1975-ൽ അന്നത്തെ പ്രധാനമന്ത്രി ഇന്ദിരാഗാന്ധി ഏർപ്പെടുത്തിയ അടിയന്തരാവസ്ഥയെ ഭരണഘടനയ്‌ക്കെതിരായ ഏറ്റവും വലിയ ആക്രമണം എന്നും രാജ്യത്തിന്റെ ചരിത്രത്തിലെ ഇരുണ്ട അധ്യായം എന്നും പ്രസിഡന്റ് ദ്രൗപതി മുർമു. പാർലമെന്റിന്റെ സംയുക്ത സമ്മേളനത്തെ അഭിസംബോധന ചെയ്യുമ്പോഴാണ് രാഷ്ട്രപതി അടിയന്തരാവസ്ഥയെ ഭരണഘടനാവിരുദ്ധം വിശേഷിപ്പിച്ചത് .
പൊതു തെരഞ്ഞെടുപ്പിനെത്തുടർന്ന് 18-ആം ലോക്‌സഭ രൂപീകരിച്ചതിന് ശേഷം പാർലമെന്റിനെ അഭിസംബോധന ചെയ്ത പ്രസിഡന്റ് അടിയന്തരാവസ്ഥക്കാലത്ത് രാജ്യം അരാജകത്വത്തിലേക്ക് കൂപ്പുകുത്തിയെന്നും ജനാധിപത്യത്തെ കളങ്കപ്പെടുത്താനുള്ളശ്രമങ്ങളെ എല്ലാവരും അപലപിക്കണമെന്നും പറഞ്ഞു.
“ഭരണഘടനയ്‌ക്കെതിരായ നേരിട്ടുള്ള ആക്രമണത്തിന്റെ ഏറ്റവും വലുതും ഇരുണ്ടതുമായ അധ്യായമായിരുന്നു അടിയന്തരാവസ്ഥ. അടിയന്തരാവസ്ഥക്കാലത്ത് രാജ്യം മുഴുവൻ അരാജകത്വത്തിലേക്ക് കൂപ്പുകുത്തി, എന്നാൽ അത്തരം ഭരണഘടനാ വിരുദ്ധ ശക്തികൾക്കെതിരെ രാജ്യം വിജയിച്ചു,” ഭരണകക്ഷിയായ ബിജെപി അംഗങ്ങളുടെ ആഹ്ലാദത്തിനും പ്രതിപക്ഷത്തിൻ്റെ പ്രതിഷേധത്തിനും ഇടയിൽ അവർ പറഞ്ഞു. “നമ്മുടെ ജനാധിപത്യത്തെ കളങ്കപ്പെടുത്താനുള്ള എല്ലാ ശ്രമങ്ങളെയും എല്ലാവരും അപലപിക്കണം. ജനാധിപത്യത്തെ ദുർബലപ്പെടുത്താനും രാജ്യത്തിനകത്തും പുറത്തും നിന്ന് സമൂഹത്തിൽ അരാജകത്വം സൃഷ്ടിക്കാനും ഛിദ്രശക്തികൾ ഗൂഢാലോചന നടത്തുകയാണ്,” രാഷ്ട്രപതി പറഞ്ഞു.
1975 ജൂൺ മുതൽ 1977 മാർച്ച് വരെ രണ്ട് വർഷത്തോളം നീണ്ടുനിന്ന അടിയന്തരാവസ്ഥ ഇന്ദിരാഗാന്ധി ഏർപ്പെടുത്തുകയും ഭരണഘടനയുടെ 352-ആം അനുച്ഛേദം പ്രകാരം അന്നത്തെ രാഷ്ട്രപതി ഫക്രുദ്ദീൻ അലി അഹമ്മദ് അംഗീകരിക്കുകയും ചെയ്തു. രാജ്യത്തിന് ആഭ്യന്തരവും ബാഹ്യവുമായ ഭീഷണികൾ ആസന്നമായിരിക്കുമെന്ന യുക്തിയുടെ അടിസ്ഥാനത്തിലാണ് അടിയന്തരാവസ്ഥ പ്രഖ്യാപിച്ചത്.
ബി.ജെ.പിയും പ്രതിപക്ഷവും തമ്മിലുള്ള വാക് പോരിന്റെ പശ്ചാത്തലത്തിലാണ് അടിയന്തരാവസ്ഥയെ കുറിച്ച് പ്രസിഡന്റ് മുർമുവിന്റെ പരാമർശം. പ്രധാനമന്ത്രി നരേന്ദ്രമോദിയും അദ്ദേഹത്തിൻ്റെ മന്ത്രിമാരും അടിയന്തരാവസ്ഥയുടെ ഭീകരത അനുസ്മരിച്ചപ്പോൾ, കോൺഗ്രസും സഖ്യകക്ഷികളും അതിനെ എതിർത്തു, കഴിഞ്ഞ 10 വർഷത്തെ ബിജെപി നേതൃത്വത്തിലുള്ള എൻഡിഎ ഭരണത്തിൽ “അപ്രഖ്യാപിത അടിയന്തരാവസ്ഥ” നിലവിലുണ്ടെന്ന് അവർ പറഞ്ഞു.