തിരുവനന്തപുരം: സര്വകലാശാലകളിലെ ചാന്സലര് പദവിയില്നിന്ന് ഗവര്ണറെ നീക്കുന്നതിനുള്ള കേരള സര്വകലാശാല ഭേദഗതി ബില് സര്ക്കാര് രാജ്ഭവന് കൈമാറി. ഈ മാസം 13ന് നിയമസഭ പാസാക്കിയ ചാൻസലർ ബിൽ ഇന്നാണ് ഗവർണർക്ക് അയച്ചത്. ഒന്പതു ദിവസത്തിനു ശേഷമാണ് ബില് ഗവര്ണര് ആരിഫ് മുഹമ്മദ് ഖാന്റെ പരിഗണനയ്ക്കായി അയച്ചിരിക്കുന്നത്. 14 സർവകലാശാലകളുടെയും ചാൻസലർ സ്ഥാനത്ത് നിന്നും ഗവർണറെ മാറ്റുന്നതാണ് ബിൽ. ബില്ലിൽ വിശദമായ പരിശോധന നടത്താനാണ് രാജ്ഭവന്റെയും നീക്കം. .
നിലവില് ഗവര്ണര് രാജ്ഭവനിലില്ല. സംസ്ഥാനത്തിനു പുറത്തുള്ള ഗവര്ണര് രണ്ടാം തീയതിയേ രാജ്ഭവനിലേക്ക് മടങ്ങിയെത്തൂ. ബില് രാഷ്ട്രപതിയുടെ പരിഗണനയ്ക്ക് അയയ്ക്കുകയോ കൂടുതല് നിയമോപദേശം തേടുകയോ ചെയ്തേക്കാം. അല്ലെങ്കില് ഇതില് ഒരു തീരുമാനവും എടുക്കാതെ രാജ്ഭവനില് സൂക്ഷിച്ചെന്നും വരാം. ചാന്സലര് നിയമനത്തിനു മുഖ്യമന്ത്രിയും പ്രതിപക്ഷ നേതാവും സ്പീക്കറും ഉള്പ്പെടുന്ന സമിതി രൂപീകരിക്കണമെന്നാണ് ബില്ലിലെ പ്രധാന വ്യവസ്ഥ. ബില് നിയമസഭ പാസാക്കിയെങ്കിലും ഗവര്ണര് ഒപ്പിട്ടാലേ നിയമമാകൂ.