മാലിദ്വീപ് വിവാദത്തില്‍ ഇന്ത്യയെ പിന്തുണച്ച് ഇസ്രായേല്‍. സോഷ്യല്‍ മീഡിയയിലെ #ExploreIndianIslands ട്രെന്‍ഡില്‍ ഇന്ത്യയിലെ ഇസ്രായേല്‍ എംബസി പങ്കാളിയായി. പ്രധാനമന്ത്രിയുടെ ലക്ഷദ്വീപ് സന്ദര്‍ശനവുമായി ബന്ധപ്പെട്ട് മാലിദ്വീപ് മന്ത്രിമാര്‍ നടത്തിയ പരാമര്‍ശങ്ങള്‍ വിവാദമായ സാഹചര്യത്തിലാണ് ഇത്. ലക്ഷദ്വീപിലെ ജലശുദ്ധീകരണ പദ്ധതി ആരംഭിക്കാനുള്ള ഫെഡറല്‍ ഗവണ്‍മെന്റിന്റെ അഭ്യര്‍ത്ഥന പ്രകാരം ഞങ്ങള്‍ കഴിഞ്ഞ വര്‍ഷം ലക്ഷദ്വീപിലായിരുന്നു. പദ്ധതിയുടെ പ്രവര്‍ത്തനങ്ങള്‍ നാളെ തന്നെ ആരംഭിക്കാന്‍ ഇസ്രായേല്‍ തയ്യാറാണ്’, ഇസ്രായേല്‍ എംബസി എക്‌സില്‍ പങ്കുവെച്ച പോസ്റ്റിലൂടെ അറിയിച്ചു. ലോകമെമ്പാടും ഉള്ളവരോട് ലക്ഷദ്വീപിന്റെ ഭംഗി ആസ്വദിക്കാന്‍ ആഹ്വാനം ചെയ്ത് ചിത്രങ്ങളും വീഡിയോയും എംബസി പങ്കുവച്ചിട്ടുണ്ട്.
ദ്വീപസമൂഹങ്ങളിൽ വിനോദസഞ്ചാരം പ്രോത്സാഹിപ്പിക്കുന്നതിനായുള്ള പ്രധാനമന്ത്രിയുടെ ലക്ഷദ്വീപ് സന്ദര്‍ശനത്തിന് പിന്നാലെയാണ് വിവാദം തുടങ്ങിയത്. മോദി പങ്കുവെച്ച ചിത്രങ്ങള്‍ക്ക് താഴെ മൂന്ന് മാലിദ്വീപ് മന്ത്രിമാര്‍ അപകീര്‍ത്തികരമായ പരാമര്‍ശങ്ങള്‍ നടത്തി. ഈ കമന്റുകള്‍ സോഷ്യല്‍ മീഡിയയില്‍ വലിയ ചര്‍ച്ചയായി. മോദിയെ കോമാളിയെന്നും ഇസ്രായേലിന്റെ പാവയെന്നും അടക്കം അധിക്ഷേപിച്ചായിരുന്നു കമന്റുകള്‍. ഇതോടെ ഈ മന്ത്രിമാര്‍ക്കെതിരെ രൂക്ഷമായ പ്രതികരണം സോഷ്യല്‍ മീഡിയയിൽ നിന്നുണ്ടായി. ലക്ഷദ്വീപിനേയും മാലിദ്വീപിനേയും താരതമ്യം ചെയ്യുന്നതിനെ പരിഹസിച്ച് മാലിദ്വീപിലെ ഒരു ഭരണകക്ഷി നേതാവും പോസ്റ്റ് പങ്കുവെച്ചു. അധിക്ഷേപ പരാമര്‍ശത്തിന് പിന്നാലെ മാലിദ്വീപ് മന്ത്രിമാരായ മല്‍ഷ ഷെരീഫ്, മറിയം ഷിയൂന, അബ്ദുല്ല മഹ്സൂം മജീദ് എന്നിവരെ സസ്‌പെന്‍ഡ് ചെയ്തു. മന്ത്രിമാരുടേത് വ്യക്തിപരമായ കാഴ്ചപ്പാടുകളാണെന്നും മാലിദ്വീപ് സര്‍ക്കാരിനെ പ്രതിനിധീകരിക്കുന്നില്ലെന്നുമായിരുന്നു സര്‍ക്കാര്‍ പുറത്തിറക്കിയ ഔദ്യോഗിക പ്രസ്താവന. സാമൂഹിക മാധ്യമങ്ങളിലൂടെ നടത്തുന്ന വിദ്വേഷപരാമർശങ്ങൾക്കെതിരെ നടപടിയുണ്ടാകുമെന്നും സർക്കാർ വ്യക്തമാക്കി.
