞ് ആളുകൾ വീടുകളിലേക്ക് പോയ സമയത്താണ് വധുവിന്റെ പിതാവ് രാജന്റെ മരണത്തിലേക്ക് നയിച്ച സംഘര്‍ഷമുണ്ടായത്. വടശ്ശേരിക്കോണം സ്വദേശിയാണ് രാജു. 61 വയസ്സായിരുന്നു
അര്‍ധരാത്രിയോടെ അയല്‍വാസികൂടിയായ ജിഷ്ണുവും സുഹൃത്തുക്കളും വിവാഹവീടിന് മുന്നിലെത്തി ബഹളമുണ്ടാക്കി. പിന്നാലെ രാജന്റെ മകളെയും വീട്ടിലുണ്ടായിരുന്ന ബന്ധുക്കളെയും പ്രതികള്‍ ക്രൂരമായി ആക്രമിച്ചു. വിവാഹിതയാകാനിരുന്ന മകളെ മുന്‍സുഹൃത്തായ ജിഷ്ണു അടിച്ചുവീഴ്ത്തുകയും മുഖം നിലത്തിട്ട് വലിച്ചിഴക്കുകയും വീണ്ടും മര്‍ദിക്കുകയും ചെയ്തു. ഇത് കണ്ടാണ് രാജന്‍ ഓടിയെത്തിയത്. രാജനും ഭാര്യയും ചേര്‍ന്ന് അക്രമികളെ പിടിച്ചുമാറ്റാന്‍ ശ്രമിക്കുന്നതിനിടെ പ്രതികള്‍ സമീപത്തുണ്ടായിരുന്ന മണ്‍വെട്ടി കൊണ്ട് രാജന്റെ തലയ്ക്കടിക്കുകയായിരുന്നു. ബോധരഹിതനായ രാജുവിനെ ആശുപത്രിയിൽ എത്തിച്ചെങ്കിലും രക്ഷിക്കാനായില്ല. പ്രദേശവാസികളായ ജിഷ്ണു, ജിജിൻ, മനു, ശ്യാം എന്നിവരാണ് പോലീസ് കസ്റ്റഡിയിലുള്ളത്
സംഭവം നടക്കുമ്പോള്‍ രാജനും കുടുംബാംഗങ്ങളും അടുത്തബന്ധുക്കളും മാത്രമാണ് വീട്ടിലുണ്ടായിരുന്നത്. അതിനാല്‍ അക്രമികളെ പ്രതിരോധിക്കാനോ നേരിടാനോ കഴിഞ്ഞില്ല. ബഹളം കേട്ട് കൂടുതല്‍പേര്‍ എത്തിയപ്പോഴേക്കും പ്രതികള്‍ രക്ഷപ്പെട്ടിരുന്നു. തുടര്‍ന്ന് പരിക്കേറ്റവരെയെല്ലാം ആശുപത്രിയില്‍ എത്തിച്ചെങ്കിലും രാജന്‍ മരിച്ചു. രാജന്റെ മകളുമായി അയല്‍വാസിയായ ജിഷ്ണു നേരത്തെ അടുപ്പത്തിലായിരുന്നു. ഇരുവരുടെയും വിവാഹം ആലോചിച്ചിരുന്നെങ്കിലും ജിഷ്ണുവിന്റെ സ്വഭാവദൂഷ്യം കാരണം രാജനും കുടുംബവും ഇതില്‍നിന്ന് പിന്മാറുകയും മകള്‍ക്ക് മറ്റൊരു വിവാഹം ഉറപ്പിക്കുകയും ചെയ്തു. ഇതില്‍ പ്രകോപിതനായാണ് ജിഷ്ണു സുഹൃത്തുക്കളെയും കൂട്ടിയെത്തി വിവാഹവീട്ടില്‍ അക്രമം നടത്തിയത്.