ലണ്ടനിലെ ഹീത്രോ വിമാനത്താവളത്തിന് സമീപത്തെ ഇലക്ട്രിക്കൽ സബ്‌സ്റ്റേഷനിൽ വൻ തീപിടുത്തം. ഇതോടെ വൈദ്യുതി തടസ്സം നേരിട്ടതിനെ തുടർന്ന് വിമാനത്താവളം 24 മണിക്കൂറെങ്കിലും അടച്ചിടുമെന്ന് വിമാനത്താവള അധികൃതർ അറിയിച്ചു.
“വിമാനത്താവളത്തിലേക്ക് വൈദ്യുതി വിതരണം ചെയ്യുന്ന ഒരു സബ്സ്റ്റേഷനിലുണ്ടായ തീപിടുത്തത്തെത്തുടർന്ന്, ഹീത്രോയിൽ കാര്യമായ വൈദ്യുതി തടസ്സം നേരിടുന്നു. യാത്രക്കാരുടെയും സഹപ്രവർത്തകരുടെയും സുരക്ഷ ഉറപ്പാക്കാൻ, മാർച്ച് 21 ന് രാത്രി 11:59 വരെ വിമാനത്താവളം അടച്ചിടും. യാത്രക്കാർ വിമാനത്താവളത്തിലേക്ക് യാത്ര ചെയ്യരുതെന്നും കൂടുതൽ വിവരങ്ങൾക്ക് അവരുടെ എയർലൈനുമായി ബന്ധപ്പെടണമെന്നും നിർദ്ദേശിക്കുന്നു. അസൗകര്യത്തിൽ ഞങ്ങൾ ഖേദിക്കുന്നു,” ഹീത്രോ വിമാനത്താവള അധികൃതർ വിശദീകരിച്ചു.
അതേസമയം യൂറോപ്പിലെ ഏറ്റവും തിരക്കേറിയ വിമാനത്താവളങ്ങളിലൊന്നായ ഹീത്രോ വിമാനത്താവളം എപ്പോൾ പ്രവർത്തനം പുനരാരംഭിക്കുമെന്ന് വ്യക്തത വരുത്തിയിട്ടില്ല.