ഒരു വശത്ത് വിവാദം മുറുകുമ്പോൾ മറുവശത്ത് നിർണായക കൂടിക്കാഴ്ചകൾ നടക്കുകയാണ്. ഇന്ത്യന്‍ ഹൈക്കമ്മീഷണര്‍ മുനു മഹാവാര്‍ മാലിദ്വീപ് വിദേശകാര്യ മന്ത്രാലയ ഉദ്യോഗസ്ഥരുമായി കൂടിക്കാഴ്ച നടത്തി. ഇരുരാജ്യങ്ങളുടെയും ഉഭയകക്ഷി പ്രശ്നങ്ങള്‍ ചര്‍ച്ച ചെയ്യുന്നതിനായി മുനു മഹാവര്‍, മാലിദ്വീപിലെ മോഫയിലെത്തി അംബാസഡര്‍ അലി നസീര്‍ മുഹമ്മദുമായാണ് കൂടിക്കാഴ്ച നടത്തിയത്. മാലിദ്വീപ് പ്രതിനിധി ഇബ്രാഹിം ഷഹീബിനെ വിദേശകാര്യ മന്ത്രാലയം ന്യൂഡല്‍ഹിയിലെ സൗത്ത് ബ്ലോക്കിലേക്ക് വിളിച്ച് വരുത്തിയതിന് പിന്നാലെയാണ് സംഭവം. പ്രധാനമന്ത്രി നരേന്ദ്ര മോദിയുടെ ലക്ഷദ്വീപ് സന്ദര്‍ശനവുമായി ബന്ധപ്പെട്ട് മാലിദ്വീപ് മന്ത്രിമാര്‍ നടത്തിയ അധിക്ഷേപകരമായ പരാമര്‍ശങ്ങള്‍ വിവാദമായ സാഹചര്യത്തിലാണ് തിരക്കിട്ട ചര്‍ച്ചകള്‍.
അതേസമയം സംഭവം വിവാദമായതോടെ ബോളിവുഡ് താരങ്ങളും കായിക താരങ്ങളും അടക്കം പ്രതികരണവുമായി രംഗത്തെത്തിയിരുന്നു. അക്ഷയ് കുമാര്‍, സല്‍മാന്‍ ഖാന്‍, ശ്രദ്ധ കപൂര്‍, ഹാര്‍ദിക് പാണ്ഡ്യ, സച്ചിന്‍ ടെണ്ടുല്‍ക്കര്‍ തുടങ്ങി നിരവധി ഇന്ത്യന്‍ സെലിബ്രിറ്റികള്‍ പ്രധാനമന്ത്രി മോദിയുടെ ലക്ഷദ്വീപ് സന്ദര്‍ശനത്തെ പിന്തുണച്ചു. ഇതിനിടെ മാലിദ്വീപിന്റെ മുന്‍ പ്രസിഡന്റുമാരായ ഇബ്രാഹിം മുഹമ്മദ് സോലിഹ്, മുഹമ്മദ് നഷീദ് എന്നിവരുള്‍പ്പെടെയുള്ള നിരവധി നേതാക്കള്‍ മന്ത്രിമാരുടെ പരാമര്‍ശങ്ങളെ അപലപിച്ചു. അത്തരം പ്രസ്താവനകളിലൂടെ ഇരു രാജ്യങ്ങളും തമ്മിലുള്ള സൗഹൃദത്തിന് കോട്ടം വരുത്തരുതെന്ന് ഇവര്‍ പറഞ്ഞു.