2023ലെ കേരള ബജറ്റിൽ വ്യവസായ മേഖലയ്ക്കായി വമ്പൻ പദ്ധതികൾ പ്രഖ്യാപിച്ച് ധനമന്ത്രി കെ. എൻ ബാലഗോപാൽ. ഇത്തവണത്തെ ബജറ്റിൽ വ്യാവസായിക ആവശ്യങ്ങൾക്ക് മാത്രമായി നീക്കി വച്ചത് 1259.66 കോടി രൂപയാണ്. ഒപ്പം വ്യവസായിക മേഖലയ്ക്കായി സംസ്ഥാനം കേന്ദ്ര സഹായമായ 12 കോടി രൂപയും പ്രതീക്ഷിക്കുന്നുണ്ട്. ഗ്രാമീണ ചെറുകിട വ്യവസായങ്ങൾക്ക് വേണ്ടി 483.40 കോടി രൂപയും മാറ്റിവച്ചിട്ടുണ്ട്
ഗ്രാമങ്ങളിൽ ചെറുകിട വ്യവസായത്തിനായി 212.70 കോടി രൂപയും, കയർ വ്യവസായത്തിന് 117 കോടി രൂപയും, കശുവണ്ടി വ്യവസായത്തിന് 58 കോടി രൂപയും, ഖാദി വ്യവസായത്തിന് 16.10 കോടി രൂപയും, കൈത്തറി, യന്ത്രത്തെറി വ്യവസായങ്ങൾക്ക് വേണ്ടി 56.40 കോടി രൂപയുമാണ് മാറ്റിയിട്ടുള്ളത്.
മെയ്ക്ക് ഇൻ കേരളയ്ക്കായി ആയിരം കോടി രൂപയാണ് മാറ്റിവച്ചിരിക്കുന്നത്. ഈ പദ്ധതിക്കായി നടപ്പ് വർഷം 100 കോടി രൂപ അനുവദിക്കും. കാർഷിക സ്റ്റാർട്ടപ്പുകൾക്ക് മേക്കിങ് കേരളയിലൂടെ പിന്തുണ നൽകുമെന്നും മന്ത്രി ബാലഗോപാൽ പറഞ്ഞു. വ്യവസായ മേഖലയിൽ കരകൗശല മേഖലയ്ക്കായി 4.20 കോടി രൂപയും, വാണിജ്യ ആവശ്യങ്ങൾക്കായി ഏഴു കോടി രൂപയും , കയർ വ്യവസായ മേഖലയ്ക്കായി 117 കോടി രൂപയും വകയിരുത്തി.
സ്വകാര്യ വ്യവസായ പാർക്കുകളെ പ്രോത്സാഹിപ്പിക്കുന്നതിനായി പത്തുകോടിയോളം രൂപയാണ് മാറ്റിയിട്ടുള്ളത്. ബഹുനില വ്യവസായ എസ്റ്റേറ്റുകളുടെ നിർമ്മാണത്തിനായും 10 കോടി രൂപ മാറ്റിയിട്ടുണ്ട്.