ജപ്പാനില് വന് ഭൂചലനം. റിക്ടര് സ്കെയിലില് 7.6 തീവ്രത രേഖപ്പെടുത്തി. ഇഷികാവയിലെ നോട്ടോ മേഖലയിലാണ് ഭൂചലനമുണ്ടായത്. തുടര്ന്ന് വിവിധയിടങ്ങളില് തുടര്ചലനങ്ങള് അനുഭവപ്പെട്ടു. ഇഷികാവയിലും സമീപ പ്രദേശങ്ങളിലുമാണ് ഭൂചലനം അനുഭവപ്പെട്ടതെന്ന് ജപ്പാന് കാലാവസ്ഥാ ഏജന്സി (ജെഎംഎ) അറിയിച്ചു. ഇതോടെ രാജ്യത്തിന്റെ വടക്കുപടിഞ്ഞാറന് തീരത്ത് സുനാമി മുന്നറിയിപ്പ് നല്കി. ഇഷികാവ, നിഗറ്റ, ടോയാമ അടക്കമുള്ള പടിഞ്ഞാറന് തീരപ്രദേശങ്ങളിലാണ് ജാഗ്രതാ നിര്ദ്ദേശം. തലസ്ഥാനമായ ടോക്കിയോയിലും കാന്റോ മേഖലയിലും ഭൂചലനം അനുഭവപ്പെട്ടതായി റിപ്പോര്ട്ടുകളുണ്ട്
നൈഗാട്ട, ടൊയാമ, ഇഷികാമ തുടങ്ങിയ മേഖലകളിലാണ് സുനാമി മുന്നറിയിപ്പ് നല്കിയിരിക്കുന്നത്
ഇന്ത്യന് സമയം ഇന്ന് ഉച്ചയോടെയാണ് ജപ്പാനില് ശക്തമായ ഭൂചലനമുണ്ടായത്. അതേസമയം, ഭൂചലനമുണ്ടായെങ്കിലും ജപ്പാനിലെ ആണവനിലയങ്ങള്ക്ക് ഭീഷണിയില്ലെന്ന് അധികൃതര് അറിയിച്ചു. ഭൂചലനമുണ്ടായ സാഹചര്യത്തില് സുനാമിയുണ്ടാകാനുള്ള സാധ്യതയുണ്ടെന്നും തീരദേശ മേഖലയിലുള്ളവര് ഒഴിഞ്ഞുപോകണമെന്നുമാണ് മുന്നറിയിപ്പ് നല്കിയിട്ടുള്ളത്. സുനാമി ഉണ്ടാകാനുള്ള സാധ്യതയുള്ളതിനാല് തീരദേശ മേഖലയിലുള്ളവരോട് സുരക്ഷിത സ്ഥാനങ്ങളിലേക്ക് മാറാനാണ് നിര്ദശം. ഭൂചലനമുണ്ടായി പത്തുമിനുട്ടിനുശേഷം തീരദേശ മേഖലയില് സുനാമി തിരമാലകളടിച്ചതായുള്ള റിപ്പോര്ട്ടുകളും ഇതിനിടെ പുറത്തുവന്നു. 1.2 മീറ്റര് ഉയരത്തിലായുള്ള സുനാമി തീരയാണ് ജപ്പാനിലെ വജിമ നഗരത്തിലെ തീരപ്രദേശത്തടിച്ചതെന്നാണ് റിപ്പോര്ട്ട്. അഞ്ചു മീറ്റര് വരെ ഉയരത്തിലുള്ള സുനാമി തീരകള് അടിക്കാനുള്ള സാധ്യതയുണ്ടെന്നും അധികൃതര് മുന്നറിയിപ്പ് നല്കുന്നുണ്ട്.
ഭൂചലനത്തില് പലയിടത്തെയും റോഡുകള് ഉള്പ്പെടെ തകര്ന്നു. നിരവധി വീടുകള് തകര്ന്നു, 33,500 വീടുകളിലെ വൈദ്യുത ബന്ധവും വിച്ഛേദിക്കപ്പെട്ടു. സുനാമി മുന്നറിയിപ്പിനെത്തുടര്ന്ന് 5 മീറ്റര് വരെ തിരമാലകള് ഉയര്ന്നേക്കാവുന്ന തീരപ്രദേശങ്ങള് വിട്ട് കെട്ടിടങ്ങളുടെ മുകളിലേക്കോ ഉയര്ന്ന സ്ഥലത്തേക്കോ മാറാന് ആളുകളോട് അഭ്യര്ത്ഥിച്ചിട്ടുണ്ട്. ഒരു മീറ്ററിലധികം ഉയര്ന്ന തിരമാലകള് ഇഷികാവയിലെ വാജിമ സിറ്റിയുടെ തീരത്ത് അടിച്ചു. എന്നാല് നാശനഷ്ടങ്ങളോ ആളപായമോ ഇതുവരെ റിപ്പോര്ട്ട് ചെയ്തിട്ടില്ല.
2023ൽ ജപ്പാനില് ശക്തമായ ഭൂചലനങ്ങള് ഉണ്ടായിട്ടുണ്ട്. ഡിസംബർ ആദ്യം, തെക്കന് ഫിലിപ്പൈന്സിലെ മിന്ഡാനോയില് 7.5 തീവ്രത രേഖപ്പെടുത്തിയ ഭൂകമ്പത്തെത്തുടര്ന്ന് തെക്കുപടിഞ്ഞാറന് തീരത്ത് സുനാമി മുന്നറിയിപ്പ് നല്കിയിരുന്നു. മെയ് 5 ന്, ജപ്പാനിലെ പടിഞ്ഞാറന് പ്രിഫെക്ചറായ ഇഷിക്കാവയില് 6.5 തീവ്രത രേഖപ്പെടുത്തിയ ഭൂചലനം അനുഭവപ്പെട്ടു. സംഭവത്തില് നിരവധി പേര്ക്ക് പരിക്കേല്ക്കുകയും കെട്ടിടങ്ങള് തകരുകയും ചെയ്തു. ഫെബ്രുവരി, മാര്ച്ച്, ഓഗസ്റ്റ് മാസങ്ങളില് വടക്കന് ദ്വീപായ ഹൊക്കൈഡോയിലും ശക്തമായ ഭൂകമ്പങ്ങള് ഉണ്ടായി. ടെക്റ്റോണിക് പ്ലേറ്റ് ഇടപെടലുകള് പതിവായി നടക്കുന്ന, അസ്ഥിരമായ പസഫിക് റിംഗ് ഓഫ് ഫയറിലുള്ള സ്ഥാനം കാരണം ഭൂകമ്പത്തിന് ഏറെ സാധ്യതയുള്ള പ്രദേശമായാണ് ജപ്പാനെ കണക്കാക്കുന്നത്